1 Yesu bu kamanisa mu haana ndwengosolo andi ku milongoki myandi kumi na myole, wukatuka hoho na wuyenda mu longa na mu samuna Musamu Wumbote ku zimbanza zi kizunga.

2 Yoane bu kayuwa mu boloko, nsangu zi Klisto na mimvimba mi kedi kwe hidiki, wufila milongoki myandi, 3 mu kwe mufuula ti: «Kadi ngeye ni muntu bewowo waakwiza, hoti tufweti kingila wuhiika e?» 4 Yesu wubavutudila ti: «Yendeeno luyaala mpolo ku Yoane mu mimvimba mi luyeni na mi luyudi: 5 zimpofo zena yena, bana byeta mu malu bana dyata bumbote, banga bwazi bana vedoso, bafwa makutu bana yuwa, bafwa bana fuluka, na Musamu Wumbote wa bana samuna ku bamputu. 6 Kyese ku muntu walembolo bika kiminu kyadi mu dyambu dyani!»

7 Milongoki mi Yoane bu bavutuka, Yesu wutona mu zonzila Yoane ku mpumbu yi bantu na wubafuula ti: «Nani luyenda tala ku nsi yinkatu e? Dyadya dyedi ningusu ku mupepe e? 8 Nani kwandi luyenda tala e? Muntu wuba wulwata binkutu bintoko e? Bantu bakwe lwaatanga binkutu bintoko mu zinzo zi zintinu bakwe zinganga. 9 Kadi nani kwandi luyenda yena ku nsi yinkatu e? Mumbikudi e? Ninga, meno nina luteela ti, yandi hyokidi mumbikudi.» 10 Mu dyambu di Yoane basonikina ti:

«Nina tambika ntumwa ani ku mutwala aku,

mu ku kubikila *nzila.»

11 Kedika nina luteela, mu bantu bamvimba ba ha nza, kunaani muntu wu hyokidi Yoane Mumbotiki mfunu. Kansi, wumuvudi bu fyoti mu Kimfumu ki Nzambi, yandi wumuvudidi bunene. 12 Kutonina mu ntangu yi Yoane Mumbotiki natee mu kilumbu kibubu, Kimfumu ki mazulu kina kwamusu mu zimvita, ni yobobo bavudi ngolo bana bonga kyo. 13 Mimbikudi mimvimba na Misiku mi Mose mi samuna Kimfumu ki Nzambi natee mu ntangu yi Yoane. 14 Tala ti lulendi we tambula, Yoane ni Eliya wu basamuna ti waakwiza. 15 Wonso wuu na makutu mu yuwa, bika kayuwa!

16 «Na nani ndendi fwanikisa bantu ba mbandu beyiyi e? Bafwanakani na baala bafyoti bazakadi mu byanzala, mboki bana teela ku baala bahiika ti:

17 "Yeto tusikidi tutu,

kansi yeno lukinini ko!

Yeto tuyimbidi mikunga mi kyadi,

kansi yeno ludididi ko!"

18 Yoane bu kayiza, kedi dyanga ko, mpe kedi nwanga ko, kansi yeno luta ti: "Mpeve yimbi yi nandi!" 19 Mwana Muntu wizidi, wuna dya, mpe wuna nwa, kansi luna ta ti: "Taleeno kweno muntu bewuwu, kidye na kinwe kidi, nkayi zandi ni mitoti mimpaku na minsumuki!" Kansi ndwenga zi Nzambi zikwe yenikanga zidedama mu mavanga mandi.»

20 Buna Yesu wusemba zimbanza zi kasila bimangu bibingi, mu dyambu ti zivilula madyela ko. Wubateela ti: 21 «Kyadi ku ngeye, Kolazine! Kyadi ku ngeye, Betesayida! Mu dyambu ti bimangu bihilama ku yeno ni bihilama ku Tile na ku Sidoni, nganunu ntama balwata nsaku na bayobila bombe, mu lonka ti baviludi madyela. 22 Ni hahoho, kilumbu kyaaba mfundusu, kitumbu ki lwaabaka kyaavudila ngolo na ki zimbanza yi Tile na Sidoni. 23 Ngeye Kapenawumi, wuna banza ti baakuzangula natee ku yulu e? Kani, baakukulula natee ku nsi yi bafwa! Mu dyambu ti bimangu bihilama ku kweno ni bihilama ku Sodomo, nganunu mbanza beyoyo yakidi natee kilumbu ki bubedidi. 24 Ni hahoho, nina luteela ti, mu kilumbu kyaaba mfundusu, kitumbu ki lwaabaka kyaavudila ngolo na ki mbanza yi Sodomo.»

25 Mu ntangu beyoyo, Yesu wuta ti: «Nina ku kembila, Tata, Mfumu yi yulu na butoto, mu dyambu ti zabikisi ku mwa baala bafyoti misamu bemyomyo mi wusweka ku bandwenga na ku banga madyela. 26 Ninga Tata, mu dyambu ti ngeye bwabobo wutidi bubela.

27 Tata ani wumpeka bima bimvimba. Kunani muntu zebi Mwana, tala ti ka Tata ko, mpe kunaani muntu zebi Tata tala ti ka Mwana ko, na ku yondowo Mwana katiidi mu muzabikisa.

28 Yizeno ku meno, yeno bamvimba lu balebakana mu dyambu di bizitu, meno nina luhaana mvundulu. 29 Lwaateeno ntumunu ani na tambuleeno ndongosolo zani, meno nidi wulembama mpe nidi na mutima wukuluka, mboki meno nina haana mvundulu ku myela myeno. 30 Mu dyambu ti ntumunu ani yilembama yidi, na kizitu kyani kilenga kidi.»