Mateus 4

Nkadyampempa wutonta Yesu ku nsi yinkatu

1 Mboki, Mpeve Yilongo yinata Yesu ku nsi yinkatu, mwanki nkadyampemba ka mutonta. 2 Ku manima, Yesu wumina nsoki mu bilumbu makumaya (40), mpimpa na mwini. Nsatu ni yi mubaka. 3 Nkadyampemba wufinama na wumuteela ti: «Tala ti ngeye Mwana Nzambi wudi, tuma matadi bemama ma kituka mampa.» 4 Yesu wumuvutudila ti: «Basonika: "Luzingu lu muntu luu kaka mu dimpa ko, kansi mu mpova zimvimba zikwe duukanga ha munwa wu Nzambi."»

5 Nkadyampemba wumunata ku Yelusalemi, mbanza yi longo, wumutuula ha nsongi yi nzo-Nzambi 6 na wumuteela ti: «Tala ti Mwana Nzambi wudi, wukituba ku nsi, mu dyambu ti basonika:

"Nzambi waahaana mu dyambu dyaku ntumunu ku zimbazi zandi,

mpe baakuyaka mu moko mawu,

mwanki kuulu kwaku kulembolo koyama ha tadi."»

7 Yesu wumuvutudila ti: «Basonika mpe: "Wulendi tonta Mfumu Nzambi aku ko."» 8 Nkadyampemba wubwesa munata dyaka ha yulu mulandu na wumulonka nsi zimvimba zi ha nza na minkembo myawu, 9 na wumuteela ti: «Nina kuhaana bimvimba bebibi, tala ti wumfukimini na wunsambidi.» 10 Yesu wumuvutudila ti: «Satana, katuka ha nidi! Mu dyambu ti basonika: "Mfumu Nzambi aku kaka fweti fukimina, mpe Yandi kaka fweti sadila."» 11 Nkadyampemba wusala musisa, mboki mbazi ziyiza ku Yesu mu musadisa.