Juízes 9

አብመሌካ

1 ጌዶና ናአይ አብመሌክ ሰኬማ ካታማን ደእያ ባረ ዳይ ዳቦቱዋኮ ቤዳ፤ ኡንቱንታነ ባረ ዳይ ዘረ ኡባቱዋ ሀዋዳን ያጌዳ፤ 2 "አነ ሰኬማ ካታማን ደእያ አሳ ኡባ ሀዋዳን ያጊደ ኦችተ፤ ‘ጌዶና ላፑን ታሙ ናናይ ኡባይ ህንተንታ ሞዶፐ ሎኤየ? ዎይ እት አሳይ ሞዶፐ ሎኤ?’ ያጊደ ኦችተ። ታን ህንተዉ አሹዋን ማታ ዳቦ ግድያዋ ቃይ ዶጎፕተ" ያጌዳ።

3 ሄዋፐ ጉየ እዝ ዳይ ዳቦቱ ሀ ቃላ ኡባ አ ድራዉ ሰኬማ ካታማ አሳዉ ኦዴድኖ፤ አብመሌክ ኡንቱንቶ ዳቦ ግዴዳ ድራዉ፥ ሰኬማ አሳይ አ ካላናዉ ቆፋ ቃቼዳ። 4 ያጊደ ኡንቱንቱ ባኣል-ባሪታ ኤቃ ጎልያፐ ላፑን ታሙ ጻጋራ ብራ አኪደ፥ አዉ እሜድኖ።

አብመሌክ ሄ ብራን ሹፉሮቱዋነ ቦንቂያዋንታ ቃጻሪደ፥ ባረና ካላናዳን ኦዳ። 5 ኦፍራ ግያ ሳን ደእያ ባረ አዉዋ ሶ ቢደ፥ ባረ እሻቱዋ፥ ጌዶና ናና ላፑን ታማቱዋ፥ እት ሹቻ ቦላን ሲፍሴዳ። ሽን ጌዶና ናአይ፥ ዉርሰ ቴፋይ፥ ዮኣታመ ቆሰቲደ፥ ሀይቀናን አቴዳ። 6 ሄዋፐ ጉይያን፥ ሰኬማ አሳይነ ቤትሚሎ አሳይ እትፐ ሺቂደ፥ ሰኬማን ደእያ ጎይንያ ዎላ ቱሳኮ ቤድኖ፤ ያን አብመሌካ ካተዬድኖ።

7 ዮኣታመ ሄዋ ስሴዳ ዎደ፥ ቢደ ጋሪዛማ ደርያ ጼራ ከሲደ፥ ባረ ቃላ ቁ ኦደ፥ ሀዋዳን ያጊደ ዋሴዳ፤ "ህንተንቶ ሰኬማ አሳቶ፥ ህንተንቱ ታን ኦድያዋ ስስተ! ጾሳይካ ህንተንቱ ኦድያዋ ስሳናዋ።

8 "እት ጋላስ ምቱ ኡባይ ሺቂደ፥ ባረንቱ ቦላ ካትያ ካተያናዉ ቢደ ዎጋራ፥ ‘ሃያ፥ ኑ ቦላ ካተታ’ ያጌድኖ። 9 ሽን አትክልትያ ሳአይ፥ ‘ታ ህንተንቱ ቦላ ካተታና ኮሽያዋ ግዶፐ፥ ጾሳቱዋነ አሳቱዋ ቦንችስያ ታ ዛይትያ እምያዋ አጋይ ግያዋ’ ያጊደ ዛሬዳ።

10 "ሄዋፐ ጉይያን፥ ምቱ ባላስያ ጌተትያ ም፥ ‘ሃያ፥ ኑ ቦላ ካተታ’ ያጌድኖ። 11 ሽን ባላሲ፥ ‘ታ ህንተንቱ ቦላ ካተታና ኮሽያዋ ግዶፐ፥ ማልእያ ሎኦ አይፍያ አይፍያዋ አጋይ ግያዋ’ ያጊደ ዛሬዳ።

12 "ያትና፥ ምቱ ዎይንያ ቱራ፥ ‘ሃያ፥ ኑ ቦላ ካተታ’ ያጌድኖ። 13 ሽን ዎይንያ ቱራይ፥ ‘ታ ህንተንቱ ቦላ ካተታና ኮሽያዋ ግዶፐ፥ ጾሳቱዋነ አሳቱዋ ናሸችያ ዎይንያ ኤሳ እምያዋ አጋይ ግያዋ’ ያጊደ ዛሬዳ።

14 "ያትና፥ ዉርሰን ምቱ ኡባይ ካሽያ፥ ‘ሃያ፥ ኑ ቦላ ካተታ’ ያጌድኖ። 15 ሄዋፐ ጉየ ካሺ፥ ‘ህንተ ቱሙፐ ታና ህንተንቱ ቦላ ካተያናዉ ኮዮፐ፥ ሃ ዪደ ታ ኩዋን ሸምፕተ። ሄዋ ህንተንቱ እጾፐ፥ ካሺያፐ ታማይ ከሲደ፥ ሊባኖሳ ዝጋቱዋ ሞ’ ያጌዳ።

16 "አብመሌካ ህንተንቱ ካተዬዳዌ ቱማተንነ ሱረተነ? ጌዶን ህንተንቶ ኦዳዋ አኬኪደ፥ አ ጎለ አሳዉ በስያዋዳን ኩሽያ ዛሬድቴ? 17 ታ አዉ ህንተንቶ ኦለቴዳዋ አኬክተ፤ ሚድያማ አሳፐ ህንተንታ አሻና ያጊደ፥ ባረና ሀይቆ አደ እሜዳ። 18 ሽን ህንተንቱ ሀቼ ታ አዉዋ ጎልያ አሳ ቦላን ደንዲደ፥ አ ላፑን ታሙ ናና እት ሹቻ ቦላን ሲፌድታ፤ ጌዶን ቆማትፐ የሌዳ አብመሌክ ህንተንቶ ዳቦ ግዴዳ ድራዉ፥ ሰኬማን ካተዬድታ። 19 ሀእ ስም ጌዶናዉነ አ ጎልያ አሳቶ ህንተንቱ ኦዳ ኪታይ ቱማተናነ ሱረተና ግዶፐ፥ አብመሌካና እትፐ ናሸትተ፤ እካ ህንተናና ናሸቶ። 20 ሽን ሄዋ ግዳና ዮፐ፥ አብመሌካፐ ታማይ ከሲደ፥ ሰኬማ አሳነ ቤትሚሎ አሳ ሞ፤ ሄዋዳንካ ቃይ፥ ሰኬማ አሳፐነ ቤትሚሎ አሳፐ ታማይ ከሲደ፥ አብመሌካ ሞ" ያጌዳ። 21 ዮኣታመ ባረ እሻ አብመሌካዉ ያዬዳ ድራዉ፥ ባቃቲደ ባኤራ ግያ ሳኣ ቢደ ያን ደኤዳ።

22 አብመሌክ እስራኤልያ ጋድያን ሄዙ ላይ ካተቴዳ። 23 ሄዋፐ ጉይያን፥ ጾሳይ አብመሌካፐነ ሰኬማ አሳፐ ግዱዋን ኢታ አያና ኪቴዳ፤ ሰኬማ አሳይ አብመሌካ ቦላ አማነተናን እጺደ ደንዴዳ። 24 ጾሳይ ሄዋ ኦዳዌ፥ አብመሌክ ባረ እሻቱዋ ዎዳ ድራሳነ ጌዶና ላፑን ታሙ ናና ሱ ሀሉዋ እ ጭገታናዳን ሰኬማ አሳይ አ ምንዳ ድራሳ። 25 ሰኬማ አሳይ አማሬዳ አሳ ዶሪደ፥ ደርያ ጼራን አብመሌካ ቦላ ሙጊደ ኡታናዳን ኦዳ። ሙግ ኡቴዳዋንቱ ኦግያና መንያ አሳ ኡባ ቦንቄድኖ፤ አብመሌክ ሄዋ ኡባ ስሴዳ።

26 ሄዋፐ ጉይያን፥ ኤቤዳ ናአይ ጋኣል ባረ እሻቱዋና ሰኬማ ዬዳ፤ ሰኬማ አሳይ አን አማነቴዳ። 27 ኡባይካ ባረንቱ ጋደ ቢደ፥ ዎይንያ ቴራ ማጼድኖ፤ ዎይንያ ኤሳ አጊደ፥ ዎልቃማ ባላ ከሴድኖ። ባረንቱ ኤቃ ጎልያ ገሊደ፥ ያን ሚድነ ኡሺደ አብመሌካ ሸቄድኖ። 28 ኤቤዳ ናአይ ጋኣል፥ "ኑን ሰኬማ አሳይ ሞደታናዉ አብመሌክ ኦኔ? እ ጌዶና ናኣ ግደኔ? ዛቡልካ ሀ ካታማ ሞዳናዳን አብመሌክ ሱንዳዋ ግደኔ? ሄዋፐ ሸኬማ አዉዋ ሀሞራ ዛረቶ አነ ሞደቴቶ። 29 ሀ አሳ ካለያዌ ታና ግዳርክታሻ! ያትንቶ ታን አብመሌካ ድጋና ሽን። አብመሌካ ጼሳደ፥ ‘ነ ኦላንቻቱዋ ዳርሳ አካደ፥ ኦለታናዉ ሃያ’ ያጋና ሽን" ያጌዳ።

30 ኤቤዳ ናአይ ጋኣል ጌዳዋ ካታማ ሞድያ ዛቡል ስሴዳ ዎደ፥ ሀንቁዋ ኤጽ ከሴዳ፤ 31 ያቲደ አሩማ ካታማን ደእያ አብመሌካኮ አሳ ኪቴዳ። ሄዋፐ፥ "ኤቤዳ ናአይ ጋኣልነ አ እሻቱ ሰኬማ ዬድኖ፤ ካታማን ደእያ አሳ ነ ቦላ ደንድኖ። 32 ሄዋ ድራዉ፥ ኔንነ ኔናና ደእያ አሳይ ቃማን ደንዲደ፥ ሾይቃን ሙጊደ ናግተ። 33 ዎንታ ጉራ አዋይ ኬሲያ ዎደ፥ ኡንቱንቱ አኬከናን ካታማ ቦላ ዎራጅተ፤ ጋኣልነ አናና ደእያ አሳይ ህንተንታ ኦላናዉ ከስያ ዎደ፥ ህንተንቶ ሀኔዳ ኬሻ ምኒደ ኦለትተ" ያጌዳ።

34 አብመሌክነ አናና ደእያ አሳይ ኡባይ ቃማን ደንዲደ፥ ሰኬማፐ ካረና ኦይዱ ጭታን ሻከቲደ ሙጌድኖ። 35 አብመሌክነ አናና ደእያ አሳይ ኤቤዳ ናአይ ጋኣል ከሲደ፥ ካታማ ገልያ ፐንግያን ኤቄዳዋ በኢደ፥ ቆሰቴዳ ሳፐ ከሴድኖ። 36 ጋኣል አሳ በኤዳ ዎደ ዛቡላ፥ "ጼላ! አሳይ ደረቱዋ ሁጲያፐ ዎ" ያጌዳ።

ሄዋፐ ጉየ ዛቡል፥ "ሄዋንቱ አሳ ግድክኖ፤ ደረቱዋ ኤሹ አሳ ማላትያዋ በኣደ ጋዳ" ያጊደ ዛሬዳ።

37 ጋኣል ዛረደ፥ "ጼላ! አሳይ ደርያዉ ግዱዋ ኦይቂደ ዎ፤ ሀራ ጭታይ ቃይ ሻሬቻቱ ዎላይ ደእያ ኦግያና ዬ" ያጌዳ።

38 ያትና፥ ዛቡል ጋኣላ፥ " ‘ኑን አዉ ሞደታናዉ አብመሌክ ኦኔ?’ ያጌዳ ነ ዶናይ ሀእ ሀቃ ቤዴ? ሀዋንቱ ኔን ካዳ አሳቱዋ ግድክኖየ? ሀእ ከሳደ ኡንቱንቱና ኦለታ!" ያጌዳ። 39 ሄዋፐ ጉየ ጋኣል ሰኬማ አሳ ካለ ከሲደ፥ አብመሌካና ኦለቴዳ። 40 አብመሌክ የደርስና፥ ጋኣል ባቃቴዳ፤ ካታማ ገልያ ፐንግያ ጋካናዉ ዳራቱ ደሸቲደ ኩንዴድኖ። 41 አብመሌክ አሩማን ደእና፥ ዛቡል ጋኣላነ አ እሻቱዋ ሰኬማፐ የደርሲደ ከሴዳ።

42 ዎንተ ጋላስ ሰኬማ አሳይ ጎሻዉ ቤዳዋ አብመሌክ ስሴዳ፤ 43 ባረ አሳ አኪደ፥ ሄዙ ጭታን ሻክ፥ ሾይቃን ሙጊደ ናጋናዳን ኦዳ። ያቲደ አሳይ ካታማፐ ከስያዋ በኤዳ ዎደ፥ ኡንቱንታ ዎናዉ ቆሰቴዳ ሳፐ ከሴዳ። 44 አብመሌክነ አናና ደእያ ጭታይ ስንዉ ዎጽ ቢደ፥ ካታማ ገልያ ፐንግያን ኤቄድኖ፤ አቴዳ ላኡ ጭታቱ ጎሻን ደእያ አሳቱዋ ኦለቲደ ዎድኖ። 45 ጋላሳ ኡባ አብመሌክ ካታማ አሳና ኦለቲደ ካታማ ኦይቄዳዋፐ ጉይያን፥ ካታማን ደእያ አሳ ኡባ ዎዳ። ያቲደ ካታማ ክንቼዳ፤ ኡባ ጋድያ ቦላ ማጽንያ ዘሬዳ።

46 ሰኬማ አዱሳ ግምቢያ ግዱዋን ደእያ አሳይ ኡባይ ሄዋ ስሴዳ ዎደ፥ ኤል-ባሪታ ኤቃ ጎለን ደእያ ጌሱዋ ግዶ ገሌዳ። 47 ኡንቱንቱ ሄ ሳኣን ሺቄዳዋ አብመሌክ ስሴዳ። 48 እነ አናና ደእያ አሳይ ኡባይ ደርያ ጻልሞና ፑደ ከሴድኖ። አብመሌክ ካልታ አኪደ፥ ም ታሽያ ቃንጺደ፥ ባረ ሀሽያን ቶኬዳ፤ ባረናና ደእያ አሳቱዋ፥ "ታን ኦሽን በኤዳዋ፥ ህንተንቱካ ኤለካ ሀእ ኦተ" ያጌዳ። 49 ሄዋፐ ጉየ አሳይ ኡባይካ ም ታሽያ ቃንጽ አኪደ፥ አብመሌካ ካሌዳ፤ ሄ ታሸቱዋ ጌሱዋ ዩሹዋን ዘምፔስ ዎደ፥ አሳይ አ ግዶን ደእሽን ታማ ኦይድኖ፤ ያትና፥ ጌሱዋ ግዶን ደእያ አሳይ ኡባይ ሀይቂ ዉሬዳ። ሀይቄዳ አቱማ አሳነ ማጫ አሳ ፓይዱ እት ሻኣ ግዳናዋ።

50 ሄዋፐ ጉይያን፥ አብመሌክ ተበጻ ጌተትያ ካታማ ቢደ፥ ካታማ ዶዲደ ኦይቄዳ። 51 ሄ ካታማ ግዶን እት ምኖ አዱሳ ግምቢ ደኤ። ካታማ አሳይ ኡባይ፥ ማጫዌ አቱማዌ፥ ካለያዋንቱ አተናን ሄ አዱሳ ግምቢያኮ ያ ዎጺደ፥ አ ግዶ ገሌድኖ፤ ፐንግያ ጎርዲደ፥ ግምቢያ ቦላ ደምባዪደ ኬጼድኖ ፑደ ከሴድኖ። 52 አብመሌክ ኦለቲደ አዱሳ ግምቢያ ጋኪደ፥ ታማን ጹጋናዉ ፐንግያኮ ሺቄዳ። 53 ሽን እት ምሽራታ አብመሌካ ሁጲያን ዎጻ ማይድያ ጎንዶርሳ ኦላደ፥ አ ጉግያ ሆምፑ ኦዱ።✝9:53 2 ሳሜላ 11:21 54 ባረ ኦላ ሚሻ ቶክያ ዎዳላ ኤለካ ጼጊደ፥ "ታና አሳይ፥ ‘ኤበላ ማጫውና ዎዱ’ ጌና ማላ፥ ነ ማሻ ሾኩዋፐ ሾዳደ፥ ታና ዎ" ያጌዳ። ሄዋፐ ጉየ ዎዳላይ ማሻን ጫዲና እ ሀይቄዳ። 55 እስራኤልያ አሳይ ኡባይ አብመሌክ ሀይቄዳዋ በኢደ፥ ባረ ሶ ባረ ሶ ቤዳ።

56 አብመሌክ ባረ እሻቱዋ ላፑን ታማቱዋ ዎደ፥ ባረ አዉዋ ቦላ ኦዳ ጎምያ ጾሳይ አ ቦላ ዛሬዳ። 57 ሄዋዳንካ፥ ጾሳይ ሰኬማ አሳ ኢታተ ኡባ ኡንቱንቱ ቦላ ዛሬዳ። ሄዋዳን ሀኒደ፥ ጌዶና ናአይ ዮኣታመ ሸቄዳ ሸቃይ ኡንቱንታ ጋኬዳ።