1 «Kimfumu ki mazulu kifwanakani bonso mfumu yimosi yi nzo yi duuka mu mene na mene mu kwe sosa bisadi bya kwe sala mukomoto ku mfuba andi yi vinu. 2 Wuyuwasana na bisadi mu bafuta mufutu wu kilumbu kimosi. Ni kabatambika ku mfuba andi yi vinu. 3 Mu ngunga yi vwa yi mene, wuduuka dyaka, na wuyenda bwana ha kibuka bekyokyo kwandi bantu bahiika, bedi lembolo sa kima. 4 Wubateela ti: "Yeno mpe, yendeeno lusala ku mfuba ani yi vinu na mbo nalufuta mufutu wufwanakani." 5 Ni bayenda. Mu ntangu ha mbata* wubwesa duuka, mboki mu ngunga yi tatu yi nkokila wubwesa duuka dyaka, mu kadi ntangu wuteela bumosi ku bantu ba kayena. 6 Bu kaduuka mu ngunga yi tanu yi nkokila, wuyena dyaka bantu bahiika ha kibuka bekyokyo kwandi. Wubateela ti: "Bila nki kilumbu kimvimba luzakididi kweno haha wulembolo sa kima e?" 7 Bamuvutudila ti: "Kunani muntu wutubongidi mu kwe sala mukomoto." Wubateela ti: "Yeno mpe, yendeeno ku mfuba ani yi vinu."

8 Nkokila bu yitula, mfumu yi mfuba wuteela ku munkebi wu mvwilu andi ti: "Tumisa bisadi na bafuta mufutu awu, tonina ku bazimunini na mbo wumanisina ku yobobo baatekidingi." 9 Yobobo ba kabonga mu ngunga yi tanu yi nkokila bayiza, mpe kadi muntu wubaka mufutu wu kilumbu kimosi. 10 Bantete bu bayiza, babanzila ti yawu mufutu wuhyokidi baabaka, kansi yawu mpe babahaana, ku kadi muntu, mufutu wu kilumbu kimosi. 11 Bu babaka wo, bavungutila mfumu yi nzo, 12 na bata ti: "Bisadi bebyobyo bi zimunini, yawu ngunga yimosi kwandi basedi, wubaheeni mufutu wumosi na yeto tuyeni mpasi mu sala kilumbu kimvimba ku nsye mbangasi yi mwini!" 13 Kansi mfumu yi mfuba wuvutula ku wumosi mu yawu ti: "Mukundi ani, na kuhidikidi musamu wumbi ko. Tuyuwasani naaku ko ti mu mufutu wu kilumbu kimosi wasadila e? 14 Bonga mufutu aku na nkatukila. Meno ntiidi mu futa mufutu wumosi ku ngeye na ku kisadi ki zimunini. 15 Bwedi, nii na luve ko mu hidika myonso mi ntiidi mu mbongo zani e? Hoti musoki wuna nyenina mu dyambu ti muntu wumbote nidi e?" 16 Ni hahoho, baatekila baazimunina, mboki baazimunina baatekila.»

17 Yesu bu kedi tomboka ku mbanza Yelusalemi, wunata milongoki myandi kumi na myole ha luhengo na wubateela bu bedi kwe yenzi ti: 18 «Tuna tomboka ku Yelusalemi. Mwana Muntu baamuyekola mu moko ma zimfumu zinganga-Nzambi na milongisi mi Misiku. Baamuzengila lufwa, 19 na baamuyekola ku bantu balembolo ba Bayudayo, mwanki baamuseha, baamuzuba bikoti mboki baamukoma ha kulunsi. Kansi mu kilumbu kibitatu waafuluka mu bafwa.»

20 Buna ngudi yi baala ba Zebedayi wuyenda na baala bandi ha ba Yesu. Wufukama ha ntadisi yi Yesu mu mulomba dyambu dimosi. 21 Yesu wumufuula ti: «Nki tiidi e?» Wumuvutudila ti: «Sa ti baala bani ya babole bebaba bazakala ha ndambu aku, wumosi ku kooko kwaku kulumoso na wuhiika ku kooko kwaku ku lubakala mu kimfumu kyaku.» 22 Yesu wuvutula ti: «Luzebi mi luna ndomba ko. Lulendi nwa mbungu yi naanwa meno e?» Bamuvutudila ti: «Tulendi ye nwa.» 23 Wubateela ti: «Wu makedika, mbungu ani ya lwaanwa. Kansi ka meno ko nina luve mu zenga nani lendi zakala ku kooko kwani ku lumoso mpe ku kooko kwani ku lubakala. Bibuka bebyobyo bidi bi yobobo Tata ani ba kakubikila byo.»

24 Bu bayuwa bobo, milongoki kumi mihiika mifwemina mpangi za zizole. 25 Yesu wubatumisa na wubateela ti: «Luzebi ti Mfumu zi zinsi zikwe bayaalanga mu ngolo zimvimba, mpe minyadi mikwe bayenisanga mpasi zizingi. 26 Kansi kaabubelandi bobo mu yeno. Yondowo tiidi mu ba muntu wumfunu ha kati dyeno ka ba kisadi kyeno, 27 na yondowo tiidi mu ba wuntete ha kati dyeno ka ba mundongo eno: 28 bwabobo mpe, Mwana Muntu ka yizidi ko ku bantu mwanki ba mu sadila, kansi mu sadila bantu na mu haana luzingu andi bonso mufutu mu kuula bantu babingi.»

29 Yesu na milongoki myandi bu bedi duuka mu mbanza yi Yeliko, kamba di bantu dibalanda. 30 Mpofo zole ziba zi zakala ha ntendo yi nzila, bu bayuwa ti Yesu wuna hyoka, batona mu bulana ti: «[Mfumu], Mwana Davidi, tufwila nkenda!» 31 Kamba di bantu dyedi ba bamina mwanki bakanga minwa myawu, kansi babulana dyaka mungolo ti: «Mfumu, Mwana Davidi, tufwila nkenda!» 32 Yesu wutelama, wubatumisa na wubafuula ti: «Nki lutidi na lusila e?» 33 Bamuvutudila ti: «Mfumu, sa ti meso meto mazibuka!» 34 Yesu wubafwila nkenda, na wusimba meso mawu, hansi na nsi, batona mu bwesa yena, na bamulanda.