1 ታኒ ኦራ ሳሎነ ኦራ ሳአ በአስ። ኮይሮ ሳሎይነ ኮይሮ ሳእ ይስ፤ አባይካ ይስ።✝21:1 እሳ 65:17፤ 66:22፤ 2 ጰፅ 3:13. 2 ጌሻ ካታምያ፥ ኦራ የሩሳላመይ፥ አዝና ገላናዉ አሌቀታዳ ጊጋዳ ደእያ ማጫሳዳ ሳሎፐ ፆሳ ማታፐ ዱገ ዎሽን በአስ።✝21:2 እሳ 52:1፤ ቆን 3:12፤ እሳ 61:10.

3 አራታፐ ሀይሳዳ ያግድ፥ ኦድያ ግታ ቃላ ስአስ፤ "ፆሳ ኬይ አሳራ ደኤስ፤ ፆሳይ ባ ቦንቹዋራ አሳራ እስፈ ዳና። ኤንቲ እያ ደረ ግዳና፤ ፆሳይ ባ ሁጰን ኤንታራ ዳና፤ እ ኤንታ ፆሳ ግዳና።✝21:3 ህዝ 37:27፤ ሌወ 26:11. 4 ፆሳይ ኤንታ አይፈፐ አፉ ኡባ ቁቻና። ህዛፐ ሀይቆይ ዎይኮ ካዮይ ዎይኮ ዋሶይ ዎይኮ ዋየይ ዴና። ጋልአይ ኡባይ አስ" ያግስ።✝21:4 እሳ 25:8፤ እሳ 35:10፤ 65:19.

5 አራታ ቦላ ኡትዳይስ፥ "ታኒ ኡባ ኦራ ኦና" ያግስ። ቃስ ዛሪድ ታኮ፥ "ታኒ ኦደይስ አማንይሳነ ቱማ ግድያ ግሾ ፃፋ" ያግስ። 6 ቃስ ታኮ፥ "ፖለትስ! ታኒ አልፋነ ኦመጋ፤ ዶመነ ፖሎ።✝21:6 እሳ 55:1. ሳሞትዳ ኦናካ ደኦ ሃ ፑልቶፈ ጋተ ቃንፆና ጮ ኡሻና። 7 ፆንያ ኦንካ ሄሳ ኡባ ላታና፤ ታኒ እያዉ ፆሳ ግዳና፤ እካ ታ ናአ ግዳና።✝21:7 2 ሳሜ 7:14፤ ማዝ 89:26. 8 ሽን ያሻንቾታ፥ አማነቶናይሳታ፥ ቱናታ፥ ሸምፖ ዎይሳታ፥ ላይማተይሳታ፥ ብተይሳታ፥ ኤቃ ጎይነይሳታነ ዎርዳንቾታ ቃዳይ ዲነይ ኤፅያ ታማ አባን ግዳና። ሄስ ናምአን ሀይቆ" ያግስ።

9 ላፑን ዉርሰ ቦሻት ኩምዳ ላፑን ፁአታ ኦይክዳ ላፑን ኪታንቾታፐ እሶይ ታኮ ይድ፥ "ሃያ፥ ታኒ ነና ገሎስ ጊግዳ ዶርሳ ማችዉ በሳና" ያግስ። 10 ኪታንቾይ ታና ዙማ ሁጰ ጌሻ አያናን ከስድ፥ ጌሻ ካታማይ፥ የሩሳላመይ፥ ሳሎፐ ፆሳ ማታፐ ዱገ ዎሽን በስስ።✝21:10 ህዝ 40:1. 11 ሄ ካታማይ ፆሳ ቦንቾን ፖኤስ። ሄ ካታማ ፖኦይ ያስጵደ ጌተትያ አልኦ ሹቻ መላ፤ ጌሻ ብርለዳ ጶሌስ። 12 ሄ ካታማ ድርሳይ ዎልቃማነ አዱሰ። እያዉ ታማነ ናምኡ ፐንገትነ ሄ ፐንገታ ናግያ ታማነ ናምኡ ኪታንቾት ደኦሶና። ፐንገታ ቦላ ታማነ ናምኡ እስራኤለ ዘረታ ሱንይ ፃፈትስ።✝21:12 ህዝ 48:30-35. 13 ዶሎሀ ባጋራ ሄ ፐንገት፥ ፑደሀ ባጋራ ሄ ፐንገት፥ ዱገሀ ባጋራ ሄ ፐንገትነ ዉሎሀ ባጋራ ሄ ፐንገት ደኦሶና። 14 ካታማ ግምበ ድርሳይ ታማነ ናምኡ ሹቻ ባሶታ ቦላ ኤቅስ። ኤንታ ቦላ ታማነ ናምኡ ዶርሳ ሀዋረታ ሱንይ ፃፈትስ።

15 ታዉ ኦድያ ኪታንቹዋስ፥ ካታማ፥ እያ ፐንገታነ እያ ድርሳ ዋያ ዎርቃ ፃምአይ ደኤስ።✝21:15 ህዝ 40:3. 16 ካታማስ ኦይዱ ማዛነት ደኦሶና፤ ካታማ ጌሳይነ ጎምፓይ እስ ግና። ኪታንቾይ ካታማ ባ ፃምአን ዋን፥ ካታማይ ታማነ ናምኡ ሙኩሉ ክሎ ምትረ ግድስ፤ ካታማ ጌሳይ፥ ጎምፓይነ ቃተይ እስ ግና። 17 ኪታንቾይ ቃስ ድርሳ ዋን፥ ኪታንቾይ ጎኤትያ አሳ ኩሸን እስ ፄታነ ኦይታማነ ኦይዱ ዋ ግድስ።

18 ካታማ ድርሳይ ያስጵደ ጌተትያ ሹቻን ድረትስ። ካታማይ ማስቶተዳ ጶልያ ዋላህ ባይና ዎርቃን ኦሰትስ። 19 ካታማ ድርሳ ባሶይ ኡባ ቆሞ ቦንቸትዳ ሹቻን አሌቀትስ። ኮይሮ ሂፀትዳ ሹቻይ ያስጵደ፥ ናምአንይ ሳንፓረ፥ ሄንይ ከልቀዶነ፥ ኦይዳንይ ባሉረ፥ 20 እቻሻንይ ሳርዶንክሳ፥ ኡሱፑንይ ሳርድዮነ፥ ላፑንይ ክርስትሎበ፥ ሆስፑንይ ብርለ፥ ኡዱፉንይ ቶጳዘ፥ ታማንይ ክርስጵራስሰ፥ ታማነ እስንይ ያክንተ፥ ታማነ ናምአንይ አመተስፅኖሳ።

21 ታማነ ናምኡ ፐንገታስ ታማነ ናምኡ አልኦ ሹች ደኤስ። እስ እስ ፐንገይ እስ አልኦ ሹቻን ኦሰትስ። ካታማ ዎጋ ኦገይ ማስቶተዳ ጶልያ ዋላህ ባይና ዎርቃፈ ኦሰትስ።✝21:21 እሳ 54:11-12.

22 ጎዳይ፥ ኡባፈ ዎልቃማ ፆሳይነ ዶርሳይ ካታማስ ኬ ግድያ ግሾ፥ ታ ሄ ካታማን ፆሳ ኬ በአብከ። 23 ፆሳ ቦንቾይ ሄ ካታማስ ፖእያ ግሾነ ዶርሳይ እያዉ ፆምፐ ግድያ ግሾ ካታማስ አዋ ዎይኮ አጌና ፖኦ ኮሸና።✝21:23 እሳ 60:19. 24 ካዎተት ሄ ካታማ ፖኦን ሄመታና፤ ካዎትካ ባንታ ቦንቹዋ ያ ኤሀና።✝21:24 እሳ 60:3. 25 ቃም ያን ባይና ግሾ ካታማ ፐንገት ኡባ ጋላስ ዶያ ግዳና፤ ኡባራካ ጎርደቶኮና።✝21:25 እሳ 60:11. 26 ካዎተታ ግታተይነ ቦንቾይ ሄ ካታማ ያና። 27 ዶርሳ ደኦ ማፃፋን ሱንይ ፃፈትዳይሳታ ፃላል አትሽን፥ ቱናባ ዎይኮ ዬላያባ ኦይ ዎይኮ ዎርዶተይ ኦንካ ሄ ካታማ ገለና።✝21:27 እሳ 52:1፤ ህዝ 44:9.