1 Samuel 25

ዳዊታ ፥ ናባላነ አብግያ

1 ሳሜል ሀይቅን፥ እስራኤለ አሳ ኡባይ ሺቅድ፥ እያዉ ዬክዶሶና፤ ራማ ካታማን እያ ሞግዶሶና።

ሄሳፈ ጉየ፥ ዳዊቲ ማኦና መላ ቢታ ብስ። 2 ማኦና መላ ቢታን፥ ቃርመሎሳን ሻሎይ ደእያ እስ ዱረ አደይ ደኤስ። እያዉ እስ ሙኩሉ ዴሻትነ ሄ ሙኩሉ ዶርሳት ደኦሶና። እ ኤንታ እክስያ ቃርመሎሳን ሜዴስ። 3 ሄ አድያ ሱንይ ናባላ፥ እ ካለባ ያራ፤ እያ ማቸ ሱንይ አብግያ። እያ አኬካንቾነ ማላ ሎኦ ማጫስ፥ ሽን እ አዝናይ ዎዛን ባይና ኢታ አስ።

4 ዳዊቲ መላ ቢታን ደእሸ፥ ናባል ዶርሳ እክሰ ሜደይሳ ስእስ። 5 ዳዊቲ ታሙ ፓንታ ሀይሳዳ ያግድ ኪትስ፤ "ናባላኮ ቃርመሎሳ ብድ፥ ታ ሱንን እያ ሳሮተ። 6 ‘ነ ባረይ አዱቆ! ሳሮይ ነዉነ ነ ሶ አሳስ ግዶ፤ ነዉ ደእያ ኡባስ ሳሮይ ግዶ! 7 ነ ዶርሳ እክሰ ሜደይሳ ታኒ ስአስ፤ ነ ዶርሳ ሄመይሳት ኑራ ደእዳ ዎደ ኑኒ ኤንታ ገንቦኮ፤ ኤንቲ ቃርመሎሳን ደእዳ ዎደ ኡባን ኤንታባፐ አይብካ ፓጭቤና። 8 ሄሳ ኔኒ ነ አይለታ ኦይችኮ ኤንቲ ነዉ ኦዳና። ኑኒ ሀች ግብራ ጋላስ ኔኮ ይዳ ግሾ፥ ታ ፓንታስ ሀያና ኬሀ። ነ ኩሸን ደእያባፐ ነ አይለታስነ ነ ናኣ ዳዊታስ ሀያና እማ’ ያግተ" ያግድ ኪትስ።

9 ዳዊታ አሳት ናባላኮ ጋክድ፥ ዳዊታ ሱንነ ኪታ እያዉ ኦድድ፥ እ ጋናባ ናግሸ ያን ኡትዶሶና።

10 ናባል፥ "ዳዊቲ ኦኔ? እሰየ ናአይ ኦኔ? ሀ ዎድያን ዳሮ አይለት ባንታ ጎዳታፐ ባቃቶሶና። 11 ታ ካ፥ ታ ሃነ ታ ዶርሳታ ሜደይሳታስ ሹከትዳ አሹዋ ኤካዳ፥ ጉዬይ ኤረቶና አሳስ አይስ እሞ?" ያግስ።

12 ዳዊቲ አሳት ጉየ ስም ብድ ናባል ግዳባ ኡባ ዳዊታስ ኦድዶሶና። 13 ዳዊቲ፥ "ህንተ ማሻ ዳንጭተ" ያግን፥ ኡባይ ባንታ ማሻ ዳንጭዶሶና፤ ዳዊቲካ ባ ማሻ ዳንጭስ። ዳዊቲ ኦይዱ ፄቱ ግድያ አሳታራ ደንድድ ብስ፤ ናምኡ ፄቱ አሳይ ኤንታባ ናግድ አትስ።

14 ናባላ አይለታፐ እሶይ ናባላ ማቸ አብግያኮ ሀይሳዳ ያግስ፤ "ዳዊቲ መላ ቢታን ደእሸ ኑ ጎዳ ሳሮ ጋናዉ አሰ ኪትስ፥ ሽን እ ኤንታ ጫይድ የድስ። 15 ግዶሽን፥ ሀ አሳት ኑስ ዳሮ ሎኦ፤ ኤንቲ ኑና ገንቦኮና፤ ኑኒ ኤንታራ ባዞን ፔእዳ ዎደ ኡባን ኑባፐ አይኮይካ ፓጭቤና። 16 ኑኒ ኑ ዶርሳ ዉድያ ኤንታ ማታን ሄምያ ዎደ፥ ቃማነ ጋላስ ኤንቲ ኑስ ድርስ ግድዶሶና። 17 ኑ ጎዳ ቦላነ እያ ሶ አሳ ቦላ ኢታባይ ጋካና ሀንያ ግሾ፥ ሀያና ሀ ኦዳ ዋታነኮ ቆፓ። ኑ ጎዳይ አሳ ዞረ ስኦና ኢታ አስ ግድያ ግሾ፥ ኦንካ እያ ሃሳይሳናዉ ዳንዳኤና" ያግስ።

18 አብግያ ኤሶን ናምኡ ፄቱ ኡይ፥ ናምኡ ኦጎሮ ዎይነ ኡሹ፥ እቻሹ ጫጨትዳ ዶርሳታ፥ እሻታሙ ክሎ ግራመ ጫጨትዳ ትያ፥ እስ ፄቱ ኡከትዳ ዎይነ ሞርኤነ ናምኡ ፄቱ ባላሰ ኑካ ኤካዳ ሀረታ ቦላ ጫናሱ። 19 ባ አይለታኮ፥ "ህንተ ስንትድ ቢተ፤ ታ ህንተና ካላና" ያጋሱ፤ ሽን ባ አዝና ናባላስ አይኮካ ኦዳቡኩ። 20 ባ ሀርያ ቶጋዳ ዙማ ሎቡዋ ዱገ ዎያ ዎደ ዳዊቲነ እያ አሳይ ይሸ ኢራ ጋሄትዶሶና።

21 ዳዊቲ፥ "እያባፐ አይኮይካ ፓጮና መላ ታኒ ሀ አድያ ሻሉዋ ናግዳይ ጮ መላ፤ ታኒ ኦዳ ሎኦ ኦሱዋስ እ ታዉ ኢታ ኩሸ ዛርስ። 22 ዎንቶ ዎንታ ጋካናዉ፥ እያባ ግድዳ አደታፐ እሱዋ ታ ፓፃ አግኮ፥ ፆሲ ታና ፕርዶ" ያግስ።

23 አብግያ ዳዊታ በእዳ ዎደ ሀርያፐ ኤሶታ ዎዳ፥ ዳዊታ ስንን ጉፋናዳ ዝጋሱ። 24 እያ ቶሁዋ ቦላ ኩንዳዳ፥ "ታ ጎዳዉ፥ ታ ባላይ ታ ቦላ ግዶ! ታ እስባ ኦዳና፤ ታ ነ አይልያ ግያባ ስአ። 25 ሀ ዎዛን ባይና አደይ፥ ናባል*25:25 ናባላ፦ ናባላ ጉሳይ ኤያ ጉሱ። ግያባ ስኦፓ፤ እ ባ ሱንዳ ኤያ። ታ ጎዳዉ፥ ነ ኪትዳ አሳታ ታ ነ አይልያ በአብከ። 26 ደኦ ጎዳይ ኤርያ መላ፥ ነ ሸምፖይ ኤርን፥ ነ ሱ ጉሶናዳነ ሀሎ ከዮናዳ ነና ተቅዳይ ጎዳ። ነ ሞርከትነ ነና ቆሀናዉ ኮየይሳት ናባላዳ ሀኖ። 27 ሀ እሞታይ ታኒ ነ አይልያ ነዉ፥ ታ ጎዳስ ኤህዳይስ ነና ካልያ አሳታስ እመቶ። 28 ታ ጎዳዉ፥ ነ አይለ ናጋራ አቶ ያጋ! ኔኒ ጎዳ ኦላ ኦለትያ ግሾ፥ ጎዳይ ነናነ ነ ሼሻ ካዎያና። ነ ደኦ ላይ ኡባን ኢታተ ነ ቦላ በንቶፎ። 29 አይ አስካ ነና ዎናዉ ኮይኮ፥ እስ አስ ባ አልኦ ሻሉዋ ናገይሳዳ ጎዳይ፥ ነ ፆሳይ ነና ሳሮ ናጋና። ሽን ያምባርሻን ሹቹ ሆለይሳዳ እ ነ ሞርከታ ሆላና። 30 ጎዳይ፥ ታ ጎዳስ ኦናዉ ቃላ ገልዳ ኬሀተ ኡባ ኦያ ዎደነ እስራኤለ ቦላ ካዎያ ዎደ፥ 31 ታ ጎዳይ አዛንያ ጋሶይ ዎይኮ ቂሮያባይ ባዋ። ጋሶይ ባይና ሱ ጉስዳባይ ዎይኮ ሀሎ ከይዳባይ ባይና ግሾ ነ ዎዛናይ ዳጋመና። ጎዳይ ነዉ ሎኦባ ኦዳ ዎደ ታና ነ አይልዉ ዶጎፓ" ያጋሱ።

32 ዳዊቲ አብግያኮ፥ "ታራ ጋሄታና መላ ሀች ነና ኪትዳ ጎዳይ፥ እስራኤለ ፆሳይ ጋላተቶ። 33 ታኒ አሳ ሱ ጉሶናዳነ ሀሎ ከዮናዳ ነ ሎኦ ቆፋይ ታና ተቅዳ ግሾ ኔኒ አንጀታ። 34 ታ ነና ቆሆናዳ ተቅዳ ደኦ ጎዳይ፥ እስራኤለ ፆሳይ ኤርያ መላ ነ ታራ ጋሄታናዉ ኤለሳዳ ዮናኮ፥ ሳእ ዎንታና ጋካናዉ ናባላ አሳፐ እስ አደይካ ፓፃ አተና" ያግስ። 35 አብግያ እያዉ ኤህዳ እሞታ እ ኩሸፐ ዳዊቲ ኤክድ፥ "ነ ሶ ሳሮ ባ፤ ታኒ ነ ግዳባ ስአስ፤ ነ ኦይሻካ ኤካስ" ያግስ።

36 አብግያ ስማዳ ናባላኮ ያ ዎደ፥ ካዎ ሶን ጊግያ ግብራ መላ ግብራ ሙዝሸ ሶን ኡትስ። ናባል ዳሮ ማትድ፥ ባ ዎዛናን ኡፋይትያ ግሾ ሳእ ዎንታና ጋካናዉ አብግያ እያዉ አይኮካ ኦዳቡኩ። 37 ዎንታ ናባላ ማይ ስምዳፐ ጉየ፥ እያ ማችያ ሀንዳባ ኡባ እያዉ ኦዳሱ፤ ናባላ ዎዛናይ ዎን፥ እ ዳቡርስ። 38 ታሙ ጋላሳፐ ጉዬ ጎዳይ ናባላ ሾጭን፥ እ ሀይቅስ።

39 ናባል ሀይቅዳይሳ ዳዊቲ ስእዳ ዎደ፥ "ጎዳይ ጋላተቶ! ናባል ታና ጫይዳይሳ ሀሎ ጎዳይ ከስስ። ታኒ እያ አይለይ ኢታባ ኦና መላ ታና ተቅስ። ናባል ኦዳ ኢታባ ጎዳይ እያ ቦላ ዛርስ" ያግስ።

ሄሳፈ ጉየ፥ ዳዊቲ አብግያ ኤካናዉ ኮይድ ኪታ የድስ። 40 ዳዊታ አይለት ቃርመሎሳን ደእያ አብግያኮ ብድ፥ "ዳዊቲ ነና ማቻናዉ ዶስዳ ግሾ ኑኒ ነና ኤካናዉ ይዳ" ያግዶሶና።

41 አብግያ ጉፋና ዝጋዳ፥ "ታኒ ነ አይልያ ነዉ ኪተታናዉነ ነ አይለታ ቶሁዋ ሜጫናዉ ጊገታ ኡታስ" ያጋሱ። 42 አብግያ ኤለሳ ደንዳዳ ባ ሀርያ ቶጋሱ፥ እያ ባ እቻሹ ማጫ አይለታራነ ዳዊታ ኪትዳ ኣሳራ ባዳ ዳዊታ ገላሱ።

43 ዳዊቲ ካሰ እዝራኤለ ማጫስዉ አክናሆሞ ኤክድ ደኤስ፤ ኤንቲ ናምአይ እያ ማቸታ። 44 ሳኦል ዳዊታ ማችዉ፥ ባ ናእዉ መልኮሎ ጋልማ አድያ ሌሳ ናኣ ፋልፃስ እሚስ።