Marcos 5

Rerteemmaxxa Beltonna Elagophpheemmaxxa Manjichcho

21 Higgeenn Yessuusi hoboloti abbaayyati widi’a foofee wodda; heddi mann bukki hiyye. Isinni abbaayyati qarqara hedhee’naa; 22 Muuseka seera barantaammake mine’ni akeekisanjuwwakenaa’ni mitti Iyya’iroosi hiyyemaak manjichchi ookko dage Yessuussixxe lekka’ni ibeexxi, 23 «Shiixxoxxi anxi belto rerto’aten; isenna fayyite hedhoti hexxaashsha ballo’o dagettexxi anga atixxa ise’ni hana uggi!» hiyyeexxi jabeesse kadhate. 24 Yessuussi ke’eexxi isinni welti me’e; heddi manninna Yessuussi’i hordofeexxi qoqqobe me’a’ni weli dhiiba’nemmani.

25 Tommenna lame wogga munde dunnendaa’naa hexxemmaxxi manjichcho ookko hexxemmani. 26 Isenna mitte ci’leessibaa’ni wele ci’leessibaa me’ita’ni affeeka maallaqa iseka duuchcha birtoolenna dhibo ise’ni bira saxxa’ni me’ite malee’e foora alfiteemmabaani. 27 Isenna Yessuusika gurra laqqe ardi giddi’ni udumii’ni daggeexxi Yessuussixxa seemma tuqqe. 28 Isenna tennee assiteechchi; «seemma isixxa calla tuqonnole fayyanooni» hitee amandeemmaxxeeten. 29 Isenaa’ni dunnendaammaxxi munde hirbange’ni uurrite; dhibo isexxenaa’ni fayyiteexxa manjunte isexxe’ni laqende. 30 Yessuusi kinni hirbange’ni hunna isonaa’ni fuldeexxa ege’ne; ardiinbaa wirri hiyyeexxi «Ayyete seemma anxa tuqeeki?» hiyyeexxi qore. 31 Hordofeeyye isixxinna, «Ardi atee dhiibaa’naa uuda’ni mayee’e ‹Anee tuqeeki ayyete› hitaatte?» isoo hine. 32 Yessuussinna tenne assek ayyete kadeexxa uudo’a udumi’a wirri hiyye uude. 33 Ookkonechchi uduma manjichchotinna ifi’ni kaddeexxa yaane egendeemmaxxee sodaatte culphissa’ni, isi edo dagge’e ibbe’e; kaddeexxa duuchcha dhugaa iso’ni haassootte. 34 Isinna hiisseexxi, «Anxe belto; amanaa atixxi atee fayyisseeni; nage’iki me’i! Abara atikenaa’ni fayyi!» hiyye.

35 Yessuussi tennee haaso’a’neenge’ni; manni Muusseka seera barantaammake minike akeekisanjo Iyyayiroosike minenaa’ni dageexxi; «Belto atixxi reriteeni» insa’nenna «mayee barsiisanjo eloossitatto?» hine. 36 Yessuusinna tennee laqeexxi akeekisanjokee, «Amani malee, sodaattoxxe’e!» hiyye. 37 Isinna Pheexiroosii, Ya’iqoobiinna iittanni Ya’iqoobika dayyo Yohaannisii’i malee’e ayyinna isoo hordofaashsha eeti uwwebaan. 38 Insa’nenna Muusseka seera barantaammake minike akeekisaanjike minibaa genneeshshanni Yessuussi manni weekema’ni, oodha’ni hunbaashaa’naa uude. 39 Isinna mini’a e’yeexxi insa’neenni «Tinni weekenshanna oodhishsha duuchchi mayiinxe? Belto diiphphee malee, rertebaaqqa» hiyye. 40 Mannikinna Iso’ni oso’le. Isinna manna duuchcha minii’ni fulcheechchi uduma beltotika annanna ama ittanni isinni welti daggeemmaxxa hordofeeyye adhdheexxi belto hexxeeke mini giddi’a e’ye. 41 Ookkonechchi uduma isi beltotixxa anga abideexxi «Xaaliita uurri!» hiyye. Tikatinna «Tee belto ke’i» hiyyoteni. 42 Beltotinna ikki woddi kexxe uurriteexxi elqekayya mammarende; wogga isexxinna tommenna lametemman. Mannikinna tennee yaane’ni lumoqico mambe’a hiyye. 43 Yessuussinna tennee yaane mittikinna ege’nabaashsha ajajeexxi insa’ne xexxe’achchiiseexxi ittaachchonna ise’a uuno’a insa’ne’ni kule.