ይሳቃዉ ማቻታ ኦሸታዱ
1 አብራሃመ ሎይ ላይ ሱጊደ ጭሜዳ፤ መና ጎዳይ አ ኡባባንካ አንጄዳ። 2 አብራሃመ ባረ ቆማ፥ ባረ ሶ አሳ ኡባዉ ካፖትያ፥ ባረ አሳ ኡባዉ ጎዳትያዋ ሀዋዳን ያጌዳ፤ "ነ ኩሽያን ታ ጉልባታ ኦይቃ፤24:2 ነ ኩሽያን ታ ጉልባታ ኦይቃ፦ ሀዋ ጉሳይ ጫቁ ፖሎ ላመተናዋ በሴ። 3 ታን ኡንቱንቱ ግዶን ደእያ ካናነቱዋ ማጫ ናናቱዋፐ ታ ናአዉ ማቻቶ ኦቼና ማላ፥ መና ጎዳን፥ ሳሉዋ ጾሳንነ ሳኣ ጾሳን ታን ኔና ጫቀይ፤ 4 ሽን ኔን ታ የለቴዳ ቢታ፥ ታ ዳቦቱዋኮ ባደ፥ ታ ናኣ ይሳቃዉ ማቻቶ ኦቻ" ያጌዳ።
5 አ ቆማይ፥ "ማጫውና ታናና ያናዉ ዶሰናባ ግዶፐ፥ ነ ናኣ ኔን ዬዳ ጋድያ ጉየ አፎ?" ያጊደ ኦቼዳ።
6 አብራሃመ፥ "ታ ናኣ ያ አፈናዳን ኔና ኤራ! 7 መና ጎዳይ፥ ሳሉዋ ጾሳይ፥ ታና ታ አዉዋ ሶፐነ ታ የለቴዳ ቢታፐ ከሴዳዌ ታዉ፥ ‘ነ ዛርያዉ ታን ሀ ቢታ እማና’ ያጊደ ጫቄዳዌ፥ ኔን ታ ናአዉ ያፐ ማቻቶ ደማና ማላ፥ እ ባረ ኪታንቻ ኔፐ ስንዉ ኪታና። 8 ምሽራታ ኔናና ጉየ ያናዉ ዶሰናባ ግዶፐ፥ ሀ ታን ኔና ጫቀዳ ጫቁ ነዉ ጎመተና፤ ሽን ታ ናኣ ያ ጉየ ኡባካ አፎፓ" ያጌዳ። 9 ቆማይ ባረ ጎዳ አብራሃመ ጉልባታ ኦይቄዳ፤ ሀ የዎ ጫቄዳ።
10 ሄዋፐ ጉየ፥ ቆማይ ባረ ጎዳ ጋሎቱዋፐ ታሙዋ አኪደ፥ ባረ ጎዳ ሚሻፐካ ሙሩታ ሙሩታ አኪደ ቤዳ፤ ማስጰጾምያ ግያ ጋድያን ናኮራ ካታማ ጋኬዳ። 11 ኦማርስ፥ ማጫ አሳይ ሃ ትካናዉ ይያ ዎድያን፥ ካታማፐ ጋጻን ሃ ኦላ ማታን ባረ ጋሎቱዋ ጉልባትሴዳ።
12 ያቲደ እ ሀዋዳን ያጊደ ዎሴዳ፤ "መና ጎዳዉ፥ ታ ጎዳ አብራሃመ ጾሳዉ፥ ሀቼ ታን ቆፓደ ዬዳባ ታዉ እንጀያ፤ ቃይ ታ ጎዳ አብራሃመዉ ሎኦባ ኦ። 13 በአ! ታን ሀ ሃ ፑልትያ ማታን ኤቃይ፤ ሀ ካታማ አሳ ማጫ ናናይ ሃ ትካናዉ ሃ ያና። 14 ታን፥ ‘አነ ኦቱዋ ሆክሳደ ታና ሃ ኡሻ’ ግያ ዎደ፥ እዛካ፥ ‘ሄይ ኡሻ፤ ቃይ ነ ጋሉዋ ታን ኡሻና’ ያግያና፥ ሄና ነ ቆማ ይሳቃዉ ኔን ዶሬዳኖ ግዱ፤ ኔን ታ ጎዳዉ ሎኦባ ኦዳዋ ታን ሄዋን ኤራና" ያጌዳ።
15 ብሮ እ ዎሳ ዉርሰናን ደእሽን፥ ርብቃ ሃ ኦቱዋ ቶካደ ፑቱ ጋዱ። እዞ ባቱኤል የሌዳ፤ ባቱኤል ምልካ ናኣ፤ ምልካ አብራሃመ እሻ ናኮራ ማቻቶ። 16 ርብቃ ሎይ ፑላንቻነ አቱማ አሳይ ቦችቤና ዎዶራቶ። ፑልቱዋ ዱገ ዎደ፥ ባረ ኦቱዋ ኩንደ ከሳዱ። 17 ሄ ቆማይ ኢኮ ዎጽ ቢደ እዞ፥ "ነ ኦቱዋፐ ታና ጉ ሃ ኡሻርኪ!" ያጌዳ።
18 እዛ፥ "ኤኖ ታ ጎዳዉ፥ ኡሽኪ" ያጋዱ። ኤሌላደ ኦቱዋ ባረ ሀሽያፐ ዎደ፥ ገደ ዛራ ኦይቃደ አ ኡሻዱ። 19 አ ኡሼዳዋፐ ጉየ፥ "ነ ጋላቱዋካ አላና ጋካናዉ ታን ኡንቱንቶ ሃ ዱቃና" ያጋዱ። 20 አቴዳ ሃ ኤሌላ ዎንግርያን ትጋደ፥ ሀራ ሃ ዱቃናዉ ኦላ ዎጻዱ፤ ጋላቱ ኡባይ አላና ጋካናዉ፥ ሃ ኦላፐ ዱቃ ዱቃደ አሃደ ዎንግርያን ትጋደ ኡሻዱ። 21 እ ቆፒደ ዬዳ ቆፋ መና ጎዳይ እንጀዪደ ደእንቶ ኤራናዉ ብታኒ ጮኡ ጊደ እዞ ጼሌ።
22 ጋሎቱ ሃ ኡሽ ስሚና፥ ብታኒ እቼሹ ግራመነ ባካ ግዴዳ ዎርቃ ምግዱዋነ፥ ጼታነ ታሙ ግራመ ግዴዳ ላኡ ዎርቃ ሳጋየቱዋ ከሴዳ፤ 23 እዞ፥ "ኔን ኦ ናት? አነ ታዉ ኦዳ፤ ነ አዉዋ ሶን ኑዉ አቅያ ሳአይ ደአኔ?" ያጌዳ።
24 እዛ፥ "ታን ባቱኤላ ናቶ፤ ባቱኤል ምልካ ናኮራዉ የሌዳ ናኣ። 25 ኑዋን ግድያ ዳላይነ ባሱ ደኤ፤ ቃይ ህንተንቱ አቃናዉካ ሳአይ ደኤ" ያጋዱ።
26 ብታኒ ጉልባት መና ጎዳዉ ጎይኒደ፥ 27 ሀዋዳን ያጌዳ፤ "ታ ጎዳዉ ኬክያዋነ አማነትያዋ አግቤና መና ጎዳይ፥ ታ ጎዳ አብራሃማ ጾሳይ ጋላተቶ! ታን ዪሽን፥ መና ጎዳይ ታና ታ ጎዳ ዳባቱዋ ሶይ ካለዳ" ያጌዳ።
28 ናታ ዎጻ ባደ፥ ባረ አት ሶን ደእያ አሳዉ ሀኔዳባ ኦዳዱ። 29 ርብቅዉ ላባና ግያ እሻይ ደኤ፤ ላባን ካረ ከሲደ፥ ሃ ፑልቱዋ ማታን ደእያ ብታንያኮ ዎጼዳ። 30 ምግዱዋነ ባረ ምቻት ኩሽያን ደእያ ሳጋየቱዋ በኤዳሳና ርብቃ ብታኒ ባረና ጌዳዋ ኦድና ስሶሳና፥ ከሲደ ብታንያኮ ብ በኤዳ፤ ብታንያ ጋሎቱዋና ፑልቱዋ ማታን ኤቄዳዋ ደሜዳ። 31 አ፥ "መና ጎዳይ ኔና አንጄዳዎ፥ ሃያ! ኔን ሀዋን ካረን አያዉ ኤቃይ? ታን ነዉ ጎልያነ ጋሎቶካ ሳኣ ጊግሳድ" ያጌዳ።
32 ብታኒ ሶ ገሌዳ፤ ላባን ጋሎቱዋ ጫና ብሌዳ፤ ዳላነ ባሱዋ ጋሎቶ የጌዳ። ገድያ ሜጫናዉ አስነ አናና ደእያ አሳቶ ሃ አሄዳ፤ 33 ቁማይካ አ ስን አዳ። ሽን እ፥ "ታን ታና አሄዳባ ህንተንቶ ኦደናን ደኣደ ቁማ ሚከ" ያጌዳ።
ላባን፥ "ያቶፐ ኦዳ" ያጌዳ።
34 ሄዋ ድራዉ እ፥ "ታን አብራሃመ ቆማ። 35 መና ጎዳይ ታ ጎዳ ሎይ አንጅና፥ እ ዱረቴዳ፤ ዶርሳ፥ ሚዛ፥ ብራ፥ ዎርቃ፥ አቱማ ቆማቱዋ፥ ማጫ ቆማቱዋ፥ ጋሎቱዋነ ሀረቱዋ አዉ እሜዳ። 36 ታ ጎዳ ማቻታ ሳራ ባረ ጪማተ ላይን አዉ አቱማ ናኣ የላዱ፤ እ ባረዉ ደእያዋ ኡባ አዉ እሜዳ። 37 ታ ጎዳይ ታና ሀዋዳን ጫቂሴዳ፤ ‘ታን ደእያ ካናነ ቢታ ማጫ ናናቱዋፐ ታ ናአዉ ማቻቶ ኦቾፓ፤ 38 ሽን ታ አዉዋ አሳኮ፥ ታ ዛራቱዋኮ ባደ፥ ታ ናአዉ ማቻቶ ኦቻ’ ያጌዳ። 39 ታን ታ ጎዳ፥ ‘ናታ ታናና ያናዉ ዶሰናን አጎፐ ሽን?’ ያጋድ። 40 እ፥ ‘መና ጎዳይ፥ ታን አ ስንን ሀመቴዳዌ ኔናና ባረ ኪታንቻ ኪታና፤ ኔን ታ ናአዉ ታ አዉዋ አሳፐ፥ ታ ዛራቱዋፐ ማቻቶ ደማና ማላ፥ ነ ብያሳካ እንጀያና። 41 ኔን ታ ዛራቱዋኮ ቢና፥ ኡንቱንቱ ነዉ እዞ እመናን እጾፐ፥ ሄ ዎደ ነዉ ጫቁ ጎመተና’ ያጌዳ።
42 "ታን ሀቼ ሀ ፑልቱዋኮ ዬዳ ዎደ ያጋድ፤ ‘መና ጎዳዉ፥ ታ ጎዳ አብራሃመ ጾሳዉ፥ ነ ሸነ ግዶፐ፥ ታን ብያ የዉዋ እንጀያ። 43 በአ፤ ታን ሀ ፑልቱዋ ማታን ኤቃይ፤ ወዶራታ እትና ሃ ትካናዉ ዮፐ፥ ታን እዞ፥ "ታና ነ ኦቱዋፐ ጉ ሃ ኡሻርኪ!" ያጋና። 44 እዛ ታና፥ "ኤኖ ኡሻ፤ ቃይ ነ ጋሎቶካ ታን ሃ ዱቃና" ያግያና፥ መና ጎዳይ ታ ጎዳ ናአዉ ዶሬዳኖ ግዱ’ ያጋድ።
45 "ታን ታ ዎዛናን ዎስያዋ ዉርሰናን ደእሽን፥ ርብቃ ባረ ኦቱዋ ቶካ አካደ፥ ፑቱ ጋዱ፤ ፑልቱዋ ዱገ ዎደ ሃ ዱቃዱ፤ ታን እዞ፥ ‘ታና ሃ ኡሻርኪ’ ያጋድ።
46 "እዛ ኤሌላ ባረ ሀሽያፐ ኦቱዋ ዎደ፥ ‘ሄኮ ኡሻ፤ ቃይ ታን ነ ጋሎቱዋ ኡሻና’ ያጋዱ። ታን ኡሻድ፤ ቃይ ታ ጋሎቱዋ እዛ ኡሻዱ።
47 "ታን እዞ፥ ‘ኔን ኦ ናት?’ ያጋድ።
"እዛ፥ ‘ታን ባቱኤላ ናቶ፤ ባቱኤል፥ ምልካ ናኮራዉ የሌዳ ናኣ’ ያጋዱ።
"ታን እዝዉ ምግዱዋ አድ፤ እዝ ኩሽያንካ ሳጋየቱዋ ዎድ። 48 ሄዋፐ ጉየ ታን ጉልባታደ፥ መና ጎዳዉ ጎይናድ፤ ታን መና ጎዳ፥ ታ ጎዳ አብራሃመ ጾሳ፥ ታ ጎዳ እሻ ናኣ ናቶ አ ናአዉ አካናዉ ታና ልከ ኦግያ ካለዳዋ ጋላታይ። 49 ሀእካ ህንተንቱ ታ ጎዳዉ ኬካናባነ አማነታናዋ ግዶፐ፥ ታዉ ኦድተ፤ ግዳና ይንቶነ ኦድተ፤ ሄዋፐ ስንን ታን ሀናናዋ ኤራና" ያጌዳ።
50 ላባንነ ባቱኤል ዛሪደ ያጌድኖ፤ "ሀ የዉ መና ጎዳፐ ዬዳ፤ ኑን ነዉ ያ ሃ ጋናዉ ዳንዳዮኮ። 51 ርብቆ ሀኖ በአ፤ አካደ ባ፤ መና ጎዳይ ጌዳዋዳን ነ ጎዳ ናአዉ ማቻቶ ግዱ" ያጌድኖ።
52 አብራሃማ ቆማይ ኡንቱንቱ ግያዋ ስሴዳ ዎደ፥ ሳኣን ጉልባቲደ መና ጎዳዉ ጎይኔዳ። 53 ቆማይ ብራ አሌቁዋነ ዎርቃ አሌቁዋ፥ ማዩዋካ ከሲደ፥ ርብቅዉ እሜዳ፤ ቃይ አልኦ ሚሻቱዋ እዝ እሻዉነ እዝ አትዉ እሜዳ።
54 ሄዋፐ ጉየ፥ እነ አናና ደእያዋንቱ ሜድኖነ ኡሼድኖ፤ ያቲደ ያን አቄድኖ፤ ኡንቱንቱ ጉራን ደንዲደ፥ "ታና ታ ጎዳኮ የድተ" ያጌዳ።
55 እዝ እሻይነ እዝ አታ፥ "ናታ እት ታሙ ጋላሳ ኬሻ ኑናና ታኩ፤ ሄዋፐ ጉየ እዛ ባና" ያጌድኖ።
56 ሽን እ፥ "መና ጎዳይ ታን ዬዳዋ እንጀይ ድግና፥ ህንተንቱ ታና ጋምኤፕተ፤ ታን ታ ጎዳኮ ባና ማላ ታና ሞይዝተ" ያጌዳ።
57 ኡንቱንቱ፥ "ናቶ ጼሲደ አነ እዞ ኦቾይተ" ያጌድኖ። 58 ርብቆ ጼሲደ፥ "ሀ ብታንያና ባኒ?" ያጊደ ኦቼድኖ።
እዛ፥ "ኤ፤ ታን ባና" ያጋዱ።
59 ኡንቱንቱ ባረንቱ ምቻቶ ርብቆ፥ እዞ ድችያንና፥ አብራሃማ ቆማናነ አ አሳቱዋና ሞይዜድኖ። 60 ኡንቱንቱ ርብቆ፥
"ኑ ምቻት ርብቄ፥
ሻኣፐ ሻኣ ጋካናዉ ጮራታ።
ነ ዛራቱ ባረንቱ ሞርከቱዋ ካታማቱዋ ላትኖ" ያጊደ አንጄድኖ።
61 ሄዋፐ ጉየ፥ ርብቃነ እዝ ዳንጋጽረቱ ደንዲደ፥ ጋሎቱዋ ቶጊደ፥ ብታንያና ቤድኖ። ያትና ቆማይ ርብቆ አኪደ ቤዳ።
62 ሄ ዎደ ይሳቅ፥ "ታና በእያ ደኡዋ ጾሳ ፑልቱዋ" ግያ ፑልቱዋ ማታ ቢደ፥ ኔጌባ ዎራን ደኤ። 63 እት ጋላስ ኦማርስ ይሳቅ ባረ ዎዛናን ቆፒደ ደምባ ከሲደ ዩዬ፤ እ ቁ ጊደ ጼልያ ዎደ፥ ጋላቱ ይያዋንታ በኤዳ። 64 ርብቃካ ቁ ጋደ ጼልያ ዎደ፥ ይሳቃ በኣዱ፤ ጋሉዋፐ ዎዱ። 65 ቆማ፥ "ሀ ኑናና ጋከታናዉ ደምባና ይያ ብታኒ ኦኔ?" ያጋዱ።
ቆማይ፥ "እ ታ ጎዳቴ" ያጌዳ። እዛ ባረ ሻሽያ አካደ ጉሎታዱ።
66 ቃይ ቆማይ ባረ ኦዳዋ ኡባ ይሳቃዉ ኦዴዳ። 67 ይሳቅ ርብቆ ባረ አት ሳር ዱንካንያ አፌዳ። እዞ አኬዳ፤ እዛካ አዉ ማቻቶ ግዳዱ። ያትና እ እዞ ሲቄዳነ ባረ አት ሀይቁዋን ካዮትያዋፐ ምነቴዳ።