1 ባንታ ሶ አሳ ኡባ ኤክድ፥ ያይቆባራ ግብፀ ብዳ እስራኤለ አደ ናይታ ሱንይ ሀይሳፈ ካልድ ፃፈትዳይሳ፤ 2 ኤንትካ ሮቤላ፥ ስሞና፥ ሌወ፥ ይሁዳ፥ 3 ይሳኮራ፥ ዛብሎና፥ ብንያመ፥ 4 ዳነ፥ ንፍታለመ፥ ጋደነ አሴራ። 5 ያይቆባ ሼሻት ኡባይ ላፑን ታማ። ዮሰፍ ካሰካ ግብፀን ደኤስ። 6 ዎደፐ ጉየን ዮሰፍ፥ እያ እሻትነ ሄ የለተ ኡባይ ሀይቅዶሶና። 7 ሽን እስራኤለ ሼሻይ የለትድ ግብፀ ቢታ ኩማና ጋካናዉ ታይቦን ዳርዶሶናነ ምንዶሶና።

8 ሄሳፈ ጉየ፥ ዮሰፋ ኤሮና ሀራ ካዎይ ግብፀ ቢታን ካዎትስ። 9 ሄ ካዎይ ባ አሳ፥ "ሄኮ፥ ሀ እስራኤለት ኑፐ አድ የለተንነ ዎልቃን ዳርዶሶና። 10 ኑኒ ሂላቶና እፅኮ ኤንቲ ታይቦን ካሰይሳፈ ሃ ዳራና። ቆፖና ኦል ደንድኮ ኤንቲ ኑ ሞርከታራ እስፍድ ኑና ኦልድ፥ ቢታ የግድ ባናዉ ዳንዳኦሶና" ያግስ። 11 ሄሳ ግሾ ዴፆ ኦሶን ኤንታ ኡንኤና መላ ኤንታ ቦላ ኢታ ካፖታ ዎዶሶና። ኤንቲ ፕቶማነ ራምሰ ጌተትያ ሻሎ ዎያ ካታማታ ካዋስ ኬፅዶሶና። 12 ሽን ግብፀት ኤንታ ዳርስ ኡንኤንካ ኤንቲ ሃ ዳርድ የለትዶሶናነ ቢታ ጋክዶሶና። ግብፀት እስራኤለታ እፅዳ ግሾ ያይዶሶና። 13 ኤንታና ኢታ ኦሶ ኦስስዶሶና። 14 ኡርቃ የሶን፥ ስምንቶን ፁበ መን ቃስ ጋደ ኦስሶን ኤንታ ደኡዋ ጫምስዶሶና። ቃይ ባይና ዴፆ ኦሶ ኡባ ኤንታ ኦስስዶሶና።

15 ግብፀ ካዎይ ቃን እብራወ ማጫሳታ ኡሎ ፕትያ ስፖሮነ ፑሆ ጌተትያ ናምኡ ማጫሳታኮ ሀይሳዳ ያግስ፤ 16 "እብራወ ማጫሳት የልያ ዎደ የለትዳ ናአይ አደ ግድኮ ዎተ፥ ሽን ማጫ ግድኮ ፓፃ አግተ" ያግስ። 17 ሽን ኡሎ ፕተይሳት ፆሰ ባቢድ፥ ግብፀ ካዎይ ኪትዳይሳዳ ኦቦኮና። ኤንቲ አደ ናይታ ፓፃ አግዶሶና። 18 ሄሳፈ ጉየ፥ ግብፀ ካዎይ ሄ ኡሎ ፕተይሳታ ፄግድ፥ "ህንተ አይስ ሀይሳ ኦደቲ? አደ ናይታ አይስ ፓፃ አገቲ?" ያግድ ኤንታ ኦይችስ።

19 ኡሎ ፕተይሳት ዛሪድ፥ "እብራወ ማጫሳት ግብፀ ማጫሳታ መላ ግዶኮና። ኤንቲ ምኖ ግድያ ግሾ ኡሎ ፕተይሳት ጋካናፐ ስንትድ የሎሶና" ያግዶሶና።

20 ሄሳ ግሾ ፆሳይ ኡሎ ፕተይሳታስ ኬህስ። እስራኤለ አሳይ ካሰይሳፈ ሃ ዳርሸነ ምንሸ ብዶሶና። 21 ቃስ ኡሎ ፕተይሳት ፆሳስ ያይዳ ግሾ ፆሳይ ኤንታዉ ኤንታ ሶ አስ እሚስ። 22 ሄሳፈ ጉየ ካዎይ ባ አሳ ኡባኮ፥ "እብራወታፐ የለትያ አደ ኡባ ናይለ ሻፋን የግተ፤ ሽን ማጫ ናእ የለትኮ ፓፃ አግተ" ያግድ ኪትስ።