1 Yesu bu kamanisa mu zonza misamu bemyomyo mimvimba, wuteela milongoki myandi ti: 2 «Luzebi ti bilumbu byole kwandi bisidi mu kembila mukembo wu Pake, na Mwana Muntu waayekolo mwanki baamukoma ha kulunsi.»

3 Ni hahoho, zimfumu zinganga-Nzambi na mbuta zi bantu zi Bayudayo bakutakana ku nzo yi Kayifa, nkuluntu yi zinganga-Nzambi, 4 babonga nzengolo mu kangusu Yesu mu madyela, mwanki ba muhonda. 5 Kansi bata ti: «Tumukangandi ha kati di mukembo ko, mwanki mukangu wulembolo nangumuka.»

6 Yesu bu kaba ku Betani, ku nzo yi Simoni, yondowo wubela kimbevo ki bwazi, 7 mu ntangu Yesu yi kaba ha meza, mukento wumosi wuyenda ha ntadisi andi, wuba na mbwata yi alabati yifuluka mu mananasi mantalu, na wumubulumuna mo ha yulu mutu. 8 Milongoki myandi bu bayena bobo, bafwema na bata ti: «Bila nki mu fukisa mo e? 9 Nganunu kuteka batekidi mo mu ntalu yiyingi, mboki baheeni mbongo ku bamputu!»

10 Yesu wubakula mayindu mawu, wubateela ti: «Bila nki luna kwamisina mukento bewuwu e? Musamu wu kampidikidi nkatika wumbote wudi. 11 Mu dyambu ti bamputu baaba neeno ntangu zimvimba, kansi meno naaba neeno ntangu zimvimba ko. 12 Mukento bewuwu bulumuni mananasi mu nitu ani, mu nkubikila nzikulu ani. 13 Kedika nina luteela, mu nza yimvimba, konso ku baasamuna musamu wumbote bewuwu, mbo bazonzila mpe musamu wumpidikidi mukento bewuwu mu mubambukila moyo.»

14 Ku manima, wumosi ha kati di milongoki kumi na myole, yondowo wuba kwe tumisinanga ti Yuda Isikalyoti, wuyenda ku bakuluntu ba zinganga-Nzambi 15 na wubateela ti: «Nki lwaampana tala ti naaluyekodidi Yesu e?» Buna bamuhaana makumatatu ma mbongo zi bisengo. 16 Kutona kilokola bekyokyo kwandi, wusosa bwedi kalendi bayekodila Yesu.

17 Kilumbu kintete ki mukembo wu mampa ma kiputi kilembolo vimba, milongoki miyiza fuula Yesu ti: «Kwedi tiidi tukukubikila bindya bi Pake e?» 18 Wuvutula ti: «Yendeeno ku mbanza, ku nzo kingandi. Muteeleeno ti: "Mulongisi ebu kateedi: Kilokola kyani kyeka lukufi, ku nzo aku naakembidila Pake na milongoki myani."» 19 Milongoki mihidika mimvimba mi bateela Yesu, ni bakubika Pake.

20 Mpimpa buyitula, Yesu wuba na milongoki kumi na myole ha meza. 21 Bu bedi dyanga, wubateela ti: «Kedika nina luteela, wumosi ha kati dyeno waanyekola.» 22 Milongoki miyena kyadi kikingi, na wumosi-wumosi wutona mu mufuula ti: «Mfumu, kadi ni meno e?» 23 Wuvutula ti: «Yondowo waatuula nani kooko mu ndonga, yandi waanyekola. 24 Mwana Muntu waafwa, bonso budi busonama mu yandi. Kansi nkya mpila kyadi ku muntu bewowo waamuyekola. Buba bumbote ku muntu bewowo mulembolo butuka.» 25 Yuda, yondowo wedi mu yekola, wufuula ti: «Mulongisi, kadi ni meno e?» Yesu wumuvutudila ti: «Ngebende teedi wo.»

26 Mu ntangu yi bedi dya, Yesu wubonga dimpa, bu kamana vutula matondo, wubukuna dyo na wuhaana dyo ku milongoki myandi, wuta ti: «Bongeno na dyeno, yi ni nitu ani.» 27 Mboki wubonga mbungu, bu kamana vutula matondo, wubahaana yo, wuta ti: «Nweno yo yeno bamvimba, 28 ma ni menga mani, menga ma luwawanu lumona, matengolo mu bantu babingi, mu dyambu di ndemvokolo yi masumu. 29 Wukedika nina luteela, naabwesa nwa dyaka vinu ko, natee kilumbu ki naanwa vinu dinsonso mu Kimfumu ki Tata ani.» 30 Bu bamana yimbila mikunga, baduuka mu kwenda ku ndambusu yi mulandu wu Olive.

31 Buna Yesu wubateela ti: «Mu mpimpa beyiyi kwandi, yeno bamvimba lwaabwa, mu dyambu ti wusonama: "Naahonda mumvungi wu mameme, mpe kamba dimvimba di mameme dyaamwangana."

32 Kansi bu naafuluka mu bafwa, naalutekidila ku kizunga ki Ngalili.» 33 Petelo wumuteela ti: «Kati bamvimba bakusisidi, meno kilendi saala kusisa ko!» 34 Yesu wumuteela ti: «Kedika nina kuteela: Mu mpimpa yi bubedidi kwandi, nsusu ya kikubila ko, ngeye waambisa nkumbu tatu.» 35 Petelo wumuteela ti: «Kati kufwa, naafwa naku, meno ndendi saala kubisa ko!» Mpe bamvimba bata bobo.

36 Ku manima, Yesu wutula na milongoki myandi ha kibuka ki bakwe tumisinanga ti Ngetesemane, na wubateela ti: «Zakaleeno ehaha, meno bu nina kwenda ehane mu kwe sambila.» 37 Mboki wubonga Petelo na baala ya babole ba Zebedayi. Wutona muyena kyadi na kingongo. 38 Buna wubateela ti: «Nkatika kyadi kikingi nina yena mu mutima ani mu dyambu di lufwa, saleno ehaha na kayeno meso nani.» 39 Mboki wuyenda mwa kitatu, mpe wufukama na wutula luse lwandi ha nsi mu sambila, na wuta ti: «Tata ani, tala ti bulendi ba, ntatudila mbungu beyiyi. Kansi, ka bonso bu natidi ko, kadi sa bonso buu luzolo lwaku.» 40 Bu kavutuka ku kasisa milongoki myandi, wuyenda babwana ku nsye tolo, na wuteela Petelo ti: «Lulembakani mu kaya meso ka mwa kilokola kimosi nani e? 41 Kayeeno meso na sambileeno mwanki lu lembolo bwa mu ntontolo. Mpeve yii na kinzodila, kansi nitu yii na lebakani.»

42 Wuyenda dyaka mwa kitatu nkumbu yinzole na wusambila ebu: «Tata ani, tala ti bulendi ba, ntatudila mbungu beyiyi mwanki na lembolo ye nwa, bika ti luzolo lwaku luhilama!» 43 Mboki wuvutuka dyaka kubela milongoki myandi, na wuyenda babwana ku nsye tolo, meso mawu maba nkatika kizitu beni mu tolo. 44 Yesu wusala basisa dyaka, wuyenda mwa kitatu mu sambila mu nkumbu yi tatu, wubwesa ta dyaka misamu bemyomyo kwandi. 45 Mboki wuvutuka kubela milongoki myandi, na wubateela ti: «Lutatamani kweno mu bwa tolo na luna huma kweno e? Bwabu kilokola kifweni, Mwana Muntu wabayekodi bwabu mu moko ma minsumuki. 46 Telameeno, twendeeno, yondowo wuna nyekola tudidi!»

47 Kakimanisina mu zonza ko, Yuda, wumosi mu milongoki kumi na myole wutula na mpumbu yi bantu yi ba na mbele zi zimvita, mpe na bibono. Babatambika ku zimfumu zinganga-nzambi na zinkuluntu zi Bayudayo. 48 Yuda, yondowo wedi yekola Yesu, wubahaana kidimbu eki: «Yondowo wu naafiba, ni yandowo, mukangeeno.» 49 Buna wuyenda ha ntadisi yi Yesu na wumuteela ti: «Mbote Mulongisi!» Na wumufiba. 50 Yesu wumuteela ti: «Nkayi ani, musamu wu wizi hidika, hidika wo.» Buna bafinama, basimba Yesu, ni bamukanga. 51 Wumosi mu yobobo baba na Yesu kintwadi wuduukisa mbele yi mvita, na wukata mundongo wu mfumu yi nganga-Nzambi, na wumuzenga kutu. 52 Yesu ni kamuteela ti: «Vutula mbele yi mvita mu lukutu lwandi, mu dyambu ti bantu bamvimba bakwe nwaninanga mu mbele yi mvita mu mbele yi mvita mpe baafwila. 53 Wuzebi ko ti ndendi bombidila Tata ani ka nsadisa, mpe waantambikila, hansi na nsi, zimbazi zizingi kuhyoka lutangu lu mpumbu kumi na zole e? 54 Bwedi mambu masonama maakwendila detila, mo mana ta ti: bufweni bubela bobo e?»

55 Mboki, Yesu wuteela mpumbu yi bantu ti: «Kadi kimpumbulu nidi, mwanki lwiza lunkanga na mbele zimvita na bibono e? Bilumbu bimvimba nabedi neeno mu nzo-Nzambi mu lulonga, na lusosidi mu mbwila ko.» 56 Kansi mimvimba bemimi mina hilama, mwanki misamuna mimbikudi myenda detila. Buna milongoki mimvimba misala musisa na miwoka.

57 Bantu bebobo ba kanga Yesu, bamunata ku nzo yi mfumu yi zinganga-Nzambi, Kayifa, kumana kutakana milongisi mi Misiku na zimbuta zi Bayudayo. 58 Petelo wedi kwe mulandi mwa kitatu natee ku nzo yi mfumu yi zinganga-Nzambi. Wukota ku lupangu na wuzakala na minkebi, mu tala bwedi musamu bewowo waamanisina.

59 Zimfumu zinganga-Nzambi na kimvuka ki bakuluntu ba Bayudayo basosa kimbangi ki luvunu mu Yesu, mwanki bamuzengila lufwa, 60 kansi bamubakila kyo ko, mpeleko bantu babingi bayiza ta bimbangi bi luvunu. Ku manima, bantu bole bayiza 61 na bata ti: «Muntu bewuwu wuta ti: "Ndendi bula nzo-Nzambi, na kutunga yo dyaka mu bilumbu bitatu."» 62 Mfumu yi zinganga-Nzambi wutelama na wuta ku Yesu ti: «Wuna vutula mvutu ko e? Nkye mvutu wuna vutula mu kimbangi ki kibena ta mu dyambu dyaku e?» 63 Kansi Yesu wuba na swii. Mfumu yi zinganga-Nzambi wumuteela ti: «Mu nkumbu yi Nzambi yi moyo, nina kulomba wututeela ti ngeye ni Klisto, Mwana Nzambi!» 64 Yesu wumuvutudila ti: «Ngeye wuna ta wo. Kansi nina luteela ti: tuka ntangu beyiyi, lwaayena Mwana Muntu wuzakadi ku kooko ku lubakala lu Nzambi yi lulendo na wuna kwiza mu matuti maa ku yulu.» 65 Mboki mfumu yi zinganga-Nzambi wutumbu kakuna binkutu byandi na wuta ti: «Nzambi kasafudi! Tusidi dyaka na nsatu yi zimbangi ko! Yeto bende tuyudi bwedi kasafudidi Nzambi. 66 Bwedi luna banzila e?» Bavutula ti: «Kufwa kafweti fwa.» 67 Mboki bedi mulobodila mante ku luse na bedi muzuba bikoti, bahiika bedi mukaata zimbata 68 bedi muteela ti: «Klisto! Tubikudila, tuteela nani wukuzubidi!»

69 Petelo wuzakala ku kati di lupangu ha mbazi. Kisadi kimosi ki mukento kiyenda ha kabela na wumuteela ti: «Ngeye mpe, na Yesu, mwisi-Ngalili lubedi.» 70 Kansi wubisa ha meso ma bantu bamvimba, na wuta ti: «Nazebi ko bwedi wuna saka ta.» 71 Mboki wuyenda ku ndambu yi mwelo wu lupangu. Kisadi kihiika ki mukento ki muyena na wuta ku yobobo baba hoho ti: «Muntu bewuwu na Yesu mwisi-Nazaleti babedi.» 72 Na Petelo wubisa kwandi dyaka na wudya ndefi na wuta ti: «Bakala bedyodyo namuzebi ko!»

73 Mwa ntangu fyoti kwa yihyoka, yobobo ba baba hoho bafinama ha kabela, na bateela Petelo ti: «Ngeye mpe, wumosi ha kati dyawu wudi: nzonzolo aku yina lonka kwedi fumini.» 74 Buna Petelo wudya ndefi ti: «Bika Nzambi kansemba, tala ti kuhuna nina sa! Meno nzebi muntu bewowo ko!» Mu kilokola bekyokyo kwandi, nsusu yikuba, 75 na Petelo wubambuka moyo musamu wumuteela Yesu ti: «Teekila nsusu yikuba, ngeye waambisa nkumbu zitatu.» Wutotoka ku mbazi na wutoma dila mu kyadi kikingi.