1 Mu ntangu beyoyo, Elode munyadi mu Ngalili, wuyuwa nsangu zi Yesu. 2 Na wuteela bisadi byandi ti: «Ni Yoane Mumbotiki: wufulukidi mu bafwa! Ni hahoho kaa na lulendo mu sa bimangu.»

3 Mu dyambu ti Elode wukangisa Yoane, bamumbidika syeni na bamutuula mu boloko. Mu dyambu di Elodiade, mukento wu mpangi andi Filipi. 4 Kadi Yoane wuteela Elode ti: «Wuu na luve ko mukwela Elodiade!» 5 Elode wedi sosanga mu hondisa Yoane, kansi wedi yenanga mukangu bunkuta, mu dyambu ti bedi bongilanga Yoane bonso mumbikudi.

6 Mu kilumbu ki mukembo wu mbutukulu yi Elode, mwana wu Elodiade wu mukento wukina ha ntadisi yi bantu ba katumisa ku mukembo andi. Wutoma yangidika Elode, 7 mboki Elode ni kadya ndefi mu muhaana kyonso kima ki kaamulomba. 8 Mu nsindusulu yi ngudi andi, wulomba ti: «Mpana, butusidi bubu, mutu wu Yoane Mumbotiki mu ndonga!» 9 Ntinu wukota mu kyadi, kansi mu dyambu di ndefi yi kadya ha meso ma bantu ba katumisa ku mukembo andi, wutuma ba mutwadila wo. 10 Wutambika muntu mu kwe tabula mutu wu Yoane Mumbotiki mu boloko. 11 Batwala mutu andi mu ndonga, na bahaana wo ku mwana ndumba, ni kanata wo ku ngudi andi. 12 Milongoki mi Yaone bayiza bonga nitu andi na bazika yo, mboki bayenda yadila Yesu mpolo.

13 Yesu bu kayuwa musamu bewowo, wukatuka hoho na wukota mu mulungu, wuyenda ha kibuka kilembolo ba bantu. Kansi mpumbu zi bantu bu bayuwa wo, basisa zimbanza zawu na bamulanda mu malu. 14 Bu katotoka mu mulungu, wuyena mpumbu yiyinene yi bantu. Wukota mu kyadi, na wunyakisa zimbevo zawu.

15 Nkokila bu yitula, milongoki mifinama ha kabela na mi muteela ti: «Bwisi butonini mu yila, mboki kibuka kitudi ha kima ko. Vutula bantu bamvimba mwanki benda mu mabwala mu sumba bima bye dya.» 16 Yesu wubavutudila ti: «Ka nkinzi ko ti Benda, bahaaneeno yeno bende bindya!» 17 Kansi bamuvutudila ti: «Mampa matanu na mbizi zole kwandi zi neto.» 18 Yesu wubateela ti: «Ntwadileno byo ehaha.» 19 Mboki, wutuma ti bantu bazakala ha yulu bititi, wubonga mampa ma matanu na mbizi zole, wusendola meso ku yulu ni kasakumuna byo. Bu kamana bye bukuna ni kahaana byo ku milongoki myandi mwanki bakabula ku mpumbu zi bantu. 20 Bamvimba badya, bayukuta, na batota mikuta kumi na myole mi baludisa mu bibuku bisadila. 21 Bantu ba dya, baba kampe mafunda matanu ma babakala, kondo mutanga bakento na baala bafyoti.

22 Mboki kumanima, Yesu wutuma ku milongoki myandi bakota mu mulungu na batekila ku simu dihiika, mu ntangu yi kedi vutula mpumbu yi bantu. 23 Bu kamana bavutula, wutomboka ha yulu mulandu mu sambila. Bwisi bu buyila, wuba hoho yandi kaka. 24 Mulungu wuba nkatika kitatu na kumu, wuningusu mu bipo bimamba, mu dyambu ti kitembo kingolo ki babwana. 25 Mu minkyelo mi bwisi, Yesu wuyenda ku ndambusu yi bela milongoki myandi na wedi kwe dyati ha mukanda mamba. 26 Bamilongoki bu bamuyena wuna kwe dyati ha mukanda mamba, bayena bunkuta bubwingi na bata ti: «Wu mukuyu wudi!» Na mu bunkuta bebobo yawu babulana. 27 Kansi Yesu wutumbu bateela ti: «Lwateeno kibakala! Meno kwani, lubandi na bunkuta ko!» 28 Petelo wumuteela ti: «Mfumu, tala ti ngeye wudi, tuma niza ku wudi ha mukanda mamba.» 29 Yesu wumuteela ti: «Yiza!»

Petelo wutotoka mu mulungu na wedi kwe dyati ha mukanda mamba mu kwenda kubela Yesu. 30 Kansi bu kayena ti kitembo kina kukula mungolo, wubaka bunkuta. Na wutona mu dyama, wulookana ti: «Mfumu, mvuukisa!» 31 Yesu wutumbu lambula kooko, wumusimba na wuta ti: «Ngeye muntu wu kiminu kifyoti wudi! Bila nki sididi maketiketi e?» 32 Ya babole bu bamaka mu mulungu, kitembo ki dingama. 33 Yobobo baba mu mulungu bafukama ha ntadisi yi Yesu na bata ti: «Nkatika, ngeye wu Mwana Nzambi!»

34 Bu bamana sabuka dyanga, batula ku kizunga ki Ngenezaleti. 35 Bantu ba kizunga bekyokyo babakula Yesu ni bayenda mwangisa nsangu zi nyizulu andi mu kizunga kimvimba. Mboki bamutwadila zimbevo zimvimba. 36 Bamubombidila mwanki basimba kwandi mu sukina kinkutu kyandi. Bantu bamvimba basimba kyo, banyaka.