1 Yesu bu kayena mukangu, wutomboka ha yulu mulandu, wuzakala. Milongoki myandi miyiza ha kabela, 2 mboki wutona mu balonga ebu:

3 «Kyese ku yobobo ba bamputu mu kimpeve,

kadi kimfumu ki mazulu kyawu kidi!

4 Kyese ku yobobo bana dila, kadi bana bombwa!

5 Kyese ku yobobo ba na lembami, kadi bana tambula nsi yi lusila Nzambi nsilulu!

6 Kyese ku yobobo bana yena nsatu na mpwila yi lunungu, kadi bana yukutusu!

7 Kyese ku yobobo bakwe fwilanga bahiika nkenda, kadi Nzambi waabafwila nkenda!

8 Kyese ku yobobo bana mitima mivedila, kadi bana yena Nzambi!

9 Kyese ku yobobo bakwe tukisanga kiyenge, kadi bana batumisina baala ba Nzambi!

10 Kyese ku yobobo ba ku nsye mfyetokoso mu dyambu di lunungu, kadi Kimfumu ki Mazulu kyawu kidi!

11 Kyese ku yeno ti bana lutuka, bana lufyetikisa, na bana luhunina misamu mimvimba mimbi mu dyambu dyani.

12 Yangalaleeno mu kilumbu bekyokyo na duzumukeeno mu kyese, mu dyambu ti musendo eno waaba wuwunene ku mazulu. Bwabobo mpe bedi zominanga mimbikudi mi lutekidila.»

13 «Yeno bonso munga wu nza ludi. Kansi, tala ti weka na zubulu, bwedi tulendi we vutudila nzenzo e? Wusidi dyaka kisalu ko, mbote bu balosidi wo ku mbazi na bantu badyeti wo.»

14 «Yeno bonso kya ku nza ludi. Mbanza yidi ha yulu mulandu yilendi swekama ko. 15 Bakwe lemisanga mwinda mu tuula wo ku nsye kisiku ko. Kansi bafweti we tentika ha yulu kitentokolo ki mwinda, mwanki ka kyenzola bantu bamvimba ba mu nzo. 16 Ni hahoho, bika mwinda eno wulezima ha ntadisi yi bantu, mwanki bayena mavanga meno mambote na bazitisa Tata eno wu ku mazulu.»

17 «Lubanzandi ko ti meno nayizidi mu katula Misiku mi Mose na mambu ma mimbikudi. Nayizidi mu katula myo ko, kansi mu lungisa myo. 18 Kedika nina luteela: tekila yulu na butoto bihyoka, nakani kisono kimosi kifyoti hoti mwa kima kivudi bukeke ki musiku kilendi katuka ko, natee mimvimba bu milungidi. 19 Ni hahoho, wonso waatinguna mwa musiku wuvudidi bukeke, na waalonga ku bantu mu hidika bo, yandi waaba muntu wuvudidi bukeke mu Kimfumu ki mazulu. Kansi wonso waavumina na waalonga ku bantu bahiika bavumina wo, yandi waaba muntu wuwunene mu Kimfumu ki mazulu. 20 Meno nalutedidi ti: tala ti lunungu lweno lu hyokidi lu Bafalisi na milongisi mi Misiku ko, yeno lwaakota mu kimfumu ki mazulu ko.»

21 «Yeno luyuwa ti zinkaka zeno zi ta ebu: "kuhondandi ko, wonso waahonda munandi muntu fweti fundusu ha ntadisi yi ba mimfundisi." 22 Kansi meno nalutedidi ti wonso muntu waabakila munandi mankesi fweti fundusu ha ntadisi yi ba mimfundisi, wonso muntu waatuka munandi ti "kihulu" fweti fundusu ha ntadisi yi kimvuka ki bakuluntu ba Bayudayo, na wonso waamuteela ti: "Kilawuki" fweti tubu ku tiya tu mbungulu. 23 Tala ti wenzi haana munkayulu aku ha ziku di bakwe yokilanga munkayulu, mboki bambukidi moyo ti musamu wu naaku na mpwanaku, 24 teka bika ntete munkayulu aku hoho, ha mutwala wu ziku di bakwe yokilanga munkayulu, yenda wuyuwasana na munaku, mboki vutuka wuhaana munkayulu aku ku Nzambi. 25 Tala ti wuna kwenda na mutantu aku mu nzila, yuwasaneeno bu lwakidi mu nzila, mwanki kalembolo kuyekola mu moko ma mumfundisi. Mpe mumfundisi kakuyekola mu moko ma mbulumbulu, mboki mbulumbulu waakutuula mu boloko. 26 Kedika nina kuteela, wulendi duuka mu boloko ko, tala ti kumeni mu futa mfuka aku ko, natee ku mbongo yi kisengo yimanunu.»

27 «Yeno luyuwa ba ta ti: "Kusadilandi kinsuza ko." 28 Kansi meno nina luteela ti: wonso muntu waatala mpe waazinina mukento wu munandi, sidi kinsuza nandi mu kati di mutima andi. 29 Tala ti diisu dyaku dilubakala dina kubwisanga mu masumu, katula dyo na loosa dyo kitatu naku, mu dyambu ti bumbote ku ngeye mu katulu kinama kimosi kwandi ki nitu aku, na mu bika ti nitu aku yimvimba yitubu ku tiya tu mbungulu. 30 Tala ti kooko kwaku kulubakala kukwe kubwisanga mu masumu, tabula ko na loosa ko kitatu naku, mu dyambu ti bumbote ku ngeye mu katulu kinama kimosi kwandi ki nitu aku, na mu bika ti nitu aku yimvimba yitubu ku tiya tu mbungulu.»

31 «Ebu ba ta dyaka ti: "Dyonso bakala dyaakuma mukento andi fweti muhaana mukanda wu mfwilu yi makwela." 32 Kansi meno nina luteela ti: dyonso bakala dyaakuma mukento andi ku makwela, tala ti ka mu dyambu di kinsuza ko, wakasindikidi ka sadila kinsuza, mpe dyonso bakala dikwedidi mukento wuba kumini ku makwela, sadidi mpe kinsuza.»

33 «Yeno luyuwa ba ta dyaka ku zinkaka zeno ti: "Kudyandi ndefi yi walembolo vumina ko, kansi lungisa mimvimba mi wudididi ndefi ha ntadisi yi Mfumu." 34 Kansi meno nina luteela ti: kamudyanga ndefi: mu nkumbu yi yulu ko, mu dyambu ti kyandu ki kintinu ki Nzambi kidi, 35 ka mu nkumbu yi butoto ko, mu dyambu ti butoto ni kifulu kikwe tentikanga Nzambi bitambi byandi, ka mu nkumbu yi Yelusalemi ko, kadi Yelusalemi ni mbanza yi Ntinu yiyinene. 36 Kudilandi mpe mutu aku ndefi ko, mu dyambu ti wulendi kitula ka mulengi wumosi wu mutu aku wumpembe hoti wundombe ko. 37 Bika mpova eno yiba ninga tala ti "ninga", kaani tala ti "kaani", misamu mimvimba mi waatentika ha yulu mikwe fumanga ku Munga Mbi.»

38 «Yeno luyuwa ba ta ti: "Muntu kamana kutobola diisu, ngeye mpe mutobola dyo, na kamana kukatula dinu ngeye mpe mukatula dyo." 39 Kansi meno nina luteela ti: "Luvutulandi mbi mu mimbi ko. Tala ti muntu wukubendi mbata ha bundi di mimbakala, mutambila mpe dihiika. 40 Tala ti muntu tiidi mu kwe kufunda ha ntadisi yi mumfundisi mwanki ka kubonga kinkutu kyaku, bika kabonga mpe kiyunga kyaku. 41 Tala ti muntu wukukwikisi mu kwenda kilometele kimosi, yenda nandi kilometele zole. 42 Haana ku yondowo wu kulombidi kima, kubisandi mu defisa kima ku muntu wu kulombidi kyo."»

43 «Yeno luyuwa ba ta ti: "Fweti zola mfinangani aku na fweti bela mutantu aku." 44 Kansi meno nina luteela ti: zoleeno mitantu myeno na sambidilangeeno bakwe lufyetikisanga. 45 Ni bwabobo lwaabela baala ba Tata eno di ku mazulu. Mu dyambu ti yandi kwe teekisanga mwini ku bantu bambote na bambi, mpe kwe nokisanga mvula ku bantu ba ludedomo na balembolo ba na ludedomo. 46 Ti lutiidi kwandi bakwe lutyanga, nkye ndandu lwaabaka e? Mitoti mimpaku mpe bwabobo kwandi bakwe sanga. 47 Tala ti zimpangi zeno kwandi lukwe haananga mbote, nkye dyambu dingitukulu lukwe hidikanga e? Balembolo ba Bayudayo mpe bwabobo kwandi bakwe sanga. 48 Bwabu beno bantu balunga, bonso Tata eno di ku mazulu wudi wulunga.»