ጌይቤና አሳ
1 መና ጎዳይ ሙሳ ሀዋዳን ያጌዳ፦ 2 "ኔን እስራኤላቱዋ፥ ‘ህንተ ግዶን ዎልቃማ ጋልባ ሀርጊ ኦይቄዳ ኡራ፥ ዎይ ቦላፐ አያይኔካ ጎግያ ኡራ፥ ዎይ አሃ ኦይቂደ ቱኔዳ ኡራ ኦናካ ህንተ ዱንካኔዳ ሳኣፐ ከስ ድግተ’ ያጋደ አዛዛ። 3 ሄዌ ማጫዋ አቱማዋ ግድናካ ከስኖ። ታን ኡንቱንቱ ግዱዋን ደእያ ኡንቱንቱ ዱንካኔዳሳ ሄዋንቱ ቱንሰና ማላ፥ ኡንቱንቱ ዱንካኔዳ ሳኣፐ ከሳ የዳ" ያጌዳ። 4 መና ጎዳይ ሙሳ አዛዜዳዋዳን፥ እስራኤላቱ ኡንቱንቱ ኡባ ዱንካኔዳ ሳኣፐ ከሲደ የዴድኖ።
ናቁዋ አጫ
5 ሄዋፐ ጉይያን፥ መና ጎዳይ ሙሳ ሀዋዳን ያጌዳ፤5:5 ዎጋ 6:1-7 6 "ኔን እስራኤላቱዋ ሀዋዳን ያጋ፤ ‘እት አቱማ አሳይ ዎይ እት ማጫ አሳይ አይ ኦግያንነ ሀራ አሳ ናቆፐነ ሄዋን መና ጎዳዉ አማነተናን እጾፐ፥ ሄ ኡራይ ባይዛንቻ። 7 ሄዋ ድራዉ፥ እ ባረ ኦዳ ናጋራ ፓጾ፤ ባረ ባይዜዳዋ ኩመን ዛሪደ ጭጎ፤ ሄዋ ቦላካ እቼሸን ኩሽያ ጉጂደ፥ ባረ ናቄዳ ኡራዉ አጮ። 8 ሽን ሄ ናቀቴዳ ኡራይ ሀይቄዳዋ ግዶፐነ፥ አጫ አካናዉ አዉ ማታ ዳቡ ዮፐ፥ ሄ አጫይ መና ጎዳሳ። ሄ አጭያ አጫይ ናቄዳ ኡራይ ማረታናዉ ያርሾ እምያ ዶርሳ ኦርግያና እትፐ ቄስያዉ እመቶ። 9 ቃይ እስራኤላቱ ቄስያዉ እምያ ጌሻ እሙዋ ኡባይ ሄ ቄስያሳ። 10 እት እት አሳይ እምያ እሞታይ ሄ እሜዳ ኡራባ፤ ሽን ቄስያዉ እ እምያ እሞታይ ሄ ቄስያሳ’ ያጋ" ያጌዳ።
ባረ አስናን ስትያ ማቻትባ
11 ሄዋፐ ጉይያን መና ጎዳይ ሙሳ፥ 12 "ኔን እስራኤላቶ ሀዋዳን ያጋደ ኦዳ፤ ‘እት ኡራ ማቻታ ካረ ሀመታደ፥ አዉ አማነተናን እጻደ፥ 13 ሀራ አቱማ አሳና ግሶፐ፥ ቃይ ሄዋ እዛ ባረ አስናፐ ቆሶፐ፥ ማርካይ ባይናዋ ግዶፐነ፥ እዛ ሻርሙጻደ ኦይቀተናን አቶፐ፥ 14 እዛ ቱኔዳ ድራዉ፥ እ ጎልያዉ እዞ ስያዋ ግዳናዉ ዳንዳዬ፤ ዎይ እዛ ቱነናን ደእሽን፥ እ ባረ ማቻቶ ስያዋ ግዳናዉ ዳንዳዬ። 15 ያቶፐ፥ ሄ ብታኒ ባረ ማቻቶ ቄስያኮ አፎ፤ ቃይ እዝ ድራዉ ያርሻናዉ እት ኪሎ ግራመ ባንጋ ልያ አፎ። ሽን ልያ ቦላ ዛይትያ ትጎፖ፥ ዎይ እጻና አ ቦላ ዎፖ፤ አያዉ ጎፐ፥ ሄ ሊ እ ባረ ማቻቶ ስዳ ድራዉ ያርሽያ ካ ያርሾ፤ ቃይ ሄዌ ባይዙዋ ቆንጭስያ ያርሹዋ።
16 " ‘ሄዋፐ ጉይያን፥ ቄሲ ሄ ምሽራቶ ሺሺደ፥ መና ጎዳ ስንን ኤሶ። 17 አንጀቴዳ ሃ ኩይጻሩዋን አኮ። ሄዋፐ ጉይያን፥ ጾሳ ዱንካንያ ዉይግያን ደእያ ባና አኪደ፥ ሄ ሃን ጉጆ። 18 ሄ ምሽራቶ መና ጎዳ ስንን ኤሶ፤ ሄዋፐ ጉይያን፥ ሄ ምሽራት ሁጲያ ብሎ፤ ስዳ ድራዉ ያርሽያ እዝ ባይዙዋ ቆንጭስያ ካ ያርሹዋ እዝ ኩሽያን ዎ፤ ቃይ ሄ ቄሲ ባረ ኩሽያን ሸቃ አህያ ጫሞ ሃ ኩይጻሩዋና ኦይቆ። 19 ምሽራቶ ሀዋዳን ያጊደ ጫቀ፤ "ኔን ሀራ አቱማ አሳና ግሳቤናዋ ግዶፐነ፥ ነ አስና አጋደ ካረ ሀመታደ ቱናቤናዋ ግዶፐ፥ ሸቃ አህያ ሀ ጫሞ ሃይ ነዉ ጎመቶፖ። 20 ሽን ኔን ነ አስና አጋደ ካረ ሀመታደ ቱኔዳዋ ግዶፐነ፥ ሀራ አቱማ አሳና ግሴዳዋ ግዶፐ፥ 21 መና ጎዳይ ነ የሉዋ ጎልያ ጉንድስያዋንነ ነ ኡሉዋካ ጋፍስያዋን፥ ነ አሳን ኔና ሸቅሶ። 22 ሀ ሸቃ አህያ ሃይ ነ ኡሎ ግዶ ገሊደ ነ ኡሉዋ ጋፍሶ፤ ነ የሉዋ ኬካ ጉንድሶ" ያጊደ ጫቀ።
" ‘ምሽራታካ፥ "አመንእ፤ አመንእ" ያጉ።
23 " ‘ሄዋፐ ጉይያን፥ ቄሲ ሀ ሸቃቱዋ ጻጸቴዳ ማጻፋን ጻፎ፤ ሸቃቱዋ ጫሞ ሃ ግዶ ሜጮ። 24 ያቲደ ሸቃ አህያ ሄ ጫሞ ሃ ምሽራቶ ኡሾ፤ ሸቃ አህያ ሃይ ምሽራት ኡሉዋን ገሊደ፥ እዞ ጫሞ ሳኩዋ ሳካና። 25 ቄሲ ምሽራት ኩሽያፐ ስዳ ድራዉ ያርሽያ ካ ያርሹዋ አኪደ፥ ሄ ያርሹዋ መና ጎዳ ስንን ቃደ፥ ያርሽያ ሳኣ አሆ። 26 ቄሲ ካ ያርሹዋፐ ኮጵያዋ አኪደ ባይዛንቻ ግደከንቶ ቆንጭስያ ያርሹዋ ኦደ፥ ያርሽያሳን ጹጎ። ሄዋፐ ጉይያን፥ ምሽራቶ ሄ ሃ ኡሾ። 27 ሃ እዞ ኡሼዳዋፐ ጉይያን፥ ሀዋዳን ሀናና: እዛ ባረ አስናዉ አማነታና ያደ ቱኔዳዋ ግዶፐ፥ ሸቃ አህያ ሃይ እ ኡሉዋን ገሊደ፥ እዞ ጫሞ ሳኩዋ ሳካና፤ እዝ ኡሉካ ጋፋና፤ እዝ የሉዋ ጎሊካ ጉንዳና። እዛ ባረ አሳን ሸቀቴዳኖ ግዳና። 28 ሽን እዛ ቱናቤና ጽሎ ማጫ አሳ ግዶፐ፥ አ ሳሮ አታደ ናናቱዋ የላና።
29,30 " ‘እት አሳይ ባረ ማቻቶ ስያ ዎደ ኦና ዎጋይ ሀዋ። እዛ ካረ ሀመታደ ቱኖፐ፥ ዎይ እት አሳይ ባረ ማቻቶ ስፐ፥ መና ጎዳ ስንን እዞ ኤሲደ ቄሲ ሀ ዎጋ ኡባ እዝ ቦላ ፖሎ። 31 አስናይ ባይዙዋ ኡባፐ ሳሮ አታና፤ ሽን ማጫውኖ ባረ ናጋራ ጋሱዋን ይያዋ ቶካና’ ያጋ" ያጌዳ።