ዶመ 21

ይሳቅ የለቴዳ

1 ጾሳይ ባረ ኦዴዳዋዳን ሳርኮ ዬዳ፤ ጾሳይ ሳሮ ባረ ጌዳዋዳን ኦዳ። 2 ሳራ ሻሃራደ፥ ጭሜዳ አብራሃመዉ ጾሳይ ጌዳ ዎዲ ጋክና፥ አቱማ ናኣ የላዱ። 3 ሳራ አዉ የሌዳ ባረ ናኣ ሱን አብራሃመ "ይሳቃ" ያጊደ ሱንዳ።✝21:3 እብራ. 11:11 4 አብራሃመ ባረ ናኣ ይሳቃ ጾሳይ አዛዜዳዋዳን ሆስፑን ጋላሳን ቃጻሬዳ።✝21:4 ዶመ 17:12፤ ኪታ 7:8 5 አ ናኣ ይሳቅ አዉ የለቴዳ ዎደ፥ አብራሃመ ላይይ ጼታ። 6 ሳራ፥ "ጾሳይ ታዉ ሚቻ*21:6 ሚቻ፦ ሀ ሱን ብለይ "እ ሚጬ" ግያዋ (ጉጅ ጼልተ 17:17-19) እሜዳ፤ ቃይ ሀዋ ስስያዌ ኡባይ ታናና ሚጫና" ያጋዱ። 7 ቃይካ ሳራ፥ "አብራሃመዉ ሳራ ናኣ ንና ጌዳዌ ኦኔ? ግዶፐነ ታን ሀእ አዉ እ ጭሜዳ ዎድያን ናኣ የላድ" ያጋዱ።

አጋራነ እስማኤል የደርሰቴድኖ

8 ጉ ናአይ ድጪደ፤ ን ዱዳ፤ አብራሃመ ይሳቅ ን ዱዳ ጋላስ ዎልቃማ ባላ ከሴዳ። 9 ሽን ግብጼፐ ዬዳ አጋራ አብራሃመዉ የሌዳ ናአይ ይሳቃና ካእያዋ ሳራ በኣዱ። 10 አብራሃማ፥ "ሀ አይላት ናአይ ታ ናኣ ይሳቃና ኡባካ ላተና ድራዉ፥ አይላቶነ እዝ ናኣ ከሳ የዳ" ያጋዱ።✝21:10 ጋላ. 4:29-30

11 ሀ የዉ ባረ ናኣ ቦችያ ድራዉ፥ አብራሃመ ሎይ መቶቴዳ። 12 ሽን ጾሳይ አብራሃመ፥ "ናአዉነ ነ አይላትዉ ሎይ መቶቶፓ፤ ሳራ ነዉ ኦድያዋ ኡባ ስሳ፤ አያዉ ጎፐ፥ ነ ዘረይ ይሳቃ ባጋና ጼሰታናዋ።✝21:12 ሮመ 9:7፤ እብራ. 11:18 13 ቃይ አይላት ናኣ ታን ካዉተ ከሳና፤ አያዉ ጎፐ፥ እካ ነ ዛረ" ያጌዳ።

14 ዎንታ ጉራን አብራሃመ ደንዴዳ፤ ቁማነ ኦጎሩዋን ሃ አኪደ፥ አጋሮ ሀሽያን ቶሲደ፥ እዝ ናኣካ እዝዉ እሚደ ከስ የዴዳ። እዛ ባደ፥ በርሳበሄ ግያ ዎራን ቶይላካታዉ። 15,16 ሃይካ ኦጎሩዋን ዉሬዳ ዎደ እዛ፥ "ናአይ ሀይቂሽን፥ ኡታደ በእከ" ያጋደ፥ ናኣ እት ቡራ ጋርሳን ዎደ፥ ላኡ ጼቱ ዋ ግድያዋ ኬሻ ባደ ኡታዱ። ማታን ኡታደ፥ ባረ ቃላ ቂሳደ ዬካዱ።

17 ጾሳይ ናኣ ዋሱዋ ስሴዳ፤ ጾሳ ኪታንቻይ አጋሮ ሳሉዋፐ ጼሲደ፥ "አጋሬ፥ ዋናዲ? ጾሳይ ናአይ ግሴዳ ሳኣን ዋስያዋ ስሴዳ ድራዉ ያዮፓ፤ 18 ደንዳ ኤቃ፤ ናኣነ ነ ኩሽያን ደን፤ አያዉ ጎፐ፥ ታን አ ዎልቃማ ካዉተ ኦና" ያጌዳ። 19 ጾሳይ እዝ አይፍያ ዶይና፥ ሃ ኦላ በኣዱ፤ ባደ ኦጎሩዋን ሃ ኩንዱ፤ ናኣካ ኡሻዱ። 20 ናአይ ድጭያ ዎደ፥ ጾሳይ አናና ግዴዳ፤ እ ዎራን ደኢደ፥ ዎንዳፍያ ዱክያ አሳ ግዴዳ። 21 እ ፓራና ግያ ዎራን ደእሽን፥ አ ዳያ ግብጼፐ አዉ ማቻቶ ደማዱ።

አብራሃመፐነ አብመሌከፐ ግዱዋን ዎዳ ጫቁዋ

22 ሄ ዎደ፥ አብመሌክ ባረ ዎታዳራቱዋ ካፑዋ ፕኮላና አብራሃመኮ ቢደ፥ "ኔን ኦያ ኡባባን ጾሳይ ኔናና ደኤ።✝21:22 ዶመ 26:26 23 ኔን ታ ቦላ ዎይ ታ ናና ቦላ ዎይ ታ ዘረ ቦላ ገነባ ኦና ማላ፥ ሀእ ሀዋን፥ ጾሳ ስንን ታዉ ጫቃ፤ ታን ነዉ ኬኬዳዋዳን፥ ኔንካ ታዉነ ኔን እማተን ደእያ ሀ ቢታዉ ሎአ" ያጌዳ።

24 አብራሃመ፥ "ታን ጫቃይ" ያጌዳ።

25 ሄ ዎደ፥ አብራሃመ አብመሌካ ቆማቱ አኬዳ ሃ ኦላባ አብመሌካዉ ማጋኔዳ። 26 ሽን አብመሌክ፥ "ሄዋ ኦን ኦደንቶ ታን ኤርከ፤ ኔንካ ቃይ ታዉ ኦዳባካ፤ ታን ሀቼ ጋካናዉ ሄዋ ስሳበይከ" ያጌዳ።

27 ሄዋፐ ጉየ አብራሃመ ዶርሳነ ሚዛቱዋ አሂደ፥ አብመሌካዉ እምና፥ ኡንቱንቱ ላኡ ጫቁዋ ጫቀቴድኖ። 28 አብራሃመ ላፑን ማጫ ዶርሳ ማራቱዋ ዉድያፐ ሻኬዳ፤ 29 አብመሌክ አብራሃማ፥ "ሀ ኔን ዱማ ሻካ ዎዳ ላፑን ማጫ ዶርሳ ማራቱዋ አያዉ ሻካዲ?" ያጊደ ኦቼዳ።

30 አብራሃመ፥ "ታን ሀ ሃ ኦላ ቦኬዳዎ ማርካ ግዳና ማላ፥ ሀ ላፑን ማጫ ዶርሳ ማራቱዋ ታ ኩሽያፐ አካ" ያጌዳ።

31 ሄዋን ሄ ላኡ አሳቱ ጫቀቴዳ ድራዉ፥ ሄ ሳአይ በርሳበሄ*21:31 በርሳበሄ፦ ሀ ሱን ብለይ፥ "ጫቁዋ ሃ ኦላ" ዎይ "ላፑን ሃ ኦላ" ግያዋ (ጉጅ ጼልተ 26:33) ጌተቴዳ።

32 በርሳበሄን ጫቁዋ ጫቀቴዳዋፐ ጉየ፥ አብመሌከነ አ ዎታዳራቱ ካፑዋ ፕኮል ደንዲደ፥ ፕልስጼማ ቢታ ስሜድኖ። 33 አብራሃመ በርሳበሄን ታማርስከ ጌተትያ ም ቶኬዳ። ሄዋን ጎዳ፥ መና ጾሳ፥ ሱን ጼሴዳ። 34 አብራሃመ ፕልስጼማ ጋድያን ዳሮ ዎድያ ደኤዳ።