2 Coríntios 11

Phawuloosinna Dhariyye Ergameeyye

1 Heenoxxa anxa gowunte anxa ositinaaxxa addatanoni; maganete ane’e osse. 2 Magenxe hinnafenni ha’no’o hinaafaaneni; hinnafaanelchinna; ha’no’o ci’medebaaxe duuddo dubbarichchoshsha mitte labbake kadhdhatenexxeteni; iikkinna Kiristoositen. 3 Bofi Heewaanii’i ifixxe shokkonni dedhisemasha akimaada yaadi ha’nook gore’na’a Kiristoosi’a afinexxi qajeeltonna ca’itte adatensha waaldinaan hiyye sodaata’enen. 4 Mitti manji ha’noba’a dageexxi no’o lallanbeenxe kaddebaangi; wele Yessuusii lallanbeexxe kaddole; yookaani ha’no adhdhitineeke hafuura kadebaangi wele hafuura adhdhitinoole; yookaani adhdhitineexxa wengeele waaldinxi wele wengeel adhdhitinole injifatendineen hiyyoten. 5 Yaane kinni Ani tenne lumolaamma ergameeyyenaa’ni fedheexxe yaaneninna shiixedhanno hiyye hedabe’noni. 6 Giise’e haaso’a gopheneexxe kaddolenna midde; ege’na kinni afeeneeni; tennenna heddi orni ha’no’ni farri assine’e ege’nisheneni.

7 Ani Mageniixa wengele rundi belo ha’no’a lallaba anxinna ha’no’o lummisate’i ifi salphisiyyo akimagaada ane’ni cubbotishsha laako’enduu? 8 Ha’no’a erigatemona’a wele Beetekirsitiyanena’ni garigaarisa adhdhati insa’ne’e saameeneeni 9 Ani ha’noni welti hedhee’na’a rakko ane’ni gelte wodda; Meqedooniyanaa’n dageeki dayyuwwi ani’a hasisaaxxa yaane duuchcha’ni ane’e gargaaremaxxe’e ani ayye’ninna ba’ote kadebo’noni; ta’iqico’ni ha’no’ni fedheexxe yaane’a ba’ote kadebo’noni; edi’anna ha’no’ni ba’ote kadabo’noni. 10 Kiristoosixxi dhuga ani giddo hexxemaaxxe’e; ani ifi saadabo’nosha assaaki mann Akkaayiyaake boga’ni mittikinna hedhebaani. 11 Iitta hiyiyya anxi mayee’aate? Ha’noo eeyabo’noxxeete? Waawwo’o; ha’no’o eeyaneexxa Magen ege’ne’eeni.

12 Iiki weli erganjuwwi, «No’onna insa’nesha hunja’eneeni» hina’ni iif saanda’nexxa saadino balleesate’e ta’a hujaanexxa huje edi’aanna kinni hujanoni. 13 Iitta hedheeki mann Kiristoosixxe ergameeyye fakkatatee’e umo ifika jijjiira’neeke dhariyye ergameeyyenna xaqarticha hujaluwwan 14 Tininna mambe’a assitaaxe yaanebaani; durrisi midde ifiinke erganjo fakkatati umo isika jijjidhani. 15 Iitta kadeexxeni, isik erganjuwwi qulliyye erganjuwwa fakkaatate’e umo insa’neka jijjireexxe kaddole tinni mambe’a assitaaxeban; hunje insa’nexika hira uduma alfinaan.

Phaawuloosi’n Gelteexxa Rakko

16 «Huun manjo’ni ani gowwake kadeneelcho iso’o fakkatoqee!» hiyye higgeeni ha’no’ni haaso’anee. Ani gowwake ha’no’ni fakkatonolna midde shiixxoxa yanna ifi saadona’a gowwinsha ane’e assitine uude. 17 Iitta ifi saada’ni haaso’ano wodda haaso’aneelchi Goottike hasitishate kaddebang ifi gowwak assedheeten. 18 Heddi mann maalinxe yaane gami’ni ifi saadamaxxe’e aninna ifi saadanon. 19 Ha’no umo ha’nongini qarote kaddinemaxxe’e gowwole gammashoti ossitinaani. 20 Ittaani ayyinna ha’no’o garbak assole, ayyinna ha’no saamole ayyinna ha’nooxxa la’o adhdhoole, ayyinna ha’no tuffatoole, ayyinna ha’no dhabanaasole ha’no tenne duuchcha’ni ossitinaani. 21 Fedheqico tinni ane’e shookishaaxxe yaannenna kaddole ha’noshsha ossiyotee’e jabake kandebenoxxa ha’no’ni kullaaneeni.

Fedheki kinni ifi saadate’e ke’exxe kaddole; aninna isishann ifi saadanon. Tenne’e itta hiyyaanelchi gowwinsha kadeeteni. 22 Insa’ne Ibirayitotee? Aninna Ibirichchoken; insa’ne Isira’eelitotee? Aninna Isra’eelichchokeni; insa’ne Abirihaamixxe sannee? Aninna Abirihaamixxe sanneni. 23 Insa’ne Kiristoosi’a erigatema’neekera? Aninna insa’ne irra Kirsitoosi’a erigatemaanekeni; aninna tennenna itta hiyyano wodda maraaatek manjishsha kadeeten haaso’anek: insa’ne irra lumoqico hujete’ni ani elo’eenen; heddole usuremeene, heddole jadhafemeenen, heddole reye gatenen. 24 Ayihudiinxe anga’n sase tommenna salanele, halangeti ondele jadhafemenen. 25 Sasele dullik ganemenen, mitte yanna kinoti cancaqemenen, sasele lummoxxe hoboloxxi enqensha ane’ni gelteeni; mitte hashanna mitte barra abbaayyati giddo hedhenaani. 26 Orxe me’axxe bira sa’nena’ni wodi’inxinna lola’iinxi rakko ane’ni gelte, saamamak manninna rakko ane’ni geelte; Yihudake mannana’ninna Yihuda kadebake manni gamii’ni rakko ane’ni geelte. Qachchake’ni, qiila gamooje’ninna abbaayyate’ni rakko a’ne’ni gelte, iitaani dharye amanye gami’ni rakko ane’ni gelteeni. 27 Heddo hujeenna elo ane’ni hexxemaani; heddo yanna diiphpho gopheneeni; solo’ikinna woddiinxe dheebonni rakatenneni; heddo yanna ittanogechixxi gonphphe ane’ni gelteemani; daarkinna boojeti rakateneeni. 28 Wele yaane duuchcha laako’ebo’nongi betekirstaane duuchchi’a barra’n barra’n hediyyoti rakateneeni. 29 Mitti manji ifigoph wodda ani isini welti ifigophebe’no? Mitti manji cubbote’n gugufata wodda ani mubetebe’no woddi haanote?

30 Holla hasisa’neexxe kadeele ani hollanolchi gonphe anxa leellishaaxxe yaane’ni callateni. 31 Gootti no’ok Yessuusi Kirsitoosik anni Magenani sobaabe’noxxa ege’neen. 32 Demaasiqoke qachcha’n hedhdhenna wodda Arsixoosiyyoosi hiyyemaake moyanji hunda hedhdhemaaki arda galchchamaaki manjichchi ane’e abido’a haseexxi qachchiinxa hula heqanjiki heqiseemaani. 33 Yaane kinni manni kinjinke dala’ixxe hula gami’n ane’e qirco giddo ugeexxi dirisee’na’a anga isixxenaa’n fuleneeni.