ያቆብ ላባና ሶ ጋኬዳ
1 ሄዋፐ ጉየ፥ ያቆብ ደንድ ቢደ፥ አዋይ ዶልያ ባጋ አሳቱዋ ጋድያ ጋኬዳ። 2 እት ሃ ኦላይ ደምባን ደእያዋ በኤዳ፤ ሄዙ ዶርሳ ዉዲ ቃይ ሄ ኦላ ማታን ግሴድኖ። አያዉ ጎፐ፥ ዉዲ ኡባይ ሃ ኡሽያዌ ሄ ኦላፐ። ሄ ሃ ኦላ ዶናን ደእያ ሹቻይ ዎልቃማ። 3 ዶርሳ ዉዲ ኡባይ ሄዋን ዳጋቴዳ ዎደ፥ ሄ ዉድያ ሄምያዋንቱ ሃ ኦላ ዶናፐ ሄ ሹቻ ጎንዶርሲደ ዶርሳ ኡሺኖ። ሄ ሹቻ ኦላ ዶናን ዛሪደ ዎኖ።
4 ያቆብ ኡንቱንታ፥ "ታ እሻቶ፥ ህንተንቱ ሀቃፐ የድተ?" ያጊደ ኦቼዳ።
ኡንቱንቱ፥ "ኑን ካራነፐ ዬዶ" ያጌድኖ።
5 እ፥ "ናኮራ ናኣ ናኣ ላባና ህንተንቱ ኤሪተየ?" ያጌዳ።
ኡንቱንቱ፥ "ኤ፥ አ ኤሬቶ" ያጌድኖ።
6 ያቆብ ኡንቱንታ፥ "እ ሎኦ ደኢ?" ያጊደ ኦቼዳ።
ኡንቱንቱ፥ "ኤ፥ ሎአ፤ አ ናታ ራሄላ ዶርሳ አካደ የውኖ ሀኖ በአ" ያጌድኖ።
7 ያቆብ ኡንቱንታ፥ "በእተ፤ አዋይ ሀእ ዉልቤና፤ ዉድያ መሂ ሶ ሺቅያ ዎዲ ብሮ ጋክቤና፤ ዶርሳ ሀእ ኡሽ አፊደ፥ ሄምተ" ያጌዳ።
8 ሽን ኡንቱንቱ፥ "ዉዲ ኡባይ ሺቃና ጋካናዉ፥ ሹቻ ሃ ኦላ ዶናፐ ጎንዶርሳና ጋካናዉ፥ ኑን ኡሻናዉ ዳንዳዮኮ። ሄዋፐ ጉየ፥ ኑን ዶርሳ ኡሻና" ያጌድኖ።
9 እ ብሮ ሃሳይሽን፥ ላባና ናታ ራሄላ ባረ አዉዋ ዶርሳቱዋ ላጋ አካደ ጋካዱ፤ አያዉ ጎፐ፥ እዛ ዶርሳ ሄንንቻ። 10 ያቆብ ባረ አት እሻ ላባና ናቶ ራሄሎ በኤዳ ዎደነ፥ ባረ አት እሻ ላባና ዶርሳ በኤዳ ዎደ፥ ቢደ ኦላ ዶናፐ ሹቻ ጎንዶርሴዳ፤ ባረ አት እሻ ዶርሳቱዋ ሃ ኡሼዳ። 11 ያቆብ ራሄሎ የሪደ፥ ናሸቻዉ ባረ ቃላ ቂሲደ ዬኬዳ። 12 ያቆብ እዝዉ አዉዋ ዳቦነ ርብቅ ናኣ ግድያዋ ራሄልዉ ኦዴዳ። ሄዋ ድራዉ እዛ ዎጻ ባደ ባረ አዎ ኦዳዱ።
13 ላባን ባረ ምቻት ናኣ ያቆባ ዎርያ ስሴዳ ሳናካ፥ አናና ጋከታናዉ ዎጼዳ። አ እድም የሪደ፥ ባረ ሶ አፌዳ። ያን ያቆብ ሀኔዳዋ ኡባ ላባናዉ ኦዴዳ። 14 ላባን አ፥ "ኔን ቱሙ ታ አሾነ ታ ሱ" ያጌዳ። ያቆብ አናና እት አግና ኩመን ኡቴዳ።
ያቆብ ራሄል ድራዉነ ልያ ድራዉ ላባዉ ኦዳ
15 ሄዋፐ ጉየ ላባን አ፥ "ኔን ታዉ ዳቦ ግዴዳ ድራዉ፥ ታዉ ጮ መላ ኦንዬ? አነ ነዉ አያ ጭጋናዉ በስንቶ ታዉ ኦዳ" ያጌዳ። 16 ላባናዉ ላኡ ማጫ ናናቱ ደኢኖ፤ ባይራት ሱንይ ልዮ፥ ቴፋትዌ ራሄሎ። 17 ልያ አይፍያና ጩጫ፤ ሽን ራሄላ ጌሳንቻነ ማላ ሎአ።
18 ያቆብ ራሄሎ ሲቂደ አ፥ "ታን ነ ቴፋ ናት ራሄል ድራዉ ነዉ ላፑን ላይ ኦና" ያጌዳ።
19 ላባን፥ "እዞ ሀራ አሳዉ እማናፐ ነዉ እምያዌ ሎአ፤ ኔን ታናና ሀዋን ደአ" ያጌዳ። 20 ሄዋ ድራዉ ያቆብ ራሄሎ አካናዉ ላፑን ላይ ኦዳ፤ ሽን እ እዞ ሲቅያ ድራዉ፥ አዉ አማሬዳ ጋላሳ ማላቴዳ።
21 ሄዋፐ ጉየ ያቆብ ላባና፥ "ታ ማቻቶ ታዉ እማ፤ ታ ዎዲ ፖለቴዳ፤ ታን እዞ አካናዉ ኮያድ" ያጌዳ። 22 ሄዋ ድራዉ ላባን ሄዋን ደእያ አሳ ኡባ ጼሲደ፥ ቡላቻ ከሴዳ። 23 ሽን ሳአይ ቃምና፥ እ ባረ ናቶ ልዮ አፊደ ያቆባዉ እሜዳ። ያቆብ እዞ አኬዳ። 24 ቃይ ላባን ባረ ቆማቶ ዝልፖ ባረ ናት ልይዉ ዳንጋጽረ ግዳናዳን እሜዳ።
25 ሳአይ ዎንትና ጼልያ ዎደ፥ ሄኮ ልዮ! ያትና ያቆብ ላባና፥ "ሀዌ ኔን ታ ቦላ ኦዳዌ አዬ? ታን ነዉ ኦዳዌ ራሄል ድራሳ ግደኔየ? ታና አያዉ ጭማድ?" ያጌዳ።
26 ላባን አ፥ "ኑ ቢታን ባይራታ ደእሽን፥ ቴፋቶ አስናዉ እምያዌ ዎጋ ግደና። 27 ሄ ምሽራ ሳምንታ ዉርሳ፤ ቃይ ቴፋትያኖካ ኑን ነዉ እማና፤ ሄዋፐ ጉየ፥ ሀራ ላፑን ላይ ታዉ ኦሳ" ያጌዳ።
28 ያቆብ ሄዋዳን ሀኒደ ሄ ሳምንታ ዉርሴዳ፤ ሄዋፐ ጉየ፥ ላባን ባረ ናቶ ራሄሎ አዉ እሜዳ። 29 ቃይ ላባን ባረ ቆማቶ ባሎ ባረ ናት ራሄልዉ ዳንጋጽረ ግዳናዳን እሜዳ። 30 ያቆብ ራሄሎ አኬዳ። ራሄሎ ልይፐ አደ ሲቄዳ። ሀራ ላፑን ላይ ላባናዉ ኦዳ።
ያቆባዉ ናናይ የለቴድኖ
31 መና ጎዳይ ልያ ሲቀታቤናዋ በኢደ፥ እዝዉ የልያ ኡሉዋ ዶዬዳ፤ ሽን ራሄላ ማንቶ። 32 ልያ ሻሃራደ አቱማ ናኣ የላዱ። አ ሱንካ ሮቤላ29:32 ሮቤላ፦ ሀ ሱን ብርሸይ "ሀሹ! አቱማ ናኣ!" ዎይ "ታ መቱዋ በኤዳ" ግያዋ። ሱንዱ፤ አያዉ ጎፐ እዛ፥ "መና ጎዳይ ታ መቱዋ በኤዳ፤ ሀእ ቱሙ ታና ታ አስናይ ሲቃና" ያጋዱ።
33 እዛ ሀራካ ሻሃራደ አቱማ ናኣ የላዱ። እዛ፥ "መና ጎዳይ ታን ሲቀታቤናዋ ስሴዳ ድራዉ፥ ታዉ ሀዋካ ጉጄዳ" ያጋደ፥ አ ስሞና29:33 ስሞና፦ ሀ ሱን ብለይ እብራዌዋን፥ "ስሴዳ" ግያዋ። ሱንዱ።
34 አ ሀራካ ሻሃራደ አቱማ ናኣ የላዱ። እዛ፥ "ታን አዉ ሄዙ አቱማ ናና የሌዳ ድራዉ፥ ታ አስናይ ሀእ ታናና ዋጸታና" ያጋደ፥ አ ሌዊ29:34 ሌዊ፦ ሀ ሱን ብለይ እብራዌዋን፥ "ዋጸታና" ግያዋ። ሱንዱ።
35 አ ሀራካ ሻሃራደ አቱማ ናኣ የላዱ። እዛ፥ "ሀችዋን ታን መና ጎዳ ጋላታና" ያጋዱ። ሄዋ ድራዉ አ ይሁዳ29:35 ይሁዳ፦ ሀ ሱን ብለይ እብራዌዋን፥ "ጋላታ" ግያዋ። ሱንዱ። ሄዋፐ ጉየ የሉዋ ኤሳዱ።