10 Milongoki mifinama ha bela Yesu na bamufuula ti: «Bila nki kwe bazonzilanga mu bingana e?» 11 Wubavutudila ti: «Yeno baluhaana luve mu zaba mansweki ma kimfumu ki mazulu, kansi yawu ba bahaana lo ko. 12 Kedika, baahaana ku yondowo tekidi na kima, mpe waaba na byo bibingi, kansi yondowo lembolo ba na kima, baamubonga mwa ndambu yo yitekidi nandi. 13 Ni hahoho nakwe bazonzilanga mu bingana: mu dyambu ti bana tala, kansi bana yena ko, mboki bana yuwa, kansi bana yuwa ko mpe bana bakula ko. 14 Mwanki misamu mi ta mumbikudi Yesaya myenda detila:
Luna toma yuwa, kansi luna bakula ko,
Luna toma tala, kansi luna yena ko.
15 Mu dyambu ti mitima mi bantu bebaba myeka ngolo.
Bakengi makutu mawu,
na bazimini meso mawu,
mwanki balembolo yena mu meso mawu,
balembolo yuwa mu makutu mawu,
na balembolo bakula mu mitima myawu,
mwanki balembolo vutuka ku meno mpe na banyakisa.
16 Kansi kyese ku yeno mu dyambu ti, meso meno mena yena, mpe makutu meno mena yuwa! 17 Kedika nina luteela, mimbikudi mimingi na bantu baludedomo batya mu yena mi luna yena, kansi bayena ko, na batya mu yuwa mi luna yuwa, kansi bayuwa myo ko.
Mbangudulu yi kingana ki muntu wuyenda mwanga nswanga
(Mlk 4.13-20; Luk 8.11-15)