19 Luyonzikangandi bimvwama ha nza beyiyi ko, ha na zinsyedi na mbungi yikwe sanga ti bima biseka, mpe ha na mivi mikwe bulanga bibaka mu yiba. 20 Kansi, yonzikangeeno bimvwama ku yulu, kulembolo ba zinsyedi na mbungi yikwe sanga ti bima biseka, mpe kulembolo ba na mivi mikwe bulanga bibaka mu yiba. 21 Kedika, honso ha kimvwama kyaku, hahoho mpe ha mutima aku.
Kya ku nitu
(Luk 11.34-36)
22 Diisu dyaku ni mwinda wu nitu aku: tala ti dimbote didi, nitu aku yimvimba yaaba mu kya, 23 kansi ti dibeela didi, nitu aku yimvimba yaaba mpe mu kati di tombe. Tala ti ku kya ku naaku kufukamani mu tombe, tombe bekyokyo kyaaba na bokoboko!
Kusadila Nzambi hoti mbongo
(Luk 16.13)
24 Kunani muntu wulendi sadila mfumu zole ko. Mu dyambu ti, mbo kabela wumosi na waatya wuhiika, hoti mbo kayekama ku wumosi na mbo kanyafuna wuhiika. Lulendi sadila ha kimosi Nzambi na mbongo ko.
Kuba na kiminu mu Nzambi
(Luk 12.22-31)
25 Ni hahoho nina luteela ti: Ka lukikwamisandi mu dyambu di luzingu lweno mu bye dya na mu bye nwa, mpe mu dyambu di nitu zeno mu bye lwata. Kedika, luzingu luhyokidi mfunu na bindya, mpe nitu yi hyokidi mfunu na binkutu. 26 Taleeno zinuni zi ku yulu: zikwe kunanga ko, zikwe yonzikanga mu bilundulu ko, kansi Tata eno wu ku mazulu kwe ze dikilanga. Kadi yeno luhyokidi zinuni mfunu kwe e? 27 Nani mu yeno mu nyongono zandi lenda bwesa fyoti mwa ndambu bilumbu mu luzingu lwandi e?
28 Nki lukwe kikwamisinanga mu dyambu di binkutu e? Taleeno bwedi bifulu bimfuba bikwe kudilanga: bikwe salanga ko, bikwe syetanga ko. 29 Kansi nina luteela ti: Kaati Solomo mu bimvwama byandi bimvimba, kasala lwaata binkutu bivudidi ntoko bonso kifulu kimosi mu bifulu bebibi ko. 30 Tala ti Nzambi bwabobo kakwe lwikilanga bititi bidi bubedidi mu mfuba na mbazi bina tubu ku tiya, bila nki kalembolo lusila bo e? Yeno bantu ba kiminu kifyoti ludi!
31 Lukikwamisangandi ko mu ta ti: «Nki twaadya e? Nki twaanwa e? Na nki twaalwata e?» 32 Ni bantu balembolo ba Bayudayo, bakwe kwe sosingi bima bimvimba bebyobyo, ntangu zimvimba. Kansi Tata eno wu ku yulu zebi ti bii neeno nsatu. 33 Soseeno ntete Kimfumu ki Nzambi na lunungu lwandi, mbo kaluhaana bima bimvimba bihiika bisidi.
34 Lukikwamisangandi mu kilumbu ki mbazi, mu dyambu ti kilumbu ki mbazi, kyaaba na misamu myandi. Kadi kilumbu ki na mpasi zandi.