1 ሄ ዎደ ሙሰይነ እስራኤለ አሳይ ሀ ማዝሙርያ ጎዳስ የፅዶሶና።

እ ባ ግታ ፆኑዋን ቦንቸትዳ ግሾ፥

ታኒ ታ ጎዳስ ጋላታ ማዝሙርያ የፃና።

ፓራነ ፓራ ቶገይሳ አባን የግስ።

2 ጎዳይ ታ ምኖተነ ታ ማዝሙርያ ጋሱዋ፥

እ ታና አሸይሳ።

እ ታ ፆሳ፤ ታኒ እያ ሳባና።

እ ታ አዋታ ፆሳ፤ ታኒ እያ ቦንቻና፤ ጋላታና።

3 ጎዳይ ኦላንቾ፤

እያ ሱንይካ ጎዳ።

4 ግብፀ ካዉዋ ፓራ ጋረታነ እያ ኦላንቾታ አባን የግስ።

ግብፀ ካዉዋ፥ ኡባፈ አ ግድዳ ቶራ ሞጮናታ፥ ዞኦ አባን ምትስስ።

5 ኤንታና ጪሞ ሃይ ምትስ፤

ኤንቲ ሹቻዳ ጪሞን ምተትዶሶና።

6 "አቤት ጎዳዉ፥ ነ ኡሻቻ ኩሸይ ዎልቃን ጎባ፤

ነ ኩሸይ ሞርክያ መንረስ።

7 ነ ግታ ፆኑዋን፥

ኔራ ኤቀተይሳታ ኦላዳሳ።

ነ ሸነይ ታማዳ ኤፅድ፥

ኤንታ ካፍለዳ ምስ።

8 ነ ሀንቁዋን ነ አባ ፑንን፥

ሃይ ጎዳዳ ኤቅስ።

አባ ጪሞት ጋርሳን ሹቻዳ ምንዶሶና።

9 "ሞርከይ፥ ‘ታኒ ኤንታ የደዳ ኦይካና፤

ታኒ ኤንታ ሻሉዋ ሻካዳ፥

ታ ኮይዳባ ኡባ ኤካና።

ታኒ ታ ማሻ ሾዳዳ ኤንታ ይሳና’ ያግድ ጬቀትስ።

10 ሽን ኔኒ ኤንታ ፑንን፥ አባይ ኤንታ ምትስ።

ኤንቲ አባ ጪሙዋን ብራታዳ ምተትዶሶና።

11 አቤት ጎዳዉ፥ ፆሳታ ግዶን ነ ማል ኦኔ?

ጌሻተን ያሸይ ነ ማል ኦኔ?

ቦንቾይ ዳጋንይነ ማላልስያባ ኦይ ነ ማል ኦኔ?

12 ኔኒ ነ ኡሻቻ ኩሽያ ምጭዳ ዎደ፥

ቢታይ ኤንታ ምትስ።

13 "ኔኒ ዎዝዳ አሳ ነ መርና ሲቁዋን ካለዳሳ።

ኔኒ ነ ዎልቃን ኤንታ ነ ጌሻ ቢታ ገልሳዳሳ።

14 ካዎተት ሄሳ ስእድ ያሻን ኮኮርዶሶና።

ፍልስፄመ ቢታ አሳትካ ኡንኤትዶሶና።

15 ሄ ዎደ ኤዶመ ቢታ ሀላቃት ዳጋምዶሶና፤

ሞአበ ቢታ ሃረይሳት ያሻን ኮኮርዶሶና፤

ካናነ አሳት ዳጋማን ዳቡርዶሶና።

16 ዳጋምነ ያሽ ኤንታ ኦይክስ።

አቤት ጎዳዉ፥ ኤንቲ ነ ዎልቃ ግታተ በእድ፥

ነ አሳይ አና ጋካናዉ፥

ኔኒ ዎዝዳ አሳይ አና ጋካናዉ፥

ሹቻዳ ቶለትድ ኤቅዶሶና።

17 ኔኒ ኤንታ ኤሀዳ፥ ነ ዙማ ሁጰን ቶካና።

አቤት ጎዳዉ፥ ሄ በሳይ ኔኒ ነዉ ዳናዉ ዶርዳ በሲ፥

ኔኒ ነ ኩሽያን ምንዳ ኬፅዳ ነ ኬ።

18 ጎዳይ መርና ጋካናዉ ካዎታና"

ያግድ የፅዶሶና።

19 እስራኤለት አባ ግዶራ መላ ቢታራ ፕንን፥ ግብፀ ካዉዋ ፓራት፥ እያ ፓራ ጋረትነ እያ ፓራ ቶገይሳት አባን ገልዳ ዎደ ጎዳይ ኤንታ ቦላ አባ ሃ ዛርን ሃይ ኤንታ ምትስ። 20 አሮና ምችያ፥ ናብያ ማይራማ ካራቦ ኤካሱ። ሀራ ማጫሳት ኡባይ ባንታ ካራቦ ኤክድ ባቅሸነ የፅሸ እዮ ካልዶሶና። 21 ማይራማ፥

"እ ባ ግታ ፆኑዋን ቦንቸትዳ ግሾ፥

ፓራነ ፓራ ቶገይሳታ እ አባን የግዳ ግሾ፥

እያዉ ማዝሙርያ የፅተ" ያጋዳ ኤንታዉ የፃሱ።

22 ሄሳፈ ጉየ፥ ሙሰይ ዞኦ አባ ማታፐ እስራኤለታ ደንድ ሹራ መላ ቢታ ጋካናዉ ካለስ። ሄ መላ ቢታን ኤንቲ ሄ ጋላስ ሄመትዶሶና ሽን ሃ ደምቦኮና። 23 ኤንቲ ማራ ጌተትያ በሲ ጋክድ ሃ ደምዶሶና፥ ሽን ሃይ ጫሞ ግድያ ግሾ ኡያናዉ ዳንዳእቦኮና። ሄሳ ግሾ ሄ በሳይ ማራ* ጌተትስ። 24 አሳይ፥ "ኑኒ አይ ኡያኔ?" ግድ ሙሰ ቦላ ዙዙምዶሶና።

25 ያንን፥ ሙሰይ ጎዳኮ ዋስስ፤ ጎዳይ እያ እስ ም በስስ። ሙሰይ ሄ ም ሃን የግን ሃይ ማልእስ።

ያን ጎዳይ ኤንታዉ ህገ እሚስ፤ ያን ጎዳይ ኤንታ ፓጭስ። 26 ሙሰይ ኤንታኮ፥ "ህንተ ህንተ ጎዳ ፆሳስ ኪተትተ፤ እ ኮያባ ኦተ። ህንተ ታዉ ፖሎ ኪተትኮነ ታ ግያባ ስእኮ ግብፀታ ቦላ ታ የድዳ ሀርግያን ህንተና ፕርድከ። ታኒ ህንተና ፓያ ጎዳ" ያግስ።

27 ሄሳፈ ጉየ ኤንቲ ኤልማ ብዶሶና። ያን ታማነ ናምኡ ሃ ፑልቶትነ ላፑን ታሙ ዛምባ ምት ደኦሶና። ኤንቲ ያን ሃ ዶናን ኡትዶሶና።