ፆሳ ኬስ እመትዳ እሙዋ
1 ጎዳይ ሙሰኮ ሀይሳዳ ያግስ፤ 2 "ታዉ እሞታ ኤሀና መላ እስራኤለታስ ኦዳ። እያ ዎዛን እያ እማ እማ ግዳባ እምያ እሞታ አሳ ኡባፈ ታዉ ኤካ። 3 ህንተ ኤንታፈ ኤካና እሞታይ፥ ዎርቃ፥ ብራ፥ ናሰ ብራታ፥ 4 ካሎሰ ቃጭና፥ ኦቻ ቴራ ዳንያ ቃጭና፥ ዞኦ ቃጭናነ አልኦ ሊኖ፥ ዴሻ እክሰ፥ 5 ሃሸትድ ዞኦ ቃላመን ትየትዳ ዶርሳ እተ፥ ሎኦ ዶአ እተ፥ ሶቃላ ም፥ 6 ፆምፐስ ማድያ ሻማሆ ዛይተ፥ ሹማተ ዛይትያንነ እፃንያን ጉዠትያ ሳዎታ፥ 7 ካህነ ሀላቃይ ማእያ ኤፉደ ጌተትያ ማኡዋ ቦላነ እያ ትራን ዎሰትያ ማርግደ ጌተትያ አልኦ ሹቻነ ሀራ አሌቆ ሹቻታ ኤሆ። 8 ታኒ ኤንታ ግዶን ዳና መላ ኤንቲ ታና ጎይንያ በሲ ጊግሶ።" 9 ዱንካንያነ እያ ግዶን ደእያ ሚሸታ ኡባ ታ ነና በሲያ ማራን ኦ።
ጫቆ ታቦተ
(ከሳ 37:1-9)
10 "ሶቃላ ምፈ፥ አዱሳተይ ናምኡ ዋነ ታካ፥ ጎምፓይ እስ ዋነ ታካ፥ ጌሳይ እስ ዋነ ታካ ግድያ ሳፅነ ኦተ። 11 ጋነ ካርያ ዋላህ ባይና ዎርቃን ካማ፤ እያ ዩሹዋካ ዎርቃን ላንፃ። 12 ሄ ታቦትያስ ኦይዱ ዎርቃ ሳጋዮታ ኦዳ፤ ኦይዱ ገዳታ ቦላ እስ ባጋራ ናምኡ ሳጋዮታ፥ ቃስ ሀንኮ ባጋራ ናምኡ ሳጋዮታ አዳ ጋሰ። 13 ታቦትያ ቶክያ ካሶ ምታ ሶቃላ ምፈ ከሳዳ ዎርቃን ላንፃ። 14 ታቦትያ ቶካናዉ እያ ምየን ደእያ ሳጋዮታን ካሶ ምታ አ። 15 ቶክያ ካሶ ምት ታቦትያ ሳጋዮታ ግዶን ደኦ፤ ኤንቲ ያፐ ከዮፖ። 16 ታቦትያ ግዶን ታኒ ነዉ እምያ፥ ታሙ ኪታት ፃፈትዳ ናምኡ ሎቸ ሹቻታ ዎ።
17 "ዋላህ ባይና ዎርቃፈ አዱሳተይ ናምኡ ዋነ ታካ፥ ጎምፓይ እስ ዋነ ታካ ግድያ ናጋራ አቶተ ካማ ኦ። 18 ቀፈራ ደእያ ናምኡ ክሩበታ ዎርቃፈ ቆፃዳ ኦ። 19 እስ ክሩብያ እስ ባጋ ጋፃን፥ ናምአን ክሩብያ ሀንኮ ባጋ ጋፃን ዎዳ ናምኣ ታቦትያ ጉጵያራ ኦይዳ ኦ። 20 ክሩበት ዎልኮ ስም ኡትድ፥ ባንታ ቀፍያ ደንድ፥ አቶተ ካማ ካሞ። 21 ታኒ ነዉ እምያ ሎቸ ሹቻ ቦላ ፃፈትዳ ታሙ ኪታታ ታቦትያ ግዶን ዎ። ያታዳ፥ ጉጵያ ታቦትያ ቦላ ዎ። 22 ታቦትያ ጉጵያ ቦላ ደእያ ናምኡ ክሩበታፐ ግዶን ግዳዳ ታኒ ኔራ ጋሄታና። እስራኤለ አሳስ እምያ ኪታ ኡባ ታኒ ያን ነዉ እማና።"
ኡይ ፃርጴዛ
23 "ሶቃላ ምፈ አዱሳተይ ናምኡ ዋ፥ ጎምፓይ እስ ዋ፥ ጌሳይ እስ ዋነ ታካ ግድያ እስ ፃርጴዛ ኦ። 24 ያታዳ፥ ዋላህ ባይና ዎርቃን ላንፃ፤ እያ ዩሹዋካ ዎርቃን ላንፃ። 25 ሄሳዳካ፥ ጎምፓይ ታካ ግድያ ጎሳ እያ ቦላ ዩሻ አ። ያታዳ፥ እያ ዩሹዋ ዎርቃን ላንፃ። 26 ሄ ፃርጴዛስ ኦይዱ ዎርቃ ሳጋዮታ ኦዳ፥ ፃርጴዛ ኦይዱ ቶሆታራ ኦይ። 27 ፃርጴዛ ቶካናዉ ካሶ ምታ አያ ሳጋዮት ፃርጴዛ ጎሳ ማታን ሺቅድ ደኦ። 28 ሄ ቶክያ ካሶታ ሶቃላ ምፈ ከሳዳ፥ ዎርቃን ላንፃ። 29 ሄሳዳካ፥ ሻተታነ ጭልፓታ፥ ዎይነ ያርሹዋ ዱቅያ ሚሸታነ ፁአታ ዋላህ ባይና ዎርቃፈ ኦ። 30 ፃርጴዛይ ታቦትያስ ስን ባጋራ ኡቶ። ታ ስንን ኡትያ ጌሻ ኡይይ ኡባ ዎደ ፃርጴዛ ቦላፈ ዮፖ።"
ፆምፐ ዎያ ኮጫ
(ከሳ 37:17-24)
31 "ፆምፐ ዎያ ኮጫ ዋላህ ባይና ዎርቃፈ ኦ። ሄ ኮጫይ ኤቅያ ቶሁዋነ ቶማ ዎርቃፈ ቆፃዳ ኦ። አሌቆስ ኦሰትያ ዋላፃት፥ ጋምቡትነ ጪሻት ኡባይ እስኖ ግድድ ኦሰታናዉ በሴስ። 32 ናምኡ ባጋራ፥ ሄ ሄ ታሸታ እያዉ ከሳ። 33 ኡሱፑን ታሸታስ ፄራን ፄራን ሄ ሄ አሌቆ ጋምቡትነ ጪሻት ደእያ ላውዘ ም ጪሸ ዳንያባይ ደኦ። 34 ፆምፕያ ዎያ ኮጫ ግዶን ደእያ ቶማ ፄራን ኦይዱ አሌቆ ጋምቡትነ ጪሻት ደእያ ላዉዘ ም ጪሸ ዳንያባይ ደኦ። 35 ታሸታፐ ጋርሳን፥ ናምኡ ታሸት ጋሄትያ በሳን እስ እስ ጋምቡ ደኦ። 36 ጋምቡይ፥ ታሸይነ ፆምፕያ ዎያ ኮጫይ እስኖ ግድድ፥ ዋላህ ባይና ዎርቃፈ ቆፀትድ ኦሰቶ።
37 "ፆምፐ ዎያ ኮጫ ቦላ ላፑን ፆምፐታ ጊግሳዳ፥ ኤንቲ ስን ፖአና መላ ቁ ኦዳ ዎ። 38 ፆምፕያ ናጋናዉ ማድያ ቃጰታነ ኤንታ ዎያባታ ዋላህ ባይና ዎርቃፈ ኦ። 39 ፆምፐ ዎያ ኮጫይነ እያ ሚሸት ኡባይ ሀስታማነ እቻሹ ክሎ ግራመ ግድያ ዋላህ ባይና ዎርቃፈ ኦሰቶ። 40 ታኒ ነና ዙማ ቦላ በስዳ ሌምሱዋ ካላዳ፥ አኬካዳ ኦ።"