ያርሾ በሲ
1 "ሶቃላ ምፈ ያርሾ በሲ ኦ። አዱሳተይነ ጎምፓይ ኦይዱ ዋነ ታካ፥ ጌሳይ ሄ ዋ ግድዳ ኦይዱ ማዛነራ ደእያ ያርሾ በሲ ኦ። 2 ኦይዱ ማዛነታ ቦላ ካጨ ዳንያባ ከሳ፤ ካጨት ያርሾ በሳራ እስኖ ግድድ ኦሰቶ። ያታዳ፥ ያርሾ በሳ ኡባ ናሰ ብራታን ላፃ። 3 እያዉ ጎኤትያ ሚሸታ፤ ብዶ ከስያ ከረታ፥ አካፋታ፥ ባልደታ፥ አሾ ቃጰታነ ጮጨታ ኡባ ናሰ ብራታፐ ኦ። 4 ያታዳ፥ ናሰ ብራታፐ ዛርዛረ ዳንያባ ኦዳ፥ እያዉ ኦይዱ ማዛነታ ቦላ ኦይዱ ሳጋዮታ ጊግሳ። 5 ሄ ዛርዛርያ ያርሾ በሳ ጎሳፈ ጋርሳን ያርሾ በሳስ ባጋ ዛዋ ጋዳ ዎ። 6 ሶቃላ ምፈ ያርሾ በሳ ቶክያ ካሶ ምታ ከሳዳ፥ ናሰ ብራታን ላንፃ። 7 ያርሾ በሳ ቶክያ ዎደ ማዳና መላ ሄ ካሶ ምታ ናምኡ ምየራ ደእያ ሳጋዮታን አ። 8 ታኒ ነና ዙማ ቦላ በስዳይሳዳ ያርሾ በሲ ፃዉላፐ ኦዳ፥ ግዱዋ ካይስ ኦ።"
ጌሻ ዱንካነ ዳባባ
9 "ጌሻ ዱንካንያ ዳባባ ገቻናዉ አልኦ ሊኖፐ ማጋራጆ ጊግሳ። ገሸታስ አዱሳተይ ዱገሀ ባጋራ ፄቱ ዋ ግዶ። 10 እያዉ ካተ ግዳና መላ ናሰ ብራታፐ ኦሰትዳ ላታሙ ቱሳታነ ላታሙ ቶሆታ ኦ። ኤንታ ቦላ ብራ ብራታፐ ኦሰትዳ ፃምአታነ ካጨታ ኦ። 11 ዳባባስ ፑደሀ ባጋራካ ሄሳዳ ኦ።
12 "ዳባባስ ዉሎሀ ባጋ አዱሳተይ እሻታሙ ዋ ግድዳ ገሸት ኦሰትድ፥ ኤንታዉ ታሙ ቶሆይ ደእያ ቱሳት ደኦ። 13 ገልያ ዉላይ ደእያ፥ ዶሎሀ ባጋ ዳባባ ጎምፓይ እሻታሙ ዋ ግዶ። 14 ዳባባ ፐንግያፈ እስ ባጋራ አዱሳተይ ታማነ እቻሹ ዋ ግድያ ገሸት ደኦ፤ ኤንታዉ ሄ ቶሆይ ደእያ ሄ ቱሳት ደኦ። 15 ሀንኮ ባጋራ ደእያ ገሸትካ ሄሳዳ ኦሰቶ።
16 "ዳባባ ገልያ ዉላስ አዱሳተይ ላታሙ ዋ ግድያ፥ አልኦ ሊኖፐ ማጋራጆ ጊግሳዳ፥ ካሎሰ፥ ኦቻ ቴራ ዳነይሳንነ ዞኦ ቃጭናን ዳዳዳ አሌቅሳ። ኤንቲ እያን ዘምፓና መላ ኦይዱ ቶሆራ ደእያ ኦይዱ ቱሳታ ጊግሳ። 17 ዳባባ ዩሹዋን ደእያ ቱሳት ኡባይ ብራ ብራታፐ ኦሰትዳ ፃምአታን ኦይከቶ፤ ኤንታ ካጨት ብራ ብራታፐ፥ ኤንታ ቶሆት ናሰ ብራታፐ ኦሰቶ። 18 ዳባባ አዱሳተይ ፄቱ ዋ፥ ጎምፓይ ኦይታሙ ዋ፥ ጌሳይ እቻሹ ዋ ግዶ። ማጋራጆት አልኦ ሊኖፐ፥ ኤንታ ቶሆትካ ናሰ ብራታፐ ኦሰቶ።
19 "ጌሻ ዱንካንያን ጎኤትያ ሚሸ ኡባይ፥ ዱንካንያነ ዳባባ ሸት ኡባይ ናሰ ብራታፐ ኦሰቶ።
ፆምፐ ዛይተ
20 "ፆምፐይ ቃማ ፖእሸ አቃና መላ ጉምእ ፅልስዳ ሻማሆ ዛይተ ነዉ ኤሀና መላ እስራኤለ አሳ ኪታ። 21 አሮንነ እያ ናይት፥ ፖኦይ፥ ጎዳ ስንን ኦማርሳፈ ዎንታ ጋካናዉ ፖአና መላ ጌሻ ዱንካንያ ግዶን፥ ማርካ ታቦትያ ስንን ደእያ ማጋራጁዋፈ ካረ ባጋራ ኤ። ሄስ እስራኤለ አሳስ መርና ዎጋ ግድድ ደኦ።