እፃነ ያርሽያ በሲ
(ከሳ 37:25-28)
1 "እፃነ ጩይስያ በሳ ሶቃላ ምፈ መ። 2 እያዉ ኦይዱ ማዛነይ ደኦ። አዱሳተይነ ጎምፓይ እስ እስ ዋ፥ ጌሳይ ናምኡ ዋ ግዶ። ኦይዱ ማዛንያን ደእያ ካጨት እያራ ኦይከትድ ኦሰቶና። 3 እያዉ ቦላ ባጋ፥ እያ ኦይዱ ማዛነታነ እያ ካጨታ ዋላህ ባይና ዎርቃን ላንፃ። እያ ዩሹዋካ ዎርቃን ላንፃ። 4 ናምኡ ዎርቃ ሳጋዮታ ኦዳ፥ ፃርጴዛ ቶካናዉ ማድያ ካሶ ምታ አናዉ ጎሳስ ናምኡ ባጋራ ኦይ። 5 ካሶ ምታ ሶቃላ ምፈ ከሳዳ፥ ኤንታ ዎርቃን ላንፃ። 6 ሄ እፃነ ያርሾ ፃርጴዛ፥ ጫቆ ታቦትያ ስንን ካቀትዳ ማጋራጁዋፈ ካረ ባጋራ ዎ። ያን ታኒ ኔራ ጋሄታና።
7 "አሮን ዎንታ ዎንታ ፆምፐታ ጊግሳናዉ ይያ ዎደ፥ ሳውያ እፃነ ያርሽያ በሳን ጩይሶ። 8 ሄሳዳ፥ አሮን ኦማርስ ፆምፐታ ፆምፕያ ዎደካ እፃነ ጩይሶ። ሄ እፃንያ ያርሾይ ያና ላይ ኡባን ጎዳ ስንን ጩዮ። 9 ሀ ያርሾ በሳን ሀራ ድገትዳ እፃነ፥ ካ ያርሾ፥ መሄ ያርሾነ ዎይነ ያርሾ ያርሾፋ። 10 አሮን፥ ናጋራ አቶተስ ላይፈ እስ ቶሆ ሹከትያ መህያ ሱፈ ኤክድ፥ ሄ ያርሾ በሳ ማዛነታ ቦላ ደእያ ካጨታ ዎድ ጌሾ ዎጋ ፖሎ። ሀ ዎጋይ ስንራ ያና ዎደ ኡባን ላይን ላይን ፖለቶ። ሄ ያርሾ በሳይ ጌሽ ግድያ ግሾ ጎዳስ ዱማትስ" ያግስ።
ናጋራ አቶተ ሚሸ
11 ሄሳፈ ጉየ፥ ጎዳይ ሙሰኮ ሀይሳዳ ያግስ፤ 12 "ኔኒ እስራኤለ አሳ ታይብያ ዎደ፥ እስ እስ አስ ባ ሸምፑዋ ዎዛናዉ ጎዳስ ሚሸ ቃንፆ። ያትኮ ኔኒ ኤንታ ታይብያ ዎደ ጋዶይ ኤንታ ቦላ ዬና። 13 ታይቦን ገልያ አስ ኦንካ ሁጰን ሁጰን ጌሻ ዱንካነን ኤረትዳ ምዛነ ግናን ብራ ጭጎ። እስ እስ አስ ሄሳ ታዉ ያርሾ ኦድ እሞ። 14 ታይቦን ገልያ አስ ኦንካ ላይ ላታማነ እያፐ ቦላ ግድዳ ኡባይ ጎዳስ ሄሳ ኤሆ። 15 ኤንቲ ባንታ ሸምፑዋ ዎዛናዉ ጎዳስ እሞታ እምያ ዎደ፥ ዱረይካ ማንቆይካ እስ ግና እሞፈ አትሽን፥ ዱረይ ዳርስድ ዎይኮ ማንቆይ ጉድ እሞፎ። 16 ሄ ሚሽያ እስራኤለ አሳፐ ኤካዳ፥ ጌሻ ዱንካንያ ናጋናዉ ፔሻ። ሄ ሚሸይ ኤንታ ሸምፑዋ ዎዛናዉነ ታ ኤንታ ናጋና መላ ቆፍስያባ ግዳና" ያግስ።
ሜቻ ከረ
17 ጎዳይ ሙሰኮ ሀይሳዳ ያግስ፤ 18 "ሜቻ ከርያነ እያ ቶሁዋ ናሰ ብራታፐ መ። እያን ሃ ትጋዳ ጌሻ ዱንካንያፐነ ያርሾ በሳፈ ግዶን ዎ።30:18 ከሳ 38:8. 19 አሮንነ እያ ናይት ባንታ ኩሽያነ ባንታ ቶሁዋ ያን ሜጨቶ። 20 ኤንቲ ጌሻ ዱንካንያ ገላናፐነ ያርሾ ያርሻናፐ ስን ሄሳ ኦናዉ በሴስ። ሄሳ ኤንቲ ኦኮ ሀይቆፐ አቶሶና። 21 ኤንቲ ሀይቆና መላ፥ ባንታ ኩሽያነ ባንታ ቶሁዋ ሜጨታናዉ በሴስ። ሄስ አሮናስነ እያ ሼሻታስ፥ ይያ የለተ ኡባስ መርና ዎጋ ግዳና" ያግስ።
ሹማተ ዛይተ
22 ጎዳይ ሙሰኮ ሀይሳዳ ያግስ፤ 23 "ጌሻ ሳዎታ፥ ሄሳትካ፤ ኡሱፑን ክሎ ግራመ ጉክያ ካርበ፥ ሄ ክሎ ግራመ ሳውያ ቃራፋ፥ ሄ ክሎ ግራመ ሳውያ ማታ፥ 24 ኡሱፑን ክሎ ግራመ ቡርጉደ ኤካ። ሄ ኡባይካ ጌሻ ዱንካነን ኤረትዳ ምዛንያ ግና ግዶ። ሄሳታ ቦላ ኦይዱ ልትሮ ዛይተ ጉጃ። 25 ሄሳታ ሽቶዳ ዋላካዳ፥ ሳውያ ጌሻ ዛይተ ኦዳ፥ 26 ጌሻ ዱንካንያነ ጫቆ ታቦትያ ትያ። 27 ፃርጴዛነ እያ ሚሸታ፥ ፆምፐ ዎያ ኮጫነ እያ ሚሸታ፥ እፃነ ጩይስያ ፃርጴዛ፥ 28 ፁሳ ያርሾ በስነ እያን ቦላ ደእያ ሚሸታ ኡባ፥ ሜቻ ከርያነ እያ ቶሁዋ ትያ። 29 ኤንቲ ፖሎ ጌሽ ግዳና መላ ኤንታ ዱማያ። ኤንታ ቦችያ ኦንካ ጌሽ ግዳና።
30 "ሄሳፈ ጉየ፥ አሮንነ እያ ናይት ካህነ ግድድ ታዉ ሀጋዛና መላ ኤንታ ትያዳ ዱማያ። 31 እስራኤለ አሳስ፥ ‘ሀይስ ጌሻ ሹማተ ዛይተይ ይያ የለተስ ታና ሀጋዛናዉ ማድያ ዛይተ ግዶ። 32 ሄ ዛይትያ ጮ አሳ ቦላ ጉሶፋ፤ ቃስ አይ ዛይተካ እያ ኦዳ ኦግያን ኦፋ። ዛይተይ ጌሽ ግድዳ ግሾ፥ ህንተካ እያ ጌሻተ ኤርተ። 33 ሄ ሽቱዋ ጊግስያ አስ፥ ዎይኮ ካህነ ግዶና ሀራ አስ ትይያ ኦንካ ታ አሳ ግዶፈ ህለቶ’ ያጋ" ያግስ።
እፃነ
34 ጎዳይ ሙሰኮ ሀይሳዳ ያግስ፤ "ጌሻ ሳዎታ፥ ፆክያ ም ማደ፥ ኬን ደእያ ሽቶ፥ ሳውያ ማደነ ሳውያ እፃነ ኤካ፤ ኤንታ ኡባ ምዛነይ እስ ግና ግዶ። 35 ሽቶዳ ዋላሄትዳ እፃነ ኦዳ ኤንታ ጎኤታ። ዋላህ ባይናነ ጌሽ ግዳና መላ እያን ማፅነ የጋ። 36 እያፐ ጉራ ኤካዳ ሊቅሳ ጫዳዳ፥ ታኒ ኔራ ጋሄትያ ጌሻ ዱንካንያ ግዶን፥ ጫቆ ታቦትያ ስንን ዉርፃ። ሄ እፃነይ ነዉ ፖሎ ጌሽ ግዶ። 37 ህንተዉ ጎኤታናዉ ሄ እፃንያ አይ ኦገንካ ጊግሶፕተ። ሄስ ታዉ ዱማትዳይሳ ግደይሳ ኤርተ። 38 ሄሳ ኦድ፥ እያ ሳዉዋ ስንግድ ኡፋይታናዉ ኮይያ ኦንካ፥ ታ አሳ ግዶፈ ያና" ያግስ።