Mateus 21

Nkotolo yi Yesu ku Yelusalemi

1 Bu baba bela-bela na mbanza Yelusalemi na bu batula ha bwala Betefaze, ku mulandu wu Olive, Yesu wutambika milongoki myandi myole. 2 Wubateela ti: «Yendeeno ha bwala bu ku mutwala. Lwaayena mbuluku yi nkento yi yikangama ha muti na mwana andi. Nyanguneeno zo, mpe ntwadileno zo. 3 Tala ti muntu wuluteedidi dyambu, muteeleeno ti: "Mfumu wuna zo nsatu." Hansi na nsi waabika zo zenda.»

4 Misamu bemyomyo mitula mwanki mita mimbikudi myenda detila:

5 «Teeno ku bantu ba mbanza yi Syoni:

"Ntinu eno yina kwiza ku yeno,

wu wufuluka mu lembami,

tentamani ha yulu mbuluku yinkento,

na ha yulu mwana mbuluku."»

6 Milongoki miyenda hidika bonso Yesu kabatumina mu kwe sa. 7 Banata mbuluku yi nkento na mwana andi. Batentika binkutu awu ha yulu awu. Mboki, Yesu wuzakala ha yulu. 8 Kamba di bantu didingi dyedi kwe yadi binkutu byawu mu nzila, mpe bahiika bedi kwe zengi mwa bintala bi miti na bedi kwe bye yadi mu nzila. 9 Kamba di bantu dyedi kwe tekidi na dyedi kwe landi Yesu ku manima dyedi kwe tengi mu ngolo ti: «Ozana! Mwana Davidi! Bika Nzambi kasakumuna muntu wuna kwiza mu nkumbu yi Mfumu! Ozana! Nkembo ku Nzambi yi mu mazulu mahyokidi kuzangama!»

10 Yesu bu kakota mu mbanza Yelusalemi, mbanza yimvimba yiningana, na bedi kwe te ti: «Muntu bewuwu nani kadi e?» 11 Kamba di bantu divutula ti: «Ni mumbikudi Yesu, mwisi Nazaleti mu kizunga ki Ngalili.»