21 Ni hahoho Petelo kayendila kubeela Yesu na wumufuula ti: «Mfumu, nkumbu zikwa mfweti lemvokila mpangi ani, tala ti wumpidikidi misamu mimbi e? Nkumbu nsambwadi e?» 22 Yesu wumuteela ti: «Kaani! Nakuteedidi ko ti natee nkumbu nsambwadi, kansi natee nkumbu makumi nsambwadi ku bwesa sa bobo nkumbu nsambwadi. 23 Ni hahoho, Kimfumu ki mazulu kifwanakani bonso ntinu yimosi yi sosa mu zaba bwedi mindongo myandi mi sadila mbongo zandi. 24 Bu katona mu sadila bobo, bamutwadila mundongo wumosi wedi mudefa mafunda na mafunda ma mbongo. 25 Kadi kaba na mbongo ze mufuta ko, mfumu andi wutuma ba muyadika, yandi na mukento andi, na baala bandi na bimvimba biba nandi, mwanki kafuta mfuka andi. 26 Buna mundongo wubwa ha malu mandi na wufulamana ha ntadisi andi, mpe wumuteela ebu: "Mulemvo aku mfumu, vibidila kwandi, zimvimba zakwa naakufuta!" 27 Mfumu wumuyenina kyadi, wumuyambudila mfuka na wumubiika kenda kwandi. 28 Mundongo bu katotoka, wuyena wumosi mu bakwe salanga nandi, wedi mudefa makumole ma mbongo zi bisengo. Wumuvikitina ha dinga, wutona mu mufyeta mingadi na wumuteela ti: "Mfuta mfuka ani!" 29 Munandi wubwa ha malu mandi na wumubombidila ebu: "Vibidila kwandi zakwa naakufuta!" 30 Kansi yandi wutumbu bisa na wuyenda mutuula mu boloko natee bu kamana futa mfuka andi. 31 Banandi bahiika ba bakwe salanga, bu bayena bobo, batoma yena kyadi kikingi, na bayenda yadila mfumu awu mpolo mu mimvimba mihyoka. 32 Buna mfumu wutumisa mundongo bewowo na wumuteela ti: "Mundongo wumbi wudi! Nakuyambudila mfuka aku yimvimba, mu dyambu ti wumbombidila. 33 Kansi ngeye wulendi yenina munaku kyadi ko, bonso bu nakuyenina ngeye kyadi." 34 Mfumu andi wubaka mankesi, na wumutuula mu boloko natee bu kamana futa mfuka andi.»

35 Mboki Yesu wuta dyaka ti: «Bwabobo mpe Tata ani wu ku mazulu kaalusendila tala ti lulemvokidi mpangi eno mu mutima wumosi ko.»