1 ሀይስ ዳዊታ ዉርሰ ሃሳያ።

እሰየ ናኣ ዳዊታ ዉረሰይ ሀይሳ፤

እ ያይቆባ ፆሳን ትየትዳይሳ፤

ፆሳይ እያ ቁ ቁ ኦዳይሳ፤

እስራኤለን ሎኦ ማዝሙረ የፀይሳ።

2 "ጎዳ አያናይ ታ ባጋራ ኦዴስ፤

እያ ቃላይ ታ እንፃርሳን ደኤስ።

3 እስራኤለ ፆሳይ ታዉ ኦድስ፤

እስራኤለ ዛላይ ሀይሳዳ ያግስ።

‘ፅሎተን ሃርያ ካዎይ፥

ፆሳ ያሻን አይስያ ካዎይ፥

4 እ ሻር ባይና ጉራ ዶልያ

ፃልቀ ፖኦ መላ።

እ እር ቡክድ አን፥

ቢታፈ ማታ ዶልስያ ቦቃልሳ መላ።’

5 ቱማ ታ ኬ አሳይ ፆሳ ስንን ሱረ፤

እ ታራ መርናዉ ጫቅስ፤

ሀ ጫቆይ ጊግድ፥ ምንድነ ናገትድ ደኤስ።

ፆሳይ ታዉ ፆኖ እማና፤

ታ አሞትዳባ ኡባ እ ቱማ ፖላና።

6 ሽን ኢታ አሳት ኡባይ

ኩሸን ሺሻናዉ ሀኖና አጉንዳ ዎራ ሆለታና።

7 አጉን ቦችያ ኦንካ

ዋለ ዎይኮ ፃምአ ባ ኩሸን ኦይካናዉ ኮሼስ፤

ሄስ ባ ደእያ በሳን ኤፃና" ያግስ።

8 ምኖ ዳዊታ አሳታ ሱንይ ሀይሳፈ ካልድ ደኤይሳታ። ኮይሮይ፥ ታክሞና የለታ ግድዳ ዮሴብ-በስትቤተ ጌተቴስ፤ እ ሄታ ሀላቃ፤ እስ ቶሆ ኦላን ባ ቶራን ሆስፑን ፄቱ አስ ዎስ።

9 ሄታፐ እሶይ፥ እያ ካልያ ናምአንይ፥ አሆሀ ሼሽ ግድዳ ዶዶ ናኣ አላዛራ። እስ ጋላስ እነ ዳዊቲ ኦላስ ሺቅዳ ፍልስፄመታ ማንድዶሶና፤ እስራኤለ አሳይ ጉየ ስምስ። 10 ሽን እ ባ በሳን ምን ኤቅድ፥ እያ ኩሸይ አርጋጭድ ማሻራ ኦይከታና ጋካናዉ ፍልስፄመታ ሾጭስ። ሄ ጋላስ ጎዳይ ግታ ፆኖ እሚስ። ኦላይ ኤቅን፥ ኦላንቾት አላዛራኮ ስሚድ ይዶሶና፤ ሽን ኤንቲ ሀይቅዳ ፍልስፄመታፐ ኦላ ማኦ ቃርዶሶናፐ አትሽን፥ ሀራባ ኦቦኮና።

11 እያፐ ካለይ ቃስ አሮዳ የለታ ግድዳ አጋ ናኣ ሳማ። እስ ጋላስ ፍልስፄመት ምስረይ ኩምዳ ሾቃን፥ ሌህ ጌተትያ በሳን ሺቅን፥ እስራኤለት ኤንታ ስንፈ ባቃትዶሶና። 12 ሽን ሳም ሾቃ ግዶን ሙርት ኤቅድ ኦለትስ። ፍልስፄመታ ዎስ፤ ሄ ጋላስ ጎዳይ ዎልቃማ ፆኖ እሚስ።

13 ካ ጫካ ዎደ ሀስታሙ ምኖ አሳታፐ ሄት አዱላማ ጎንጎሉዋ ዳዊታኮ ብዶሶና። ሄ ዎደ ፍልስፄመ ኦላንቾት ራፋይመ ዛንጋራን ዱንካንዶሶና። 14 ሄ ዎደ ዳዊቲ ሚፃን ደኤስ፤ ፍልስፄመ ኦላንቾታ ጩጋይ ቃስ ቤተለመን ኦላ ካምበ ደኤስ። 15 ዳዊቲ ሃ ኡያናዉ አሞትድ፥ "ቤተለመ ካታማ ፐንግያ ማታን ደእያ ኦላፐ ሃ ታና ኦነ ኡሻናይ" ያግስ። 16 ሀ ሄ ምኖ አሳት ፍልስፄመ ኦላንቾታ ጉታ ካንድ፥ ቤተለመ ካታማ ፐንገን ደእያ ኦላፈ ሃ ዱቅድ ዳዊታስ ኤህዶሶና። ሽን እ ኡዮና እፅድ፥ ጎዳ ስንን ትግድ፥ 17 "አቤት ጎዳዉ፥ ሀይሳ ኡያናይስ ታፐ ሃኮ! ሀ ሃ ባንታ ሸምፑዋ ባይዝድ ኤህዳ አሳታ ሱ ግደኔ?" ያግድ ኡዮና እፅስ።

ሀ ሄ ምኖ አሳት ሀይሳ ኦዶሶና።

18 ፃሩያ ናኣ እዮኣባ እሻይ አብስ ሀስታማታ ሀላቃ፤ እ ሄ ፄቱ አሳታ ባ ቶራን ኦልድ ዎስ፤ እካ ሄታዳ ኤረትስ። 19 እ ሀስታማታፐ አድ ቦንቸትዳ አስ፤ እ ሄታ መላ ኤረትዳ አስ ግዶና እፅኮካ ሀስታማታስ ሀላቃ።

20 ቃብፅኤላ የለታ ግድዳ ዮዳሄ ናአይ ባናያስ ምኖ ኦሶ ኦዳ ግታ አስ። እ ናምኡ ኤረትዳ ሞአበ አሳታ ዎስ። እስ ዎደ ሻች ዎያ ጋላስ ኦላን ዎድ ጋሞ ዎስ። 21 ቃስ እስ ግታ ግብፀ አድያ ዎስ፤ ግብፀ አደይ ቶራ ኦይክስ፤ ሽን እ ፃምአ ኦይክድ እያኮ ብድ፥ እያ ኩሸፐ ቶራ ዳፍ ኤክድ፥ እያ ቶራራ እያ ዎስ። 22 ዮዳሄ ናአይ ባናያስ ሀይሳ ኦስ፤ እያ ሱንይ ሄታይሳዳ ኤረትስ። 23 እ ሀስታማታ ግዶን ዳሮ ቦንቸትዳ አስ፥ ሽን እ ሄታ ታይቡዋን ዴና። ዳዊቲ እያ ባና ናግያ ዎታዳረታስ ቶራ ሞጮና ኦስ።

24 ሄ ሀስታማታ ግዶን ደኤይሳት፥ እዮኣባ እሻ አሳሄላ፥ ቤተለመ የለታ ግድዳ ዶዳ ናኣ ኤልያና፥ 25 አሮዳ የለታ ግድዳ ሳማነ ኤልቃ፥ 26 ፋልፃ ያራ ግድዳ ሰለሳ፥ ታቆሀ አድያ ኤስካ ናኣ እራሳ፥ 27 አናቶተ የለታ ግድዳ አብኤዘራ፥ ኩሳ የለታ ግድዳ ማቡናያ፥ 28 አሆሀ ያራ ግድዳ ፃልሞና፥ 29 ናፆፋ የለታ ግድዳ ማህራያነ ባአና ናኣ ሄለባ። ብንያመ ቢታን፥ ግብአ የለታ ግድዳ ርባያ ናኣ እታያ፥ 30 ጵርአቶና የለታ ግድዳ ባናያ፥ ጋኣሳ ዛንጋራ ማታፐ ይዳ ህዳያ፥ 31 አራባ የለታ ግድዳ አባልቦና፥ ባርሁማ አድያ አዝሞታ፥ 32 ሻአልቦና የለታ ግድዳ ኤልያባ፥ አሳና ናይታ፥ ዮናታና፥ 33 አሮዳ የለታ ግድዳ ሳማነ ሻራ ናኣ አህኣማ፥ 34 ማእካ የለታ ግድዳ አሀስባያ ናኣ ኤልፋላፃ፥ ግሎ የለታ ግድዳ አክፆፈላ ናኣ ኤልኣማ፥ 35 ቃርመሎሳ የለታ ግድዳ ሄፅራ፥ አራባ የለታ ግድዳ ፓኣራ፥ 36 ሱባ የለታ ግድዳ ናታና ናኣ ይግኣላ፥ ጋደ የለታ ግድዳ ባና፥ 37 አሞነ የለታ ግድዳ ሰለቃ፥ ፃሩያ ናኣ እዮኣባ ኦላ ሚሽያ ቶክያ ባኤሮታ የለታ ግድዳ ናህራያ፥ 38 ያትራ ያራ ግድያ እራያነ ጋሬባ፥ 39 ህተ አድያ ኦርዮና። ኤንቲ ኩመ ሀስታማነ ላፑና።