1 ዶርሳይ ላፑን ማታመታፐ እሱዋ ዶይሽን በአስ። ቃስ ኦይዱ ደኦን ደእያ መተታፐ እሶይ፥ ዳዳ ደሾ ዳንያ ግርሳን፥ "ሃያ!" ያግሽን ስአስ። 2 ሄኮ ቦ ፓራ በአስ። ሄ ፓራ ቶግዳይስ ዶንገ ኦይክስ፤ እያ ሁጰን ካላች ደኤስ። እካ ፆንሸ ፆናናዉ ከይስ።✝6:2 ዛካ 1:7.

3 ቃስ ዶርሳይ ናምአን ማታምያ ዶይዳ ዎደ ደኦን ደእያ ናምአን መተይ፥ "ሃያ!" ያግሽን ስአስ። 4 ቃስ ሀራ ስሀ ዞኦ ፓር ከይስ። ሄ ፓራ ቶግዳይሳስ ሳአፐ ሳሮ ይሳና መላነ አሳይ ዎል ዉርሳና መላ ማትነ ግታ ማሻይ እመትስ።✝6:4 ዛካ 1:7.

5 ዶርሳይ ሄን ማታምያ ዶይዳ ዎደ ደኦን ደእያ ሄን መተይ፥ "ሃያ!" ያግሽን ስአስ። ሄኮ ካሬ ፓራ በአስ፤ እካ ባ ኩሸን ምዛነ ኦይክስ።✝6:5 ዛካ 6:2. 6 ኦይዱ ደኦን ደእያ መተታ ግዶፈ፥ "እስ ጋላሳ ኦሶስ ዳሞዘ፥ ባጋ ክሎ ግስተ፤ ቃስ እስ ጋላሳ ኦሶስ ዳሞዘ፥ እስ ክሎነ ባጋ ባንጋ ግዶ። ሽን ዛይትያነ ዎይንያ ቆሆፓ" ያግሽን ስአስ።

7 ዶርሳይ ኦይዳን ማታምያ ዶይዳ ዎደ ኦይዳን ደኦን ደእያ መተይ፥ "ሃያ!" ያግሽን ስአስ። 8 ሄኮ ዋንጮ ፓራ በአስ። ሄ ፓራ ቶግዳይሳ ሱንይ ሀይቆ፤ እያ ጌዶ ስኦለይ ካሌስ። ኤንታዉ አላመፐ ኦይዳን ኩሽያ ኦላን፥ ኮሻን፥ ጋዶንነ ዶአን ዎሳና መላ ማት እመትስ።✝6:8 ህዝ 14:21.

9 ዶርሳይ እቻሻን ማታምያ ዶይዳ ዎደ ኤንቲ ፆሳ ቃላ ኦድዳ ግሾነ ባንታ ማርካተን አማነትዳ ግሾ ሹከትዳ አሳ ሸምፖታ ያርሾ በሳፈ ጋርሳን በአስ። 10 ኤንቲ ባንታ ቃላ ቁ ኦድ፥ "ኡባ ሃርያ ጎዳዉ፥ ጌሻዉ፥ ቱማንቹዋዉ፥ ሳአን ደእያ አሳ ቦላ ነ ፕርዳናይነ ኑ ሱ ግሾ ሀሎ ከያናይ አዉዴ?" ያግዶሶና። 11 ኤንታ እሱዋስ እሱዋስ ቦ ማኦይ እመትስ። ኤንታይሳዳ ሀንድ ሀይቃናዉ በሲያ ኤንታ ላገታ ታይቦይ ኩማና ጋካናዉ ጉ ዎደ ሸምፓና መላ ኤንታዉ ኦደትስ።

12 ዶርሳይ ኡሱፑን ማታምያ ዶይዳ ዎደ ታ በአስ፤ ዎልቃማ ቢታ ቃፆይ ሀንስ። አዋ አይፈይ ካሬፅድ ካዮ ማኦ መላ ግድስ። አጌናይካ ዞእድ ሱ ዳንስ።✝6:12 ቆን 11:13፤ 16:18፤ እሳ 13:10፤ ኤርም 2:10. 13 ዎልቃማ ጫርኮይ ጫርክድ ባላሰ ም ቃዉኤ አይፍያ ቆቆፈይሳዳ ሳሉዋ ፆልንቶት ሳአን ቆቆፈትዶሶና።✝6:13 እሳ 34:4. 14 ሳሎይ ፃ ማፃፋዳ ፃፀትድ አስ፤ ዙማይነ ዩሾይ አባን ተቀትዳ ቢታት ባንታ በሳፈ ይዶሶና።✝6:14 ቆን 16:20. 15 ቢታ ካዎት፥ ደርያ ሃረይሳት፥ ኦላ ካለይሳት፥ ዱረት፥ ዎልቃማት፥ አይለትነ፥ ዎማኖት ጎንጎሎንነ ደረ ቦላ ደእያ ዛላ ሆምኦን ቆሰትዶሶና።✝6:15 እሳ 2:19. 16 ኤንትካ ዙማኮነ ዛላኮ፥ "ኑ ቦላ ዎተ፤ ኑና ቆስተ፤ አራታን ኡትዳይሳ አይፍያፐነ ዶርሳ ሀንቁዋፈ ኑና ገንተ።✝6:16 ሆሰ 10:8፤ ሉቃ 23:30. 17 ህዛ፥ ግታ ሀንቆ ጋላሳይ ጋክስ፤ ዳንዳእድ ኤቃናይ ኦኔ?" ያግዶሶና።✝6:17 ኤርም 2:11፤ ምልክ 3:2.