Apocalipse 1

1 ኤሶን ሀናናዉ ደእያባ ባ አይለታ በሳና መላ ፆሳይ እያዉ እምዳ የሱስ ክርስቶሳ ቆንጨይ ሀይሳ። የሱሲ ባ ኪታንቹዋ ኪትድ፥ ባ አይልያ ዮሃንሳስ ቆንጭስስ። 2 ዮሃንስ ፆሳ ኪታ፥ የሱስ ክርስቶሲ ኦዳባነ ኦድዳባ ኡባ ማርካትስ። 3 ሀ ኡባይ ሀናናዉ ዎደይ ማትዳ ግሾ፥ ሀ ትንብተ ቃላ ናባብያ ኦንካ አንጀትዳይሳ፤ ቃስ ሀ ቃላ ስኤይሳትነ ፃፈትዳ ኪታ ናግያ ኡባይ አንጀትዳይሳታ።

ዎሳ ኬታስ ኪተትዳ ሳሮ

4,5 ሀ ዳብዳበይ፥ ዮሃንሳፐ፥ ኢሰ ቢታን ደእያ ላፑን ዎሳ ኬታስ ፃፈትስ። ካሰካ፥ ሀእካ ደእያ፥ ስንፈካ ያናዉ ደእያ ፆሳፈ፥ ቃስ እያ አራታ ስንን ደእያ ላፑን አያናታፐ፥ ሄሳዳካ፥ ሀይቆፐ ደንዶን ኮይሮ ግድዳይሳፈ፥ ሳኣ ካዎታ ሃርያ አማነትያ ማርካ ግድዳ የሱስ ክርስቶሳፐ፥ አ ኬሀተይነ ሳሮተይ ህንተዉ ግዶ።✝1:4-5 ከሳ 3:14፤ ቆን 4:5.

የሱሲ ኑና ሲቄስ፥ ቃስ ባ ሱን ናጋራ አይለተፈ ኑና ላአ ከስስ።✝1:4-5 እሳ 55:4፤ ማዝ 89:27. 6 ኑኒ ፆሳ እያ አዋስ ኦና መላ ኑና ካዎተ ካህነ ኦስ። እያዉ መርናፐ መርና ጋካናዉ ቦንቾይነ ዎልቃይ ግዶ። አምንእ።✝1:6 ከሳ 19:6፤ ቆን 5:10.

7 ሄኮ፥ የሱሲ ሻራራ ዬስ። አሳ ኡባይ ሀር አቶሽን፥ እያ ጫድዳ አሳይካ እያ በአና። ሳአን ደእያ አሳ ኡባይ እያ ግሾ ዬካና። ሄስ ቱማ ሀናና! አምንእ።✝1:7 ዳነ 7:13፤ ማቶ 24:30፤ ማር 13:26፤ ሉቃ 21:27፤ 1 ተሰ 4:17፤ ዛካ 12:10፤ ዮሀ 19:34.

8 "ካሰካ፥ ሀእካ ደኤይስ፥ ስንፈካ ያና ጎዳይ፥ ኡባፈ ዎልቃማ ፆሳይ፥ አልፋነ ኦመግ ታና"*1:8 አልፋነ ኦመጋ፦ ግርከ ዶናን አልፋነ ኦመግ ኮይሮነ ዉርሰ ፕዳለታ፤ ብርሸይካ ኮይሮነ ዉርሰ ጉሱ። ያጌስ ጎዳ ፆሳይ።✝1:8 ቆን 22:13፤ ከሳ 3:14.

ጎዳ ቆንጨ

9 ታኒ፥ ዮሃንስ፥ ህንተ እሻይ፥ ህንተራ እስፈ የሱሳን ዋይያ፥ እያ ካዎተነ እያ ዳንዳኣ በአስ። ታኒ ፆሳ ቃላ ግሾነ የሱሳባ ማርካትዳ ግሾ፥ ዩሾይ አባን ተቀትዳ ቢታን፥ ፓፅሞን ደአይስ። 10 ጎዳ ጋላሳን ታ ጌሻ አያናን ሃረታዳ ደአይስ፤ ታፐ ጉየራ ሞይዘ ፑኖ መላ ግታ ግርስ ስአስ። 11 ሄ ግርሳይ ታና፥ "ነ በኤይሳ ማፃፋን ፃፋዳ፥ ኢሰን ደእያ ላፑን ዎሳ ኬታስ:- ኤፈሶና፥ ሳምርኔሳ፥ ጳርጋሞና፥ ትያትሮና፥ ሳርዴሳ፥ ፍላደልፍያነ ሎዶቀ የዳ" ያግስ።

12 ታኒ ታዉ ኦድያ ግርሳ በአናዉ ጉየ ስማዳ ፆምፐ ዎያ ላፑን ዎርቃ ኮጫታ በአስ። 13 ሄ ኮጫታ ግዶን አሳ ናአ ዳነይሳ በአስ። እ አዱሳ አፍላ ባ ቶሁዋ ጋ ማእስ፥ ዎርቃ ዳንጮን ባ ትራ ዳንጭስ።✝1:13 ዳነ 7:13፤ ዳነ 10:5. 14 እያ ሁጰይነ እያ ብናናይ ቦ ዶርሳ እክሰ መላ ዎይኮ ሻቻ መላ ቦ፤ እያ አይፈይ ታማ ላጮ ዳኔስ።✝1:14 ዳነ 7:9.✝1:14 ዳነ 10:6. 15 እያ ቶሆይ ታማን ሴርድ ዞእዳ ናሰ ብራታ ዳኔስ፤ እያ ግርሳይካ ግታ ሻፋ ኮሽንቻ መላ።✝1:15 ህዝ 1:24፤ 43:2. 16 እ ባ ኡሻቻ ኩሸን ላፑን ፆልንቶታ ኦይክስ። እያ ዶናፐ ናምኡ ባጋራ ቃራትዳ ማሻይ ከዬስ። እያ ሶምኦይ ሴታ ጋላሳ አዋ አይፈ ዳኔስ።

17 ታኒ እያ በእዳ ዎደ ሀይቅዳ አሳዳ ሀናዳ እያ ቶሁዋ ማታን ኩንዳስ። እ ባ ኡሻቻ ኩሽያ ታ ቦላ ዎድ፥ "ያዮፋ፤ ኮይሮይነ ዉርሰይ ታና።✝1:17 እሳ 44:6፤ 48:12፤ ቆን 2:8፤ 22:13. 18 ታኒ ደኦን ደአይስ፤ ታኒ ሀይቃስ፥ ሽን ሄኮ መር መርናዉካ ደኦን ደአይስ። ሀይቆነ ስኦለ ቁልፐይ ታ ኩሸና። 19 ህዛ፥ ሀእ ሀንያባነ ስንፈ ሀናናባ ነ በእዳባ ፃፋ። 20 ኔኒ ታ ኡሻቻ ኩሸን በእዳ ላፑን ፆልንቶታነ ላፑን ዎርቃ ኮጫታ ብርሸይ ሀይሳ፦ ላፑን ፆልንቶት ላፑን ዎሳ ኬታ ኪታንቾታ፤ ላፑን ዎርቃ ኮጫት ላፑን ዎሳ ኬታ።"