1 Bilumbu bisambanu bihyoka, Yesu wubonga Petelo, Zaki na Yoane mpangi andi, na wubanata ha lweka ku yulu mulandu wuwula. 2 Wukituka ha ntadisi awu, kini kyandi kyedi lezima bonso ntangu, na binkutu byandi bikituka na vekoveko bonso kya. 3 Bu bayitukulu kwawu, Eliya na Mose bayenika na bedi mokana nandi. 4 Petelo wuteela Yesu ti: «Mfumu, bumbote ti tuzakala haha. Tala ti tiidi, nina tunga zinzo zitatu zi bikapu, yimosi yi yaku, yimosi yi Mose na yimosi yi Eliya.» 5 Bu kedi zonza bobo, tuti dimpembe dyedi lezima diyiza bafuka. Mpe ndinga yimosi yi yuwakana ku nsye tuti: «Yandi ewu ni mwana ani wu ntomini tya, kyese kyani kimvimba mu yandi kidi. Muyuwileeno!»

6 Milongoki bu bayuwa ndinga beyoyo, bayena bunkuta bubwingi, ni bafulamana kini ha nsi. 7 Kansi Yesu wufinama, wubasimba na wubateela ti: «Telameeno, luyenandi bunkuta ko!» 8 Bu basendola meso, bayena Yesu yandi kwandi kaka.

9 Mu ntangu yi bedi kulumuka mulandu, Yesu wubahaana ntumunu eyi: «Luteelandi misamu mi luyeni ku kani muntu ko, natee Mwana Muntu bu kaafuluka mu bafwa.»

10 Mboki, milongoki mifuula Yesu ti: «Bila nki milongisi mi Misiku mikwe teelanga ti Eliya fweti kwiza ntete e?» 11 Wubavutudila ti: «Wu kedika wudi ti Eliya fweti kwiza mu sungika misamu bemimi mimvimba. 12 Kansi meno nina luteela ti: Eliya wuyiza, na bamubakudi ko, bamuhidika misamu mi batya mu muhidika. Bwabobo mpe yawu baayenisina Mwana Muntu mpasi.» 13 Mu kilokola bekyokyo, milongoki mibakula ti ni Yoane Mumbotiki kedi bazonzila.

14 Bu batula huma habeela mpumbu yi bantu, bakala dimosi diyiza fukama ha ntadisi yi Yesu, 15 na wuta ti: «Mfumu, fwila mwana ani wu bakala nkenda. Kimbevo kinzyeta kii nandi mpe wuna kwamusu bubwingi: sungula kwe bwanga ku tiya na mu mamba. 16 Namutwedi ku milongoki myaku, kansi balembakani mu munyakisa.» 17 Yesu wuta ti: «Mbandu yi bantu balembolo ba na kiminu na bambi! Ntangu zi kwa naaba neeno e? Mpe ntangu zi kwa naaluvibidila e? Mutwaleeno ehaha.» 18 Yesu wubamina mpeve yimbi, mpeve yimbi yiduuka mu mwana, mboki mwana wunyaka hansi na nsi.

19 Buna milongoki mifinama ku Yesu, na mimufuula ha lweka ti: «Bila nki yeto tulembakani mu kuma mpeve yimbi beyoyo e?» 20 Yesu wubateela ti: «Mu dyambu ti kiminu kyeno kifyoti kidi. Kedika nina luteela: Tala ti luna kiminu ki bonso nswanga yi mwa muti wu mutaade, lulenda tuma mulandu bewuwu ti: "Katuka ehaha, na yenda ekuna", na waakatuka. Kunani kima ki lulenda lembakana. [21 Kansi mu lusambulu na mu minunu yi nsoki kaka mpeve yimbi beyiyi yilenda duukila.»]

22 Kilumbu kimosi, bu bayenda kutakana ku Ngalili, Yesu wuteela milongoki myandi ti: «Baayekola Mwana Muntu mu moko ma bantu: 23 baamuhonda, kansi kilumbu kitatu waafuluka.» Milongoki mitoma yena kyadi kikingi.

24 Bu bayenda tula ku mbanza Kapenawumi, yobobo bedi totanga mpaku yi nzo-Nzambi bafinama ku Petelo na bamuteela ti: «Bila nki, Mulongisi eno kakwe lembolo futilanga mpaku yi nzo-Nzambi e?» 25 Petelo wuvutula ti: «Ninga, ya kakwe futanga.» Mu ntangu Petelo yi kedi kota mu nzo, Yesu wumutekidila muzonza mu muteela ti: «Simoni, bwedi wuna banzila e? Nani fweti futa mpaku ku zintinu zi ha nza beyiyi e? Bisi-nsi hoti banzenza e?» 26 Petelo wumuvutudila ti: «Banzenza.» Yesu wumuteela ti: «Bisi-nsi balendi futa mpaku ko. 27 Kansi mulembolo batesisa masakuba, yenda ku mubu, loosa ndoba mu mamba, mboki bonga mbizi yintete yi waabaka, na muzibula munwa andi: waayena kima kimosi, kii mbongo zi bisengo. Bonga zo, na yenda bahaana zo, mwanki wufuta mpaku yi yani na yi yaku.»