Leew, de jratste Gow
1 Wan ekj met Menschen un met Enjel-Tungen räd un hab nich Leew, dan sie ekj een schaulendet Messinkj un eene kjlinjende Zimbel jeworden. 2 Un wan ekj de Profezeiungs-Gow hab un aule Jeheemnissen un aule Erkjantnis weet, un wan ekj aulen Gloowen hab, soo daut ekj Boaj vesat, oba nich Leew hab, dan sie ekj nuscht. 3 Un wan ekj aul mien Haben fa de Oame toom Äten utdeel un jäw mienen Kjarpa han toom Vebrennen oba nich Leew hab, nuzt mie daut nuscht. 4 De Leew es jeduldich un frintlich; de Leew iewat nich; de Leew pucht sikj nich, see puft sikj nich opp; 5 see vehelt sikj nich onaunstendich, see sieekjt nich daut Äaje, see lat sikj nich vebetren, see räakjent daut Beese nich too, 6 see freit sikj nich äwa de Ojjerajchtichkjeit, oba see freit sikj äwa de Woarheit; 7 see vedrajcht aules, see jleeft aules, see hopt aules, see dult aules.