ከሳ ማፃፋ 20:18-26

18 አሳ ኡባይ ደሾይ ደቸይሳነ ሞይዘይ ፑነተይሳ ስእድ፥ ዎልአንይ ዎልአመይሳነ ደረይ ጩየይሳ በእድ ያሻን ኮኮርሸ ሃሆን ኤቅዶሶና። 19 ኤንቲ ሙሰኮ፥ "ኔኒ ኑስ ኦዳ፤ ኑኒ ስአና። ሽን ኑኒ ሀይቆና መላ ፆሳይ ኑስ ኦዶፖ" ያግዶሶና። 20 ሙሰይ አሳኮ፥ "ያዮፍተ፤ ፆሳይ ህንተና ፓጫናዉነ ህንተ እያዉ ኪተትድ ናጋራ ኦና መላ እ ይስ" ያግስ። 21 አሳይ ባንታ ደእያሱዋን ሃክድ ኤቅዳሽን፥ ፆሳይ ደእያሱዋ ሙምዳ ሻራኮ ሙሰይ ሺቅስ።

ያርሾ በሳታነ ኤቃታ

22 ሄሳፈ ጉየ፥ ጎዳይ ሙሰኮ "እስራኤለ አሳስ ሀይሳዳ ያጋዳ ኦዳ፤ ‘ሳሎፐ ታኒ ህንተዉ ኦድሽን ህንተ ታና ህንተ ሁጰን በእደታ። 23 ያንያ ግሾ፥ ብራ ኤቃ ዎይኮ ዎርቃ ኤቃ ህንተዉ ኦድ ታ ቦላ ጉጅድ ጎይኖፍተ። 24 ነን ታዉ ያርሾ በሲ ኡርቃፈ ጊግሳ። ነ ዶርሳታፐነ ነ ቦራታፐ ኤካዳ ፁሳ ያርሾነ እስፈተ ያርሾ እያ ቦላ ያርሻ። ህንተ ታና ጎይናና መላ ታኒ ዶርዳ በሳ ኡባን ህንተኮ ያዳ ህንተና አንጃና። 25 ህንተ ታዉ ያርሾ በሲ ሹቻፈ ኬፅያባ ግድኮ ማሰትዳ ሹቻፈ ኬፆፋ። ኔኒ ማስያ ሚሸን እያ ቦችኮ ቱንሳሳ። 26 ህንተ ከይሸ ካሎቶና መላ ታዉ ያርሾ በሲ ኮዶራ ከይያ በሳን ኬፆፋ’ " ያግስ።