Malaquias 4

Duuchchi Woddike Goottixxa Barra

1 «Kunse boosixxe giirashsha ha’yitaaxxi barra dagaan; ifi dukaak duuchchinna fuggoxxa hujaak duuchchi huurake kadaan; itti daggaaxxi barranna insa’nee gubbaan» hiyya’neen Dad Duuchcha Ajajaak Duuchchi Woddik Gootti. «Hiddakanna dame insa’nee gatissabaan. 2 Yaane kinni ha’noo summa anka sodaatina’neekeri’aa iitti qullummatixxi arishsho ha’no’aa fuldaan; fayyattinna keela iseki giddo ha’no’aa kaddaan. Ha’noonna dhoobbo giddii’n fuldeemmaxxe jabbeshsha burraaqqinaan. 3 Ookkoonnechchi uduma ani hujannoxxa barranna fuggaaleeyye hirbeesitinaan; insa’nenna lekka ha’nooxxi hunda bululoke kandaan» hiyya’neen Dad Duuchcha Ajajaak Duuchchi Woddik Gootti. 4 Isira’eelike ardi duuchchi’a aadatenna seerake kaddaashsha Koorebi erganjo anke Muuse’n uwweenneka anka seera qaabbatte.

5 «Kunse iitti jabaxxinna sodaachchissaaxxi Duuchchi Woddike Goottixxi barra daggebaa edi darree wabeekichcha Eliyaasii’i ha’no’aa ergannon. 6 Dagennexxi ookkone boga badinoti ganabe’noshsha isi annuwwiinxa qalbe oosetixxe darre’n, oosetixxa qalbenna anuwwiinxe darre’n wirri assaan.»