Ɛfishiya 5

Iŋɔma Iyi Oko Mbala Ɔnu

22 Eko lunyi la lo anu yi ma kyamate Ɔkwu tayi. 23 Moo ɔnu gba akwu u to keyi uwu oko wu le, kyamate bɔkɔ Okrasi gba akwu u to keyi uwu ɔshɔshi le awu. Okrasi mafyi wu gba akwu usama uwu ɔshɔshi le, uwu bɔkɔ akwu ɛnwu wu. 24 Tayi gba i yi le eko akwu mɛga kaa la lu lomo laa umba anu yi kyamate bɔkɔ ɔshɔshi mafyi wu e lomo laa Okrasi tayi.

25 Anu, la lu pwu idɛnyi iyi eko yi kyamate bɔkɔ Okrasi e pwu idɛnyi iyi ɔshɔshi wu akwɛyi a nyama kaa le kpomo kwuwo mbo. 26 Okrasi e wo ɛlɛ kaa le to ɔshɔshi wu le shi Ukpo i zɛ mu iso wu, iyi bɔkɔ akwu igbɔma sɛsɛ mu embyi, 27 kaa le to ɔshɔshi uwu bɔkɔ e yi kwuto mo, e yi ɛnyinyi mo, ba e yi kɛrikɛri kaa le shi la ɛnwu wu. 28 Anu tete la lu pwu idɛnyi iyi eko yi kyamate lu pwu idɛnyi iyi ɛnwu yi tayi. Ɔnu uwu bɔkɔ e pwu idɛnyi iyi oko wu e pwu idɛnyi iyi ɛnwu wu. 29 Moo onzu uwu bɔkɔ e wo anya iyi ɛnwu wu, e yi mo. Onzu uwunawuna e ri kiya, a gba a bɔ eyi mɛnwu kyamate Okrasi e yese mbaa ɔshɔshi tayi, 30 moo lɛɛbi nzu ki kwu ɛnwu ikpɛnyi.) 31 <<Kwuwongwu ɔlɛ ɔzɔnu a lafya la ete wu mbala anyi wu kaa le kyomesu mbala oko wu, akwɛyi wepepo mbo o kwu wakpɛnyi.>> 32 Iso ɛlɛ i kɔ mu izɔngɔma. Imi ba mi zɔngɔma yi ma te ɛlɛ akwu iso iyi Okrasi mbala ɔshɔshi wu. 33 Ɛlɛ ba ikyo yi tete tee: akwu mega kaa ɔnu uwunawuna la pwu idɛnyi iyi oko wu kyamate ɛnwu wu tayi. Tatayi oko uwunawuna ba akwu mega kaa le lomo la ɔnu wu.