1 "ሳርዴሳ ዎሳ ኬ ኪታንቹዋስ ሀይሳዳ ያጋዳ ፃፋ።

ላፑን ፆሳ አያናታነ ላፑን ፆልንቶታ ኦይክዳይስ ሀይሳዳ ያጌስ፦ ታኒ ነ ኦሱዋ ኤራይስ፤ አስ ነና ፓፃ ደኤስ ጊኮካ፥ ነ ሀይቃዳሳ። 2 ባርካ፤ አትዳ ጉባነ ሀይቃናዉ ማትዳባ ምን። ነ ኦሶይ ፆሳ ስንን ፖሎ ግዶናይሳ ደማስ። 3 ህዛ፥ ነ ኤክዳባነ ስእዳባ አኬካ፤ ናጋ፤ ነ ናጋራፐ ስማ። ኔኒ ባርኮና እፅኮ ታ ካይሶዳ ያና፤ ታ አይ ዎደ ያነኮ ነ ኤራካ።✝

4 ሽን ባንታ ማኡዋ ቅታዮና ጉ አሳት ሳርዴሳን ደኦሶና። ኤንታዉ በሲያባ ግድያ ግሾ ቦ ማኦ ማእድ ኤንቲ ታራ ሄመታና። 5 ፆንያ ኦንካ ኤንታይሳዳ ቦ ማኦ ማአና። ታኒ እያ ሱን ደኦ ማፃፋፐ ቁችከ። ታኒ ታ አዋ ስንንነ እያ ኪታንቾታ ስንን እ ታባ ግደይሳ ማርካታና።✝ 6 ጌሻ አያናይ ዎሳ ኬታስ ግያባ ስእያ ሀይ ደእያ ኦንካ ስኦ።

7 "ፍላደልፍያ ዎሳ ኬ ኪታንቹዋስ ሀይሳዳ ያጋዳ ፃፋ።

ጌሻይነ ቱማንቾይ፥ ዳዊታ ቁልፕያ ባ ኩሸን ኦይክዳይስ፥ ሀይሳዳ ያጌስ፦ እ ጎርድን ኦንካ ዶያናዉ ዳንዳኤና፤ ቃስ እ ዶይን ኦንካ ጎርዳናዉ ዳንዳኤና።✝ 8 ታኒ ነ ኦሱዋ ኤራስ፤ ሄኮ ታ ነ ስንን ኦንካ ጎርዳናዉ ዳንዳኦና ዶያ ፐንገ ዎስ። ነ ዎልቃይ ጉ ግድኮካ፥ ታ ቃላ ናጋዳሳ፤ ታና ካዳባካ። 9 አይሁደ ግዶናሽን፥ ባንታና አይሁደ ግያ ዎርዶታነ ፃላሄ ባጋታ ኔኮ ኤሀናነ ነ ስንን ጉልባትሳና። ታ ነና ዶሰይሳ ኤንታና ኤርሳና።✝ 10 ኔኒ፥ ‘ገንጫ’ ጋዳ ታ ኪትዳ ኪታ ናግዳ ግሾ፥ ኩመ አላምያ ፓጫናዉ ያ ዋየ ዎድያፐ ታኒ ነና ናጋና።

11 ታኒ ኤለሳዳ ያና፤ ኦንካ ነ ካላቻ ኤኮና መላ ነዉ ደእያባ ምንዳ ኦይካ። 12 ፆንዳይሳ ታ ፆሳ ኬን ቱሱ ኦና፤ እ ያን መርናዉ ዳና። ታኒ ታ ፆሳ ሱንነ ታ ፆሳ ካታማ ሱን እያ ቦላ ፃፋና፤ እያካ ታ ፆሳ ማታፐ ዎያ ኦራ የሩሳላመ። ቃስ ታኒ ታ ኦራ ሱንካ እ ቦላ ፃፋና።✝ 13 ጌሻ አያናይ ዎሳ ኬታስ ግያባ ስእያ ሀይ ደእያ ኦንካ ስኦ።

14 "ሎዶቀ ዎሳ ኬ ኪታንቹዋስ ሀይሳዳ ያጋዳ ፃፋ።

አምንእ ግድዳ አማነትዳ ቱማ ማርካይ፥ ፆሳ መተ ሃረይስ ሀይሳዳ ያጌስ፦✝ 15 ታኒ ነ ኦሱዋ ኡባ ኤራይስ፤ ኔኒ እርፃ ዎይኮ ምሻ ግዳካ፤ ኔኒ ናምኣፈ እሱዋ ግድኮ ሎኦ! 16 ኔኒ እርፃ ዎይኮ ምሻ ግዶናሽን፥ ቦልኦ ግድያ ግሾ ታ ነና ታ ዶናፐ ጩታና ሀናይስ። 17 ህዛ፥ ኔኒ፥ ‘ታኒ ዱረ፥ ሻሎራ ደአይስ፥ ታዉ አይብባይካ ፓጭቤና’ ያጋሳ። ሽን ኔኒ መቶታንቾ፥ ማንቆ፥ ቆቀነ ካሎትዳ አስ ግደይሳ ኤራካ። 18 ሄሳ ግሾ፥ ነ ዱረታናዉ ታማን ጌይዳ ዎርቃ፥ ነ ዬላ ካሉዋ ካማናዉ ቦ ማኦነ ሎይ ፄላናዉ ዳንዳእስያ አይፈ ለ ታፐ ሻማና መላ ነና ታ ዞራይስ።

19 ታ ዶሰይሳ ሴራይስነ ሀንቃይስ፤ ህዛ ምና፤ ነ ናጋራፐ ስማ።✝ 20 ሄኮ፥ ታ ካረን ኤቃዳ ፄጋይስ። ኦንካ ታ ፄሳ ስእድ፥ ዉላ ዶይኮ፥ እያኮ ገላና፤ እያራ እስፈ ካ ማና፤ እካ ታራ እስፈ ማና።

21 ታ ፆናዳ ታ አዋራ እያ አራታን ኡትዳይሳዳ ፆንዳይ ታራ ታ አራታን ኡታና መላ ማታ እማና። 22 ጌሻ አያናይ ዎሳ ኬታስ ግያባ ስእያ ሀይ ደኤይ ኦንካ ስኦ" ያግስ።