2 Samuel 8

ዳዊታ ፆኖታ

1 ሄሳፈ ጉየ፥ ካዎይ ዳዊቲ ፍልስፄመታ ፆንድ ሃርስ፤ ያትድ መተግ-አማ ካታማ*8:1 መተግ-አማ፦ 1 ታርከ ማፃፋን ፃፈትዳይሳዳ ጋተነ እያ ሄራን ደእያ ጉታታ በሴስ። ፍልስፄመታ ኩሸፐ ኤክስ።

2 ዳዊቲ ቃስ ሞአበታ ፆንስ። እ ኤንታ ቢታን ዝንእስድ ኩሸን ዋስ፤ ኤንታፈ ናምኡ ኩሽያ ዎድ፥ ሄን ኩሽያ ፓፃ አግስ። ያትን ሞአበት ዳዊታስ ሃረትድ ጊርዶሶና።

3 ረሆባ ናአይ፥ ሱባ ካዎይ፥ አድራዛር ኤፍራፂሳ ሻፋ ማታን ደእያ ባ ዛዋ ዛራናዉ ብዳ ዎደ ዳዊቲ እያ ኦልድ ፆንስ። 4 ዳዊቲ እያ አሳፐ እስ ሙኩሉነ ላፑን ፄቱ ፓራ አሳታነ ላታሙ ሙኩሉ ቶሆ አሳታ ድእስ። ዳዊቲ ጋረታ ጎቻናዉ ፄቱ ፓራታ አሽድ ሀራ ፓራታ ኡባስ ጋድያ ግልዳይስ።

5 ዳማስቆን ደእያ ሶረ ኦላንቾት ሱባ ካዋ አድራዛራ ማዳናዉ ይዳ ዎደ ዳዊቲ ኤንታፈ ላታማነ ናምኡ ሙኩሉ አሳ ዎስ። 6 ዳዊቲ ሶረ ካዎተን፥ ዳማስቆን፥ ኦላንቾታስ ሚፃ መስ። ያትን ሶረ አሳይ ዳዊታስ ሃረትድ ጊርዶሶና። ዳዊቲ ብዳ በሳ ኡባን ጎዳይ እያዉ ፆኖ እሚስ።

7 አድራዛራ ቶራ ሞጮናት ኦይክያ ዎርቃ ጎንዳልያ ዳዊቲ ኤክድ የሩሳላመ ኤህስ። 8 በፃሀነ በሮታ ጌተትያ አድራዛራ ካታማታፐ ካዎይ ዳዊቲ ዳሮ ናሰ ብራታ ኤክስ።

9 አድራዛራ ኦላንቾታ ኡባ ዳዊቲ ፆንዳይሳ ሀማታ ካዎይ ቶእ ስእስ። 10 ዳዊቲ አድራዛራ ኦልድ ፆንዳ ዎደ ሀዳድዘር ቶአራራ ኦለትሸ ጋምእዳ ግሾ እያ ሀሹ ጋናዉነ ሳሮናዉ ባ ናኣ ዮራማ ዳዊታኮ ኪትስ። ዮራም ዎርቃፈ፥ ብራፐነ ናሰ ብራታፐ ኦሰትዳ እሞታታ ዳዊታስ ኤህስ። 11 ካዎይ ዳዊቲ ካሰ ጊርስያ ካዎተታ ኡባፈ ኤክዳ ዎርቃነ ብራ ኦዳይሳዳ ሀ እሞታታካ ጎዳስ ዱማይስ። 12 እ ፆንዳ ካዎተት ኤዶመ፥ ሞአበ፥ አሞነ፥ ፍልስፄመነ አማለቃ። ሄሳዳካ ረሆባ ናኣ፥ ሱባ ካዋ አድራዛራ ኤክዳ ዲኡዋ ጎዳስ ዱማይስ።

13 ማፅነ ዛንጋራን ታማነ ሆስፑን ሙኩሉ ኤዶመ*8:13 አራመ ዎይኮ ሶረ ጉሱ። አሳታ ዳዊቲ ዎድ ስምዳፐ ጉየ እያ ሱንይ ከይስ። 14 ዳዊቲ ኤዶመ ቢታን ኦላንቾታ ሚፃ መስ፤ ሄ ቢታይ ዳዊታስ ሃረትስ። ዳዊቲ ብዳ በሳ ኡባን ጎዳይ እያዉ ፆኖ እሚስ።

ዳዊታ ሞርናታ

15 ዳዊቲ እስራኤለ ኡባ ቦላ ካዎትስ፤ ባ አሳ ኡባ ፅሎተንነ ሱረ ፕርዳን አይስስ። 16 ፃሩያ ናአይ እዮኣብ ቶራ ሞጮና ግድሽን፥ አህሉዳ ናአይ እዮሳፈፅ ታርከ ፃፈ። 17 አህፁባ ናአይ ሳዶቅነ አብያታራ ናአይ አብመለከ ካህነ ግድሽን፥ ሳራይ ቃስ ፃፈ። 18 ዮዳሄ ናአይ ባናያስ ካዋ ናገይሳታ*8:18 ካዋ ናገይሳታ፦ ከርታወታነ ከልታወታ ጌተቶሶና። ሀላቃ ግድሽን፥ ዳዊታ አደ ናይት ካዋ ዞረይሳታ።*8:18 ካዋ ዞረይሳታ፦ ዎይኮ ካህነታ