Números 11

ጾሳፐ ዬዳ ታማ

1 አሳይ ባረ መቶ መና ጎዳ ቦላ ዙዙሜዳ፤ ኡንቱንቱ ዙዙሚና ጾሳይ ስሲደ፥ ሀንቁዋ ኤጽ ከሴዳ። ያትና መና ጎዳ ታማይ ኡንቱንቱ ግዱዋን ኤጺደ፥ ኡንቱንቱ ዱንካኔዳ ሳአዉ እት እት ጋጻ ባጋ ሜዳ። 2 ያትና አሳይ ሙሴዉ ዋስና፥ ሙሴ መና ጎዳ ዎሴዳ። ታማይ ቶኤዳ። 3 መና ጎዳ ታማይ ኡንቱንቱ ግዱዋን ኤጼዳ ድራዉ፥ ሄ ሳአይ ታብኤራ*11:3 ታብኤራ፦ ሀ ሱን ብለይ "ኤጼዳ" ግያዋ። ጌተት ጼሰቴዳ።

ሙሴ ላፑን ታሙ ካፓቱዋ ዶሬዳ

4 እስራኤላቱዋና ደእያ ዱማ ዱማ ጋደ አሳይ ሀራ ቁማ ሎይ አሞቴዳ። እስራኤልያ አሳይካ ቃይ ሀዋዳን ያጊደ ዬኩዋ ዶሜዳ፤ "ላ ኑን አሹዋ ሀቃፐ ደማኔ? 5 ኑን ግብጼ ጋድያን ሚሻ ጭገናን ጮ ምያ ሞልያ ሀሳዬቶ፤ ቃይ ቃይያ ምያ ፓራንጅያ ሌክያ፥ ዞልዶ ሌኪያ ማላትያ ማልእያ ሃይ ኩሜዳ ሜሎንያ፥ አዱሳ ፓራንጅያ ሱንቁሩትያነ ቱሙዋ ሀሳዬቶ። 6 ሽን ሀእ ኑ ቆ ጎርደቴዳ፤ ኑ አይፊካ ሀ ማናፐ አትና፥ ሀራባ አይነ በኤና" ያጌድኖ።

7 ማናይ ዴቡዋ አይፍያ ማላቴ፤ አ ማላይ ቦጽያ ም ጮሻ ማላቴ።✝11:7-8 ከሳ 16:31 8 አሳይ ዩይ ዩይ አ ቆሬ፤ ዎጻን ጋጬ፥ ዎይ ኡዱላን ጫዴ፤ ኡንቱንቱ አ ኦቱዋን ፐንትሲደ፥ ባሽያን ኮምፒኖ። እ ዛይትያን ሙናቂደ ኡኬዳ ኡክዳን ማልኤ። 9 ቃማ ዱንካኔዳሳን ጻሳይ ዎያ ዎደ፥ ማናይ አናና ዎ።✝11:9 ከሳ 16:13-15

10 አሳይ ባረ ዱንካንያ ፐንግያን ፐንግያን ዬክሽን፥ ሙሴ ስሴዳ። መና ጎዳ ሀንቁ ኤጽ ከሴዳ ድራዉ፥ ሙሴ ኡንኤቴዳ። 11 ሄዋ ድራዉ፥ ሙሴ መና ጎዳ ሀዋዳን ያጊደ ኦቼዳ፤ "ኔን ታ ቦላ ነ ቆማ ቦላ አያዉ ሀ መቱዋ አሃዲ? ኔን ታናን አያዉ ናሸታበይኪ? ኔን ሀ አሳ ኡባ ቶኩዋ ታ ቦላ አያዉ ዎዲ? 12 ሀ አሳ ኡባ ታን ሻሃራድታየ? ዎይ ኡንቱንታ ታን የላድታ? ‘ኔን ኡንቱንቱ ማይዛ አዋቶ፥ "ታን ህንተንቶ እማና" ጋደ ጫቄዳ ቢታ ጋናዉ፥ ናናቱዋ ድችያና ንያ ናኣ ባረ ክዉዋን እድምያዋዳን፥ ኔን ኡንቱንታ ነ ክዉዋን እድማ’ ያጋደ ታዉ አያዉ ኦዳይ? 13 ሀ አሳዉ ኡባዉ ታን አሹዋ ሀቃፐ ደማኔ? ኡንቱንቱ ታና፥ ‘ምያ አሹዋ ኑዉ እማ’ ያጊደ ዬኪኖ። 14 ታን ሀ አሳ ኡባ ታረካ ቶካና ዳንዳይከ፤ ቶኩ ታዉ ሎይ ዴጼ። 15 ስም ኔን ታና ሀዋዳን መቶታናዳን ኦናዋፐ ታዉ ቃረታደ ታና ሀእ ዎ ባሻ፤ ያቶፐ፥ ታን መቱዋፐ ሸምፓና" ያጌዳ።

16 መና ጎዳይ ሙሳ፥ "እስራኤልያ ጭማቱዋፐ ካለያዋንታነ ካፓቱዋ ግድያ፥ ኔን ኤርያ ላፑን ታሙ ጭማቱዋ ታዉ ሺሻ፤ ኡንቱንቱ ኔናና ያን ኤቃና ማላ፥ ጾሳ ዱንካንያኮ፥ ኡንቱንታ ኔን አያ። 17 ታን ዱገ ዎደ ኔናና ያን ሃሳያና፤ ታን ኔናን ደእያ አያናፐ አካደ፥ ሄ አያና ኡንቱንቱ ቦላ ዎና። ኔን ኔረካ ቶከና ማላ፥ ኡንቱንቱ አሳ ቶኩዋ ቶኪደ፥ ኔና ማዳና።

18 "ኔን አሳዉ ሀዋዳን ጋደ ኦዳ፥ ‘ዎንትዉ ህንተና ጌሽተ፤ ያቲደ ህንተ አሹዋ ማና። ህንተ፥ "ላ ኑን አሹዋ ሀቃፐ ደማኔ? ኑዉ ግብጼ ጋድያን ሳአይ ሎአ ሽን!" ያጊደ ዬኬዳዋ መና ጎዳይ ስሴዳ። መና ጎዳይ አሹዋ ሀእ ህንተንቶ እማና፤ እምና ህንተ ማና። 19,20 ህንተ ግዱዋን ደእያ መና ጎዳ ህንተ ካዳ ድራዉነ ህንተ፥ "ኑን ግብጼ ጋድያፐ አያዉ ከሴዶ?" ያጊደ አ ስንን ዬኬዳ ድራዉ፥ ህንተ እት ጋላሳ፥ ዎይ ላኡ ጋላሳ፥ ዎይ እቼሹ ጋላሳ፥ ዎይ ታሙ ጋላሳ፥ ዎይ ላታሙ ጋላሳ ጻላላ አሹዋ ሚክታ፤ ሽን ህንተንቶ ሲያና ከሳና ጋካናዉ፥ ህንተና ሳለና ጋካናዉ፥ እት አግና ኩመን ህንተ አሹዋ ማና’ ያጋ" ያጌዳ።

21 ሽን ሙሴ ጾሳ፥ "በአ፥ ታን ኡሱፑን ጼቱ ሻአ ግድያ አሳ ግዱዋን ደአይ፤ ኔን፥ ‘እት አግና ኩመን ኡንቱንቱ ማናዉ ኡንቱንቶ ታን አሹዋ እማና’ ጋዳ። 22 ሚዛ ዉድያነ ዶርሳ ዉድያ ኡንቱንቶ ሹክና ካልሳኔ? አባን ደእያ ሞልያ ኡባ ሺሽያዋ ግድንቶነ፥ ኡንቱንቶ ግዳኔ?" ያጌዳ።

23 መና ጎዳይ ሙሳ፥ "መና ጎዳ ኩሺ ቃንየ? ታን ነዉ ግያባይ ቱመንቶነ ዎርደንቶ ኔን ሀእ በአና" ያጌዳ።

24 ሙሴ ካረ ከሲደ፥ መና ጎዳይ ጌዳዋ አሳዉ ኦዴዳ። እ እስራኤልያ ጭማቱዋፐ ላፑን ታሙ አሳ ሺሺደ፥ ዱንካንያ ዩሹዋን ኤሴዳ። 25 መና ጎዳይ ሻሪያን ዱገ ዎደ፥ አናና ሃሳዬዳ፤ ያቲደ አ ቦላን ደእያ አያናፐ አኪደ፥ ሄ ላፑን ታሙ ጭማቱዋ ቦላ ዎዳ። አያናይ ኡንቱንቱ ቦላን ሸምፔዳ ዎደ፥ ኡንቱንቱ ትምቢትያ ኦዴድኖ። ሽን ሄዋፐ ጉይያን፥ ዛረደ ትምቢትያ ኦድበይክኖ።

26 ሄ ላፑን ታሙ ጭማቱዋና ማዝጎብያን ጻፈቴዳ አሳቱ ኤልዳዳነ መዳዳ ግያ ላአቱ ዱንካኔዳሳን አቴድኖ፤ ዱንካንያኮ ይበይክኖ፤ ሽን ኡንቱንቱ ቦላካ አያናይ ዎና፥ ዱንካኔዳሳን ትምቢትያ ኦዴድኖ። 27 እት ዎዳላይ ዎጽ ዪደ፥ ሙሳ፥ "ኤልዳድነ መዳድ ዱንካኔዳሳን ትምቢትያ ኦዲኖ" ያጊደ ኦዴዳ።

28 ባረ ያላጋተፐ ዶሚደ፥ ሙሳ ማድያ ኔዌ ናአይ ኢያሱ ሙሳ፥ "ታ ጎዳዉ ሙሴ፥ ኔን ኡንቱንታ ተአ" ያጌዳ።

29 ሽን ሙሴ አ፥ "ታ ግሻታ ነ ምሸታይ? መና ጎዳ አሳይ ኡባይ ትምቢትያ ኦድያዋነ መና ጎዳይ ባረ አያና ኡንቱንቱ ቦላ ዎያዋ ግዴረኔሻ!" ያጌዳ። 30 ሄዋፐ ጉይያን፥ ሙሴነ እስራኤልያ ጭማቱ ዱንካኔዳሳ ስሜድኖ።

31 ሄዋፐ ጉይያን፥ መና ጎዳይ ጫርኩዋ ደንና፥ አባ ባጋፐ አካ አሳይ ዱንካኔዳሳ ኡባ ዩሹዋኮ ጫርኩ አሄዳ፤ ሄ ካፎቱ ሳኣ ዶናና ጋድያፐ ፑደ ላኡ ዋ ኬሻን ፓሌድኖ። ዪደ ኡንቱንቱ ዱንካኔዳሳ ኡባፐ ጋጻና፥ እት ጋላሳ ኦገ ኬና ሳኣን ኡቴድኖ። 32 ሄ ጋላሳ ኡባን፥ ሄ ቃማ ኡባንነ ዎንተ ጋላሳ ኡባን አሳይ ካረ ከሲደ፥ ሀ አካቱዋ ኦይቂደ ሺሼዳ፤ ኡንቱንቱፐ ኦንነ እት ሻአ ኪሎ ግራመፐ ጉ ሺሽቤና። ኡንቱንቱ ሄዋፐ ጉይያን፥ ዱንካኔዳሳ ዩሹዋ ኡባን መልሳናዉ ምጬድኖ። 33 ሽን አሹ ብሮ ኡንቱንቱ ማታን ደእሽን፥ ኡንቱንቱ ጮሚደ ምተናን ደእሽን፥ መና ጎዳ ሀንቁ አሳ ቦላ ኤጽ ከሴዳ፤ ያትና መና ጎዳይ አሳ ዎልቃማ ቦሻን ሾጬዳ። 34 ያትና ሄ ሳአይ ክብሮት ሀታባ (አሙዋ ዱፉዋ) ጌተት ሱንቴዳ፤ አያዉ ጎፐ፥ አሹዋ አሞቴዳ አሳ ኡንቱንቱ ሄ ሳኣን ሞጌድኖ። 35 አሳይ ሄዋፐ ደንዲደ ሀጸሮታ ግያሳ ቢደ፥ ያን ዱንካኔዳ።