መና ጎዳይ አብራመና ጫቀቴዳ
1 ሄዋፐ ጉየ፥ መና ጎዳ ቃላይ ሳጻን አብራመኮ ዪደ፥ "አብራማ፥ ያዮፓ! ታን ነዉ ጎንዳለ፤ ነ ጋቲ ሎይ ዳራ" ያጌዳ።
2 አብራመ፥ "አቤት ኡባ ሞድያ መና ጎዳዉ፥ ታዉ ኡባካ ናእ ባይና ድራዉ፥ ኔን እምያ ጋቲ ታዉ አይሴ? ደማስቆ ኤልኤዛር ታና ላታና ሽን"15:2 ኤልኤዛር ታና ላታና፦ እብራዌዋን ቆንጨ ግደና። ያጌዳ። 3 ቃይካ አብራመ፥ "ኔን ታዉ ናኣ እማባካ፤ ሄዋ ድራዉ ታ ሶን ደእያ ቆማይ ታና ላትያዋ" ያጌዳ።
4 መና ጎዳ ቃላይ አኮ ዪደ፥ "ሀ ቆማይ ኔና ላተና፤ ሽን ነ ጉልባታፐ ከስያዌ ኔና ላታና" ያጌዳ። 5 ስሚደ ካረ አ ከሲደ፥ "ሳሉዋ ፑደ ጼላ፤ ኔን ጾልንተቱዋ ፓይዳናዉ ዳንዳዮፐ ፓይዳ፤ ነ ዘረይካ ሀዋ ኬሻ ግዳና" ያጌዳ።15:5 ሮመ 4:18፤ እብራ. 11:12
6 አብራሞ መና ጎዳ አማኔዳ፤ መና ጎዳይ ሄዋ አዉ ጽሎተዳን ፓይዴዳ።15:6 ሮመ 4:3፤ ጋላ. 3:6፤ ያቆባ 2:23
7 መና ጎዳይ ቃይካ አ፥ "ታን ኔን ሀ ቢታ ላታና ማላ ነዉ እማናዉ ኡር ግያ ካላዳዌቱዋ ካታማፐ ኔና ከሳ አሄዳ መና ጎዳቴ" ያጌዳ።
8 ሽን አብራሞ አ፥ "አቤት ኡባ ሞድያ መና ጎዳዉ፥ ታን ሀ ቢታ ላታናዋ አያን ኤሮ?" ያጌዳ።
9 መና ጎዳይ አ፥ "ሄዙ ላይ ኡሳ፥ ሄዙ ላይ ዴሻ፥ ሄዙ ላይ ዶርሳነ ላኡ ቆሞ ሀራጰቱዋ ታዉ አካደ ያ" ያጌዳ። 10 እ ሀዋንታ ኡባ አዉ አፌዳ፤ ኡንቱንታ ጳልቂደ ላኡ ከሴዳ፤ ላኡዋ ከሴዳዋ እቱዋ እቱዋ ባጋን ዎዳ፤ ሽን ካፎቱዋ ላኡ ከስ ጳልቂቤና። 11 ሄ ዎደ አንኮቱ ሄ አሹዋ ቦላ ዎድኖ፤ ሽን አብራመ ኡንቱንታ የደርሴዳ።
12 አዋይ ዉልያ ዎደ አብራማ ዎልቃማ ገምእሹ ኦይቄዳ፤ ጵ ጌዳ ማይ አ ቦላ ዎዳ።15:12 ኢዮባ 4:13፣ 14 13 ያትና መና ጎዳይ አ፥ "ነ ዘረይ ሀራ ጋድያን በተ ግዲደ ደአናዋ ኔን ቱሙፐ ኤራ፤ ኡንቱንቱ አይለቲደ ኦይዱ ጼቱ ላይ ናቀታና።15:13 ከሳ 1:1-14፤ ኪታ 7:6 14 ሽን አይለዪደ ኡንቱንታ ሞድያ ካዉተ ታን ሙራና፤ ሄዋፐ ጉየ፥ ኡንቱንቱ ዳሮ አቁዋና ሄ ቢታፐ ከሳና።15:14 ከሳ 12:40-41፤ ኪታ 7:7 15 ኔና ግዶፐ፥ ኔን ነ ማይዛ አዎቱዋኮ ሳሮተን ባና፤ ኔን ሎይ ጭማደ ሀይቃናነ ሞገታና። 16 ሽን ኦይደን የለታን ነ ዘረይ ሀ ጋድያ ስማና፤ አያዉ ጎፐ፥ አሞረቱ ናጋራይ ብሮ ልክያ ጋክቤና" ያጌዳ።
17 አዋይ ዉልና ሳአይ ሜዳ፤ ጮጭያ ጩዋይነ ታማ ላጩ አኬከናን ቤቲደ፥ ሄ ላኡ ከስ ጳልቀቴዳዋንቱፐ ግዱዋና አዳ። 18 ሄ ጋላስ መና ጎዳይ አብራመና ሀዋዳን ያጊደ ጫቁዋ ጫቀቴዳ፤ "ግብጼ ሻፋፐ ዶሚደ ኤፍራጺሳ ግያ ዎልቃማ ሻፋ ጋካናዉ፥ ሀ ቢታ ታን ነ ዘረዉ እማድ፤15:18 ኪታ 7:5 19-21 ሀ ቢታይ ቄናቱዋ፥ ቀኒዘቱዋ፥ ቃድሞነቱዋ፥ ሂተቱዋ፥ ፓርዘቱዋ፥ ራፋየቱዋ፥ አሞረቱዋ፥ ካናነቱዋ፥ ገርጌሰቱዋነ ያቡሳቱዋ ቢታ" ያጌዳ።