1 Reis 19

ኤልያስ ሲና ዙማ ቦላ

1 ኤልያስ ኦዳባ ኡባነ ባኣለ ናበታ ኡባ ማሻን ዎዳይሳ አካብ ኤልዛቤልስ ኦድስ። 2 ኤልዛቤላ፥ "ኔኒ ሄ ናበታ ቦላ ኦዳይሳዳ ዎንቶ ሀኖደ ታኒ ነ ቦላ ኦና እፅኮ፥ ፆሳት ታና ፕርዶ" ያጋዳ ኤልያሳኮ ኪታሱ።

3 ኤልያስ ባ ሸምፑዋስ ያይድ፥ ባ አይልያ ኤክድ፥ ይሁዳ ቢታን ደእያ በርሳበ ብስ። 4 እስ ጋላሳ ኦገ መላ ቢታን ሄመትስ። እ ሄመ አግድ እስ ሳንካራ ኩያ ጋርሳን ኡትድ፥ "አቤት ጎዳዉ፥ ታዉ ግዳና፤ ታኒ ታ ማይዛታፐ አድከ፤ ታ ሸምፑዋ ኤካ" ያግድ ሀይቆ ዎስስ።

5 ሄሳፈ ጉየ፥ ሳንካራ ኩያ ጋርሳን ዛቁልድ ስክስ። እ ስክዳሽን፥ ሄኮ፥ እስ ኪታንቾይ እያ ቦችድ፥ "ደንዳ፤ ማ" ያግስ። 6 እ ደንድድ ፄልያ ዎደ፥ ሄኮ፥ ሹቻ ምሻን ኡከትድ፥ ካፅዳ ኡይነ ኦቶ ሃ እያ ሁጰሶን በእስ። እ ምድ ኡይዳፐ ጉየ ስሚድ ስክስ። 7 ጎዳ ኪታንቾይ ናምአን ይድ፥ "ኤልያሳ፥ ኔኒ ባና ኦገይ ዳሮ አዱሰ ግድያ ግሾ፥ ደንዳዳ ማ" ያግስ።

8 ኤልያስ ደንድድ ምስ፥ ኡይስ። ሄ እ ምዳ ካ ዎልቃን ፆሳ ዙማ ኮሬባ ጋካናዉ ኦይታሙ ጋላስነ ኦይታሙ ቃማ ሄመትስ። 9 እ ያ ጋክድ፥ ጎንጎሎ ግዶ ገልድ አቅስ።

ጎዳይ፥ "ኤልያሳ፥ ሀይሳን አይ ኦይ?" ግያ ፆሳ ቃላይ እያኮ ይስ።

10 ኤልያስ፥ "ኡባፈ ዎልቃማ ጎዳ ፆሳስ ታኒ ዳሮ ምሸታስ። እስራኤለ አሳይ ኔራ ጫቅዳ ጫቁዋ መንስ፤ ነ ያርሾ በሳ ላልዶሶና፤ ነ ናበታ ማሻን ዎዶሶና። ታኒ ታርካ አታስ፤ ሀእ ኤንቲ ታ ሸምፑዋ ዎናዉ ኮዮሶና" ያግስ።

11 ጎዳይ፥ "ሀይሳፈ ከያዳ ደርያ ሁጰን ታ ስንን ኤቃ" ያግስ። ኤልያስ ኤቅዳሽን፥ ሄኮ፥ ጎዳይ እያ ማታራ አስ። ሄ ዎደ ዎልቃማ ጫርኮይ ዙማ ጳልቀረስ፤ ዛላታ ትንቸረስ፤ ሽን ጎዳይ ሄ ጫርኩዋ ግዶን ባዋ። ጫርኩዋፈ ጉየ ቢት ቃፅስ፤ ሽን ጎዳይ ሄ ቢታ ቃፁዋን ባዋ። 12 ቢታ ቃፁዋፐ ጉየ ታም ከይስ፤ ሽን ጎዳይ ታማ ግዶን ባዋ። ታማፐ ጉየ ካልካሽ ስኤትስ። 13 ኤልያስ ሄ ካልካሻ ስእዳ ዎደ ባ ሶምኡዋ አፍላን ካምድ፥ ካረ ከይድ ጎንጎሉዋ ፐንገን ኤቅስ።

ሄኮ፥ እስ ግርስ ኤልያሳኮ፥ "ኤልያሳ፥ ሀይሳን አይ ኦይ?" ያግስ።

14 ኤልያስ፥ "ኡባፈ ዎልቃማ ጎዳ ፆሳስ ታኒ ምሸታስ። እስራኤለ አሳይ ኔራ ጫቅዳ ጫቁዋ መንዶሶና፤ ነ ያርሾ በሳ ላልዶሶና፤ ነ ናበታ ማሻን ዎዶሶና። ታኒ ታርካ አታስ፤ ኤንቲ ታ ሸምፑዋ ኤካናዉ ኮዮሶና" ያግስ።

15 ጎዳይ እያኮ፥ "ኔኒ ይዳ ኦግያራ ጉየ ስማዳ ዳማስቆ መላ ቢታ ባ። ኔኒ ያ ጋክያ ዎደ አዛሄላ፥ ሶረ ቦላ ካዎ ኦዳ ትያ። 16 ናምሳ ናኣ፥ እዩ እስራኤለ ቦላ ካዎ ኦዳ ትያ። ነ በሳን ናበ ኦዳ አቤል-ማሆላ አድያ ሳፋፃ ናኣ ኤልሳ ትያ። 17 አዛሄላ ማሻፈ ከስ ኤክያ ኡባ እዩይ ዎና፤ እዩ ማሻፈ ከስ ኤክያ ኡባ ኤልስ ዎና። 18 ሽን ባኣለ ኤቃ ጎይኖና ዎይኮ ባንታ ዶናን ባኣለ ኤቃ ዬሮና 7,000 አሳ ታኒ እስራኤለን ታዉ አሻና" ያግስ።

ኤልያስ ኤልሳ ፄግስ

19 ኤልያስ ሄ በሳፈ ደንድድ ብሸ ሳፋፃ ናአይ ኤልስ ታማነ ናምኡ ዋፃ ቦራን ጋደ ጎይሽን ደምስ፤ ኤልስ ታማነ ናምአን ዋፃን ጎዬስ። ኤልያስ እያ ማታራ አሸ ባ አፍላ እያ ቦላ የግስ። 20 ኤልስ ቦራታ ኤስድ፥ ኤልያሳ ጌዶ ዎፅ ብድ፥ "ታኒ ታ አዋነ ታ አይዉ ዬራ ሳሮዳ ያና፤ ያፐ ስማዳ ነና ካላና" ያግስ።

ኤልያስ፥ "ኤሮ ባ፤ ታ ነና ድግከ" ያግስ።

21 ሄሳ ግሾ፥ ኤልስ ጉየ ስሚድ ዋ ቦራታ ሹክስ፤ ቦራ ሚሽያ ቀርድ አሹዋ ካድ፥ አሳስ አን አሳይ ምዶሶና። ሄሳፈ ጉየ፥ ደንድ ብድ፥ ኤልያሳስ ኪተትስ።