ዮሴፎ ግብጼ ካትያ አኩሙዋ ብሌዳ
1 ላኡ ላይ ኩመንይ አዳ ዎደ፥ ግብጼ ካቲ አኩሙዋ አኩመቴዳ፤ አኩሙዋን እ ናይለ ሻፋ ዶናን ኤቄዳ፤ 2 ላፑን ኦርደነ ሞ ሚዛቱ ናይለ ሻፋፐ ከስ ዎደ፥ ማቃ ግዱዋን ምያዋንታ በኤዳ። 3 ኡንቱንቱፐ ስሚደ፥ ሀራ ላፑን ማላ ኢታነ ግልቃ ሚዛቱ ናይለ ሻፋፐ ከሴድኖ፤ ሻፋ ዶናን ደእያ ሀራ ሚዛቱ ማታን ኤቄድኖ። 4 ሄ ማላ ኢታነ ግልቃ ሚዛቱ ላፑን ኦርዳነ ሞ ሚዛቱዋ ሜድኖ። ሄዋፐ ጉየ ካቲ ቤጎቴዳ።
5 እ ዛረ ገምእሺደ፥ ላኤን አኩሙዋካ አኩመቴዳ፤ ላፑን ሎአነ ሙሩታ ትሻቱ እት አኑዋን ድጬድኖ። 6 ኡንቱንቱፐ ስሚደ፥ ጬጨዳነ አዋይ ዶልያ ባጋ ጫርኩዋን ሹሌዳ ሀራ ላፑን ትሻቱ ከሴድኖ። 7 ሄ ጬጬዳ ትሻቱ ሎአነ ሙሩታ ትሻቱዋ ምቴድኖ። ሄዋፐ ጉየ ካቲ ቤጎቲደ፥ አኩሙዋ ግድያዋ ኤሬዳ። 8 ሳአይ ዎንትና፥ አ ዎዛናይ ሻቢረቴዳ፤ ሄዋ ድራዉ ግብጼን ደእያ ብትያዋንቱ ኡባዉነ አዳ ኤራንቻቱዋ ኡባዉ ኪቲደ ጼስሴዳ፤ ካቲ ኡንቱንቶ ባረ አኩሙዋ ኦዴዳ፤ ሽን አዉ ሄ አኩሙዋ ብርሽያዌ ዬዳ።41:8 ዳኔላ 2:2
9 ኤሳ ትግያዋንቱ ካፑ ሄ ዎደ ግብጼ ካትያ ሀዋዳን ያጌዳ፤ "ታን ታ ባይዙዋ ሀቼ ሀሳያይ። 10 እት ገደ ካቲ ባረ ቆማቶ ሀንቀቲደ፥ ታናነ ኡክ ኡክያዋንቱ ካፑዋ ቃሾ ጎለን የጌዳ። 11 ያን ደኢደ ኑን ሁጲያን ሁጲያን አኩሙዋ አኩመቴዶ፤ አኩሞ ዱማ ዱማ ብርሸይ ደኤ። 12 ሄ ዎደ ናግያዋንቱ ካፑ፥ ቆማይ፥ እብራዌ ዎዳላይ ኑናና ቃሾ ጎለን ደኤ። ኑን ኑ አኩሙዋ አዉ ኦዴዶ፤ እ ኑዉ ሁጲያን ሁጲያን አኩሙዋ ብርሼዳ። 13 ያንና ሄ የዎቱ እ ኑዉ ብሌዳዋዳንካ ሀኔድኖ። ሄዌ አዬ ጎፐ፥ ታን ታ ሱንተዉ ስማድ፤ ህንኮ ብታኒ ካቀቴዳ" ያጌዳ።
14 ግብጼ ካቲ ዮሴፎዉ ኪቲደ ጼስሴዳ። ኡንቱንቱ አ ቃሾ ጎልያፐ ኤለካ አሄድኖ። እ ሜደቲደ ባረ ማዩዋ ላሚደ፥ ካትያኮ ገሌዳ። 15 ካቲ ዮሴፎ፥ "ታን አኩሙዋ አኩመታድ፤ ሽን አ እቱነ ብላናዉ ዳንዳይቤና። ሽን ታን፥ ‘ዮሴፎ አኩሙዋ ስሶፐ፥ ብላናዉ ዳንዳዬ’ ግያዋ ስሳድ" ያጌዳ።
16 ዮሴፎ፥ "ታን ሄዋ ዳንዳይከ፤ ሽን ጾሳይ ካትያዉ ልከ ብርሸ እማና" ያጌዳ።
17 ካቲ፥ "ታን ታ አኩሙዋን ናይለ ሻፋ ዶናን ኤቃ ደእሽን፥ 18 ላፑን ኦርዳነ ሞ ሚዛቱ ናይለ ሻፋፐ ከሲደ፥ ማቃ ግዱዋን ሚኖ። 19 ኡንቱንቱፐ ስሚደ፥ ሀራ ላፑን ማላ ኢታ፥ ግልቃነ ላፋ ሚዛቱ ከሴድኖ፤ ታን ሄዋ ማላ ማላ ኢታ ሚዛ ግብጼ ጋድያን ኡባካ በአ ኤርከ። 20 ማላ ኢታነ ላፋ ሚዛቱ ኮይሮዋንታ፥ ላፑን ሞ ሚዛቱዋ ሜድኖ። 21 ሽን ኡንቱንታ ሜዳዋፐ ጉየና፥ ኡንቱንቱ ሜዳዋ ኦንነ ኤራናዉ ዳንዳይቤና፤ አያዉ ጎፐ፥ ኡንቱንቱ ማላይ ካሰዋዳንካ ኢት ኡቴዳ። ሄዋፐ ጉየ ታን ቤጎታድ።
22 "ታን ታ አኩሙዋን ቃይ ላፑን ሎአነ ሙሩታ ትሻቱዋ እት አኑዋን ድጬዳዋንታ በኣድ። 23 ኡንቱንቱፐ ስሚደ፥ ጬጨዳነ አዋይ ዶልያ ባጋ ጫርኩዋን ሹሌዳ ሀራ ላፑን ትሻቱ ከሴድኖ። 24 ሄ ጬጬዳ ትሻቱ ላፑን ሎኦ ትሻቱዋ ምቴድኖ። ታን ሀ አኩሙዋ ብትያዋንቶ ኦዳድ፤ ሽን ታዉ አኩሙዋ ብልያዌ ቤትቤና" ያጌዳ።
25 ሄዋፐ ጉየ ዮሴፎ ግብጼ ካትያ፥ "ካትያ አኩሞቱ እቱዋ። ጾሳይ ባረ ኦና ሀንያዋ ካትያዉ ቆንጭሴዳ። 26 ሄ ላፑን ሎኦ ሚዛቱ ላፑን ላይቱዋ፤ ቃይ ላፑን ሎኦ ትሻቱ ላፑን ላይቱዋ፤ ሀ አኩሙ እቱዋ። 27 ሄ ላፑን ማላ ኢታነ ላፋ ሚዛቱ ላፑን ላይቱዋ፤ ቃይ አዋይ ዶልያ ባጋ ጫርኩዋን ሹሌዳ፥ ጬጮ ላፑን ትሻቱ ላፑን ኮሻ ላይቱዋ።
28 "ታን ካትያዉ ኦዴዳዋዳንካ፥ ጾሳይ ባረ ኦና ሀንያዋ ካትያዉ በሴዳ። 29 ላፑን ዳሮ ካሎ ላይቱ ግብጼ ቢታዉ ኡባዉ ያና፤ 30 ሽን ላፑን ኮሻ ላይይ ሄዋ ካላና። ሄ ዎደ ግብጼ ካሉ ኡባይ ዶገታና፤ ኮሻይ ቢታ ጺጻና። 31 ሄ ቢታ ካሉ ሀሳየተናን አታናዋ፤ አያዉ ጎፐ፥ ሄዋ ካሌዳ ኮሻይ ሎይ ሱላና። 32 ላኡ ኦግያን ካትያዉ ሄ አኩሙ ቤቴዳዌ አያሴ ጎፐ፥ ሀ የዉዋ ጾሳይ ምንሲደ ቃቾ ድራሳ፤ ጾሳይ ሄዋ ኤለካ ኦና።
33 "ሀእ ስም፥ ካቲ አዳ ኤራንቻነ ጭንጫ አሳ ኮዪደ፥ ግብጼ ቢታን ሱን። 34 ካቲ ቢታን ሱንቱዋ ላፑን ካሎ ላይን ቡክያ ካፐ እቼሹ ኩሽያፐ እቱዋ ሺሻናዉ ሱን። 35 ኡንቱንቱ ይያ ካሎ ላይቱዋን ካ ሺሺደ፥ ካትያ አዎተን ምንጅኖ፤ ሄ ካ ካታማቱዋን ናግኖ። 36 ቢታይ ኮሻን የና ማላ፥ ሀ ካይ ግብጼ ቢታን ላፑን ላይን ደንዳና ኮሻዉ ምንጀቲደ ደኦ" ያጌዳ።
ካቲ ዮሴፋ ግብጼ ቢታ ኡባ ቦላን ሱንዳ
37 ሀ የዉ ግብጼ ካትያዉነ አ ኦሳንቻቶ ሎአ ግዲደ ቤቴዳ። 38 ሄዋ ድራዉ ካቲ ኡንቱንታ፥ "ኑን ጾሳ አያናና ደእያ ሀዋ ማላ ሀራ አሳ ደማኔየ?" ያጊደ ኦቼዳ።
39 ሄዋፐ ጉየ ካቲ ዮሴፎ፥ "ጾሳይ ሀዋ ኡባ ኔና ኤርሴዳ ድራዉ፥ ነ ማላ አዳ ኤራይነ ጭንጫተይ ደእያዌ ኦንነ ባዋ። 40 ታን ኔና ታ ጎለን ሱንይ፤ ታ አሳይ ኡባይ ነዉ አዛዘታና፤ ታን ኔፐ አያዌ ታ ካዉተ አራታ ጻላላና ግዶ" ያጌዳ።41:40 ኪታ 7:10
41 ሄዋ ድራዉ ካቲ ዮሴፎ፥ "በአ፤ ታን ኔና ግብጼ ጋድያ ኡባ ቦላን ሱንድ" ያጌዳ። 42 ሄዋፐ ጉየ፥ ካቲ ባረ ፓራምያ ምግዱዋ ባረ ብራያፐ ከሲደ፥ ዮሴፎ ብራያን ዎዳ። ታልባፐ ዳደቴዳ ማዩዋ እ አ ማይዚደ፥ አ ቆያንካ ዎርቃ ሳንሳላታ አዳ።41:42 ዳኔላ 5:29 43 ካቲ ባረ ላኤን ፓራ ጋርያ ዮሴፋ ቶግሴዳ፤ ቆማቱ፥ "ጎይንተ! ጎይንተ!" ያጊደ አፐ ስንና ሀመቴድኖ። ሀዋዳን ኦደ፥ ካቲ አ ግብጼ ቢታ ኡባ ቦላን ሱንዳ።
44 ሄዋፐ ጉየ ካቲ ዮሴፎ፥ "ታን ካትያ፤ ሽን ኔን ደን ጌናን ግብጼ ቢታ ኡባን ኦንነ ኩሽያ ዎይ ገድያ ደንና" ያጌዳ። 45 ካቲ ዮሴፋ፥ "ጻፍናት-ፓእናሀ" ጊደ ሱንዳ፤ እ አዉ ኦና ግያ ካታማ ቄስያ ጶጽፋራ ናቶ አስናቶ ማቼ ኦ እሜዳ። ያትና ዮሴፎ ግብጼ ቢታ ኡባ ሳና አዳ።
46 ዮሴፎ ግብጼ ካትያዉ ኦናዉ ዶምያ ዎደ፥ አዉ ላይይ ሀታማ። ቃይ ዮሴፎ ካትያ ስንፐ ከሲደ፥ ግብጼ ቢታ ኡባ ግዱዋ ሀመቴዳ። 47 ሄ ላፑን ካሎ ላይቱዋን ቢታይ ዳሮ ካ ዶሌዳ። 48 ዮሴፎ ግብጼ ቢታን ሄ ላፑን ካሎ ላይ ካ ኡባ ሺሺደ፥ ካታማቱዋን ምንጄዳ። እት እት ካታማ ዩሹዋን ደእያ ጎሻ ካ ኡባ ሄ ካታማቱዋን ምንጄዳ። 49 ዮሴፎ አባ ሻፍያ ኬሻ ዳሮ ካ ምንጄዳ፤ ካይ ዳርና፥ ማካናዉ ዳንዳይቤና ድራዉ፥ ማክ ማክ ቆልያዋ አግ ባሼዳ።
50 ኮሻ ላይይ ያናፐ ካሰ፥ ኦና ካታማ ቄስያ ጶጽፋራ ናት አስናትፐ ዮሴፎ ላኡ አቱማ ናና የሌዳ። 51 ዮሴፎ ባረ ባይራ ናኣ ምናሳ41:51 ምናሳ፦ እብራዌዋን ጾሳይ ታ መቱዋ ኡባነ ታ አዉዋ ሶ አሳ ኡባ ዶግሴዳ ግያዋ። ሱንዳ። 52 ላኤን ናኣ ኤፍሬማ41:52 ኤፍሬማ፦ ሀ ሱን ብለይ እብራዌዋን "ጾሳይ ታን ቱጋቴዳ ቢታን ታና አይፍሴዳ" ያግያዋ። ሱንዳ።
53 ግብጼ ቢታን ደእያ ሄ ላፑን ካሎ ላይቱ ዉሬድኖ። 54 ቃይ ዮሴፎ ኦዴዳዋዳን ላፑን ኮሻ ላይቱ ዶሜድኖ። ሀራ ቢታን ኡባን ኮሻይ ደንዴዳ፤ ሽን ግብጼ ቢታ ኡባን ካይ ደኤ።41:54 ኪታ 7:11 55 ግብጼ ቢታይ ኡባይ ኮሻቴዳ ዎደ፥ አሳይ ካዉ ካትያ ዋሴዳ። ካቲ ግብጼ አሳ ኡባ፥ "ዮሴፎኮ ቢተ፤ እ ኦድያዋ ኦተ" ያጌዳ።41:55 ዮሃ. 2:5
56 ኮሻይ ግብጼ ቢታ ኡባ ጋኬዳ ዎደ፥ ዮሴፎ ካ ምንጄዳ ጎልያ ኡባ ዶዪደ፥ ካ ግብጼ አሳዉ ዛልኤዳ፤ አያዉ ጎፐ፥ ግብጼን ኮሻይ ፐንቴዳ። 57 ሳኣ ኡባን ኮሻይ ጺጽ ደእያ ድራዉ፥ ሳኣን ደእያ አሳይ ኡባይ ካ ዮሴፎፐ ዎማናዉ ግብጼ ዬዳ።