Marcos 6

Jesus jeft 5,000 Maun to äten

30 Un de Apostel saumelden sikj bie Jesus un berechten Am aules, waut see jedonen un jelieet hauden. 31 Un Hee säd to äant: Komt jie selfst oppoat no eene eensome Städ un reift een bät. Wiels daut wieren väle, dee doa kjeemen un jinjen, un see hauden nich mol Tiet*6:31 Ooda: Jeläajenheit. toom äten. 32 Un see fuaren em Schepp no eene eensome Städ oppoat; 33 un de Volkjshäaden sagen äant wajchfoaren; un väle kjanden Am un randen von aule Städa to Foot toop doahan un kjeemen äant veropp un vesaumelden sikj bie Am. 34 Un aus Jesus rutstieech, sach Hee eene groote Volkjshäad, un Am jaumad daut äwa äant, wiels see wieren soo aus Schop, dee kjeenen Hoad haben. Un Hee funk aun, äant välet to lieren.

35 Un aus daut nu oba aul lot jeworden wia, kjeemen siene Jinja no Am un säden: De Städ es eensom, un de Tiet es aul lot jeworden; 36 lot äant gonen, daut see hangonen runtom en daut Launt un Darpa un sikj Broot kjeepen, wiel see haben nuscht to äten. 37 Hee oba auntwuad un säd to äant: Jäft jie äant to äten. Un see säden to Am: Sell wie hangonen un fa twee-hundat Denarius Broot kjeepen un äant to äten jäwen? 38 Hee oba säd to äant: Wooväl Brood hab jie? Got han un seet no! Un aus see daut wisten, säden see: Fief, un twee Fesch. 39 Un Hee befool äant, daut see sikj aula sullen dolsaten, en Gruppen, opp daut jreene Graus. 40 Un see saden sikj en Gruppen dol, bie de hundat un bie de feftich. 41 Un Hee neem de fief Brood un de twee Fesch, kjikjt nopp nom Himmel, säajend un bruak de Brood un jeef dee siene Jinja, daut see äant dee väaläden; uk de twee Fesch vedeeld Hee mank äant aula. 42 Un see eeten aula un worden saut. 43 Un see hoowen opp twalw Kjarw voll von Brocken un von de Fesch. 44 Un dee doa von de Brood jejäten hauden, wieren soo bie fief-dusent Mana.