1 ሄሳፈ ጉየ፥ ታዉ ዋ ፃምአ እምድ፥ "ባዳ ፆሳ ኬነ ያርሾ በሳ ዋ፤ ያን ጎይንያ አሳታካ ፓይዳ።✝ 2 ሽን ፆሳ ኬ ካረ ዳባባይ አይሁደ ግዶና አሳስ እመትዳ ግሾ ዋና አጋጋ። አይሁደ ግዶና አሳይ ጌሻ ካታማ ኦይታማነ ናምኡ አጌና ሃራና።✝ 3 ታኒ ካዮ ማኦ ማእዳ ታ ናምኡ ማርካታ ኪታና፤ ኤንቲ 1,260 ጋላስ ትንብተ ኦዳና" ያግስ።

4 ሄ ናምኡ ማርካት አላምያ ጎዳ ስንን ኤቅያ ናምኡ ሻማሆ ምታነ ናምኡ ፆምፐ ዎያ ኮጫታ።✝ 5 ኦንካ ኤንታ ቆሀናዉ ኮይኮ ኤንታ ዶናፐ ታም ከይድ፥ ኤንታ ሞርከታ ይሴስ። ኤንታ ቆሀናዉ ኮይያ ኦንካ ሄሳዳ ሀይቃና። 6 ኤንቲ ትንብተ ኦድያ ዎደ እር ቡኮና መላ ሳሉዋ ጎርዳናዉ ኤንታዉ ማት ደኤስ። ኤንታዉ ሃ ሱ ከሳናዉ፥ ቃስ ኤንቲ ኮይዳ መላ ቢታ ዱማ ዱማ ጋዶን ይሳናዉ ኤንታዉ ማት ደኤስ።✝

7 ኤንቲ ባንታ ማርካተ ኦንግዳፐ ጉየ፥ ኦላፈ ከይያ ዶአይ ኤንታና ኦላና። ሄ ዶአይ ኤንታ ፆናና፤ ዎና።✝ 8 ኤንታ ጎዳይ ማስቃልያ ቦላ ካቀትዳ ግታ ካታማ ኦግያ ቦላ ኤንታ አሀይ የገታና። ሄ ካታማይ ሌምሶን ሶዶመ ዎይኮ ግብፀ ጌተትድ ፄገቴስ።✝ 9 ቃስ ኮቸ ኡባፈ፥ ያራ ኡባፈ፥ ዱማ ዱማ ዶናፐነ ካዎተ ኡባፈ ይዳ አሳይ ኤንታ አሀ ሄ ጋላስነ ባጋ ጋካናዉ በአና። ኤንታ አሀይ ሞገቶና መላ አሳይ ድጋና። 10 ሀ ናምኡ ናበት ሳአን ደእያ አሳ ዋይስዳ ግሾ አሳይ ኤንታ ሀይቁዋን ኡፋይታና። ባንታ ኡፋይሳ በሳናዉ እሶይ እሱዋስ እሞታ እማና።

11 ሄ ጋላስነ ባጋፈ ጉየ፥ ደኦ አያናይ ፆሳ ማታፐ ይድ ኤንታን ገልን፥ ኤንቲ ደንድ ኤቅዶሶና። ኤንታ በእዳ ኡባይ ግታ ያሽ ያይዶሶና።✝ 12 ሄሳፈ ጉየ፥ ሄ ናምኡ ናበት፥ "ሃ ፑደ ከይተ" ግያ ቃላ ሳሎፐ ስእዶሶና። ኤንታ ሞርከት ኤንታና በእሽን፥ ኤንቲ ሻራን ገልድ ፑደ ሳሎ ብዶሶና።✝

13 ሄ ሳትያን ቢታይ ዎልቃማ ቃፆ ቃፅን፥ ካታማፐ ታማን ኩሸይ ይስ። ቃስ ቢታ ቃፆን ላፑን ሙኩሉ አሳይ ሀይቅስ። አትዳ አሳይ ዳሮ ኮኮርድ ባብድ፤ ሳሎ ፆሳስ ቦንቾ እምዶሶና።✝

14 ናምአን አየይ አስ፥ ሽን ሄኮ ሄን አየይ ኤሶን ያና።

15 ላፑን ኪታንቾይ ባ ሞይዝያ ፑንስ። ሳሎፐ፥ "ሳኣ ካዎተይ ኑ ጎዳስነ ክርስቶሳስ ግድስ፤ እ መርናፐ መርና ጋካናዉ ሃራና" ግያ ዎልቃማ ቃላይ ስኤትስ።✝ 16 ያትን፥ ፆሳ ስንን፥ ባንታ አራታን ኡትዳ ላታማነ ኦይዱ ጭማት ጉፋንድ፥ ፆሳስ ጎይንድ፥

17 "ሀእካ ካሰካ ደኤይሶ፥

ጎዳዉ፥ ኡባፈ ዎልቃማ ፆሳዉ፥

ኔኒ ግታ ዎልቃ ኦይካዳሳ።

ኔኒ ሃራናዉ ዶምዳ ግሾ፥

ኑኒ ነና ጋላቶስ።✝

18 አይሁደ ግዶና አሳይ ሀንቀትዶሶና፥

ሽን ነ ሀንቆይ ይስ።✝

ሀይቅዳይሳታ ቦላ ነ ፕርድያ ዎደይ ጋክስ፤

ኔኒ ነ አይለታ፥ ናበታስ

ጌሻታስነ ነ ሱንስ ያየይሳታስ፥

ጉታስነ ግታታስ፥ ኤንታ ኦሱዋዳ እምያ ዎደይ ጋክስ።

አላምያ ይሰይሳታ ይስያ ዎደይ ይስ"

ያግዶሶና።

19 ሳሎን ደእያ ፆሳ ኬይ ዶየትስ፤ እያ ግዶን ፆሳ ጫቆ ታቦተይ በንትስ። ቃስ ዎልአን ዎልአምስ፥ ደሾይ ደችስ፤ ዳዳይ ቅስ፤ ቢት ቃፅስ፤ ሻች ቡክስ።✝