28 Yesu bu katula ku simu di kaka di dyanga di kizunga ki bisi-Ngadala, bantu bole baba na mpeve zimbi baduuka ku kati di ndyamu na bayiza mubwana. Baba na kinganzina kihyoka kitezo na kuba muntu ko wedi sosanga mu hyokila mu nzila beyoyo. 29 Buna batona mu bulana ti: «Mwana Nzambi, nkye dyambu ngeye na yeto e? Wizidi kuku mu tukwamisa tekila kilokola kitula e?»

30 Mwa kitatu nawu, kuba na mukangu wu zingulu wedi kwe sosi bindya. 31 Na mpeve zimbi zi bombidila Yesu na zita ti: «Tala ti tiidi mu tukuma, tutambika mu kati di kamba di zingulu bezizi.» 32 Yesu wubateela ti «Yendeeno». Baduuka, na bayenda kota mu kati di zingulu. Buna, mukangu wumvimba wu zingulu wulundumuka tuuka ku yulu mulandu natee ziyenda bwa mu dyanga, mboki zimana fwa mu mamba. 33 Minkengi mi zingulu bu miwoka, miyenda mwangisa nsangu ku mbanza mu misamu mimvimba mihyoka, na mitudila bantu bebobo baba na mpeve zimbi. 34 Ni hahoho, bantu bamvimba bambanza baduuka mu kwe bwana Yesu. Bu bamuyena na bamubombidila ka katuka mu kizunga kyawu.