Êxodo 16

መና ጎዳይ ማናነ አካቱዋ ቡክሴዳ

1 ግብጼፐ ከሴዳ ላኤን አግናን፥ ታማነ እቼሻን ጋላሳን እስራኤልያ አሳ ኩመንይ ኤሊማፐ ደንዲደ፥ ኤሊማፐነ ሲናፐ ግዱዋን ደእያ "ሲን" ጌተትያ መላ ቢታ ዬዳ። 2 እስራኤልያ አሳ ኡባይ መላ ቢታን ሙሴ ቦላነ አሮና ቦላ ዙዙሜድኖ። 3 እስራኤላቱ ኡንቱንታ፥ "ኑን ግብጼ ጋድያን መና ጎዳ ኩሽያን ሀይቄዶ ግዴሮኮሻ! ያን ኑን ኑዋ አሹዋ ከርያ ዩይ አ ኡቲደ፥ ኑን ኮዮ ቁማ ኡባ ሜዶ፤ ሽን ህንተንቱ ኑና ከሲደ፥ ኡባቱዋ ኮሻን ዎናዉ መላ ቢታ አሄድቴ?" ያጌድኖ።

4 መና ጎዳይ ሙሳ፥ "ታን ህንተንቶ ሳሉዋፐ ኡክ ቡክሳና፤ አሳይ ኡባ ጋላስካ ከሲደ፥ ሀቼ ሀቼዉ ግድያዋ ጻላላ ማጻናዉ ኮሼ። አሳይ ታ አዛዙዋ ካልንቶ ካለነንቶ ታን ኡንቱንታ ሄዋን ፓጫና።✝16:4 ዮሃ. 6:31 5 ኡሱፑን ጋላስ ኡንቱንቱ ሀሮደ ማጽያዎ ላኡ ኩሽያ ማጺደ፥ ካኖ" ያጌዳ።

6 ሄዋ ድራዉ፥ ሙሴነ አሮነ እስራኤልያ አሳ ኡባዉ፥ "ህንተና ግብጼ ጋድያፐ ከሴዳ መና ጎዳ ግድያዋ ኦማርስ ህንተንቱ ኤራና፤ 7 ቃይ መና ጎዳ ቦንቹዋ ዎንታ ህንተንቱ በአና፤ አያዉ ጎፐ፥ አ ቦላ ህንተንቱ ዙዙሜዳዋ እ ስሴዳ፤ ህንተንቱ ኑ ቦላ ዙዙማናዉ ኑን ኦኔ?" ያጌድኖ። 8 ሄዋፐ ጉይያን ሙሴ፥ "እ ህንተንቶ ማናዉ ኦማርስ አሹዋ እሚናነ ህንተንቱ ኮይያ ኡክ ኡባ ህንተንቶ ዎንታ እምና፥ እ መና ጎዳ ግድያዋ ህንተንቱ ሄዋን ኤራና። አያዉ ጎፐ፥ ህንተንቱ አ ቦላ ዙዙሜዳዋ እ ስሴዳ። ኑን ኦኔ? ህንተንቱ ኑ ቦላ ዙዙምክታ፤ ህንተንቱ መና ጎዳ ቦላ ዙዙሚታ" ያጌዳ።

9 ሙሴ አሮና፥ "ኔን እስራኤልያ አሳ ኡባ፥ ‘መና ጎዳይ ህንተንቱ ዙዙን ስሴዳ ድራዉ፥ መና ጎዳ ስን ሃ ሺቅተ’ ያጋ" ያጌዳ። 10 አሮነ እስራኤልያ አሳ ኡባዉ ኦድያ ዎደ፥ ኡንቱንቱ መላ ቢታኮ ስሚደ ጼሌድኖ፤ ሄዋን መና ጎዳ ቦንቹ ሻርያ ግዶን ቆንጭያዋ በኤድኖ። 11,12 መና ጎዳይ ሙሳ፥ "ታን እስራኤላቱ ዙዙን ስሳድ፤ ኔን ኡንቱንቶ፥ ‘ኦማርሳን አሹዋ ህንተንቱ ማና፤ ዎንታ ኡክ ህንተንቱ ካላና፤ ሄ ዎደ ህንተንቱ ታን መና ጎዳ ህንተንቱ ጾሳ ግድያዋ ኤራና’ ያጋደ ኦዳ" ያጌዳ።

13 ሄ ጋላስ ኦማርሳን አሹ ሜተትያ ካፎቱ ዪደ፥ እስራኤልያ አሳይ ደእያ ሳኣ ማዬድኖ፤ ቃይ ዎንታ ኡንቱንቱ ዱንካነቱዋ ዩሹዋን ከተርሳይ ኩም ኡቴዳ። 14 ከተርሳይ ጽኤዳ ዎደ፥ ሳኣን ዎዳ ሻቻ ማላትያ ሱፓ ፖቁ መላ ቢታ ቦላን ቤቴዳ። 15 እስራኤለቱ ሄዋ በኤዳ ዎደ፥ ኡንቱንቱ እቱ እቱዋ፥ "ሀዌ አዬ?"✝16:15 1 ቆሮ. 10:3 ያጌድኖ። አያዉ ጎፐ፥ ኡንቱንቱ እ አየንቶ ኤርበይክኖ።

ያትና ሙሴ ኡንቱንታ፥ "ህንተንቶ ማናዉ መና ጎዳይ እሜዳ ኡክይ ሀዋ። 16 መና ጎዳይ ሀዋዳን ያጊደ አዛዜዳ፤ ‘ጎለ አሳዉ አዎትያዌ፥ እቶ እቶ ማናዉ ኮሽያዋ ኬሻ ሺሾ፤ ህንተንቱ ዱንካንያ ግዶን ደእያ አሳይ ሁጲያን ሁጲያን ላኡ ጻሳ ግድያዋ አክተ’ ጌዳ" ያጌዳ።

17 እስራኤላቱ ሙሴ ኡንቱንቶ ኦዴዳዋዳን ኦድኖ፤ እቱ ዳርሲደ፥ እቱ ላፈደ ሺሼድኖ። 18 ኡንቱንቱ ጻሳን ማኬዳ ዎደ፥ ዳርሲደ ሺሼዳዎ ፓላህቤና፤ ላፋ ሺሼዳዎ ፓጭቤና፤ ኡባይካ ሁጲያን ሁጲያን ባረዉ ምያዋ ኬሻ ሺሼዳ።✝16:18 2 ቆሮ. 8:15 19 ሄዋፐ ጉይያን ሙሴ ኡንቱንታ፥ "ኦንነ አፐ ዎንትዉ አሾፖ" ያጌዳ። 20 ግዶ ሽን ኡንቱንቱፐ እቱ እቱ ሙሴ ኦድያዋ አከናን አጊደ፥ ሄዋ ዎንታ ጋካናዉ ዎድኖ፤ ሄዌ ጉጹኒደ ጽንቄዳ። ሄዋ ድራዉ፥ ሙሴ ኡንቱንታ ሀንቀቴዳ። 21 ዎንታ ዎንታ አሳይ ኡባይ ባረዉ ኮሽያዋ ሺሼዳ፤ አዋይ ሆእያ ዎደ ሳኣን አቴዳዌ ሲል አጌዳ።

22 ኡሱፑን ጋላሳን ኡንቱንቱ ካሰዋፐ ላኡ ኩሽያ ሺሼድኖ። ያትና ኡንቱንቱ ካፓቱ ኡባቱ ዪደ ሄዋ ሙሴዉ ኦዴድኖ። 23 እ ኡንቱንታ፥ "መና ጎዳይ አዛዜዳዌ ሀዋ፤ ዎንት ኪታይ ባይና ሸምፖ ጋላሳ፥ መና ጎዳዉ ጌሻ ሳምባታ። ሄዋ ድራዉ፥ ህንተንቱ ኡክያዋ ኡክተ፤ ህንተንቱ ዶይስያዋነ ዶይስተ፤ ፓላሄዳዋ ዎንትዉ አሽተ" ያጌዳ።✝16:23 ከሳ 20:8-11 24 ሄዋ ድራዉ፥ ኡንቱንቱ ሙሴ አዛዜዳዋዳን ዎንትዉ ዎና ጽንቂቤና ዎይ ጉጹንቤና። 25 "ሀቼ ሚተ፤ አያዉ ጎፐ፥ ሀቼ መና ጎዳ ሳምባታ፤ ህንተንቱ አ ሀቼ ደምባን ደምክታ። 26 ህንተንቱ ኡሱፑን ጋላሳን አ ሺሻናዉ ዳንዳዪታ፤ ሽን ላፑን ጋላሳይ ሳምባታ። ሳምባታን አያይነ ደኤና" ያጌዳ።

27 ላፑን ጋላሳን እት እት አሳይ ሺሻናዉ ከሴዳ፤ ሽን ኡንቱንቱ አይነ ደምበይክኖ። 28 መና ጎዳይ ሙሳ፥ "ታ አዛዛቱዋነ ታ ህግያ ናግያዋ አዉደ ጋካናዉ እጺቴ? 29 መና ጎዳይ ህንተንቶ ሳምባታ እሜዳዋ አኬክተ፤ ኡሱፑን ጋላሳን እ ህንተንቶ ላኡ ጋላሳ ኡክ እምያዌ ሄዋ ድራሳ። ላፑን ጋላስ ኡባይ ባረ ደእያ ሳኣን ደእያ ሳኣን ጋምኦ፤ ኦንነ ካረ ከሶፖ" ያጌዳ። 30 ሄዋ ድራዉ፥ አሳይ ላፑን ጋላሳን ሸምፔዳ።

31 እስራኤልያ አሳይ ሄ ኡክ ማና*16:31 ማና፦ ሀ ቃላ ብለይ እብራዌዋን "ሀዌ አዬ" ግያዋ። ጊደ ሱንዳ። ማናይ ዴቡዋ አይፍያዳን ቦ፤ ኤሳና ኡኬዳ ኡክዳን ማልኤ። 32 ሙሴ እስራኤልያ አሳ፥ "መና ጎዳይ አዛዜዳዌ ሀዋ፤ ‘ታን ህንተንታ ግብጼ ጋድያፐ ከሴዳ ዎደ፥ ዎራን ምዜዳ ኡክ ኡንቱንቱ በአና ማላ፥ ማናፐ ላኡ ጻሳ ግድያዋ ህንተንቱ ያና የለታዉ አሽ ዎተ’ ያጊደ አዛዜዳ" ያጌዳ።

33 ሙሴ አሮና፥ "እት ጻሩዋ አካደ ላኡ ሊትሮ ኩመን ማና አን ቆላ፤ ያታደ ያና የለታዉ ምንጀታና ማላ፥ መና ጎዳ ስንን ዎ" ያጌዳ።✝16:33 እብራ. 9:4

34 መና ጎዳይ ሙሳ አዛዜዳዋዳን ምንጀታና ማላ፥ አሮነ ማና ጾሳ ስንን ዎዳ። 35 እስራኤላቱ ባረንቱ ደእያ ጋደ ያና ጋካናዉ ኦይታሙ ላይ ማና ሜድኖ፤ ኡንቱንቱ ካናነ ጋደ ባጋ ጋካናዉ ማና ሚደ ደኤድኖ።✝16:35 ኢያሳ 5:12 36 አሳይ ማክያ ኤረቴዳ ቁንአይ ላኡ ጻሳፐ ታሙ ዳኩዋ ዳሬ።