1 ሀስታማን ላይን፥ ኦይዳን አጌናን፥ እቻሻን ጋላስ፥ ታኒ ኮቦራ ሻፋን ድኤትዳ አሳ ግዶን ደእሽን ሳሎት ዶየትን፥ ፆሳ ቆንጨ በአስ። 2 ካዎይ ዮአክን ድኤትዳ እቻሻን ላይን፥ ሄ አጌናን እቻሻን ጋላሳን፥ 3 ካልዳወታ ቢታን ኮቦራ ሻፋ ማታን ደእያ ታኮ፥ ቡዛ ናኣ፥ ካህንያ ህዝቄላኮ፥ ጎዳ ቃላይ ይስ፤ ጎዳ ዎልቃይ ታና ሃርስ።

4 ታ ፄልያ ዎደ ጎተይ ፑደሀ ባጋፈ ይሽን በአስ፤ ዎልቃማ ሻራ ግዶፈ ዎልአን በንቴስ፤ እያ ዩሹዋን ደእያ ሳሎይ ፖእስ። ታማ ግዶ ባጋይ ጶልያ ናሰ ብራታ ዳኔስ። 5 እያ ግዶን ኦይዱ ደኦን ደእያ መተት ደኦሶና። ኤንታ ማላይ አሳ ማላ ዳኔስ። 6 ኤንታ እሱዋስ እሱዋስ ኦይዱ ኦይዱ ሶምኦይነ ኦይዱ ኦይዱ ቀፈይ ደኤስ። 7 ኤንታ ገዳይ ስት ግስ፤ ኤንታ ቶሆይ መሄ ቅንጫፍለ መላ፤ ሄ ቶሆት ቁችድ ጌሽዳ ናሰ ብራታዳ ጶሌስ። 8 ኤንታ ቀፍያፐ ጋርሳራ ኦይዱ ባጋራ አሳ ኩሸ ዳንያ ኩሸይ ደኤስ። ሄ ኦይዱ መተታስ ሶምኦይነ ቀፈይ ደኤስ። 9 ኤንታ ቀፈይ እሶይ እሱዋ ቦቼስ፤ ኤንቲ ኡባይ ያ ሃ ስሞና ስት ግድ ስን ቦሶና። 10 ኤንታ እሱዋስ እሱዋስ ስን ባጋራ አሳ ሶምኦይ ደኤስ፤ ኡሻቻ ባጋራ ጋሞ ሶምኦይ ደኤስ፤ ሀድርሳ ባጋራ ቦራ ሶምኦይ ደኤስ፤ ጉየ ባጋራ አርጋን ሶምኦይ ደኤስ። 11 ኤንታ ቀፈይ ቁ ግድ ምጨትድ ኡትስ፤ ኤንታ እሱዋ እሱዋ ናምኡ ቀፈይ ናምኡ ባጋራ ሀንኮ መተታ ቀፈይ ቦቼስ፤ ናምኡ ቀፈይ ኤንታ አሳተ ካሜስ። 12 ኤንቲ ኡባይ ስት ግድ ስን ቦሶና፤ ያ ሃ ስሞና፥ ፆሳ አያናይ ብያ ሶ አዉካ ቦሶና። 13 ሀ ደኦን ደእያ መተታ ግዶን እስ ኤፅያ ታማ ቦንቆ ዳነይስ ደኤስ። ሄ ታማይ ስንነ ጉየ ቃፅያ፥ ኤፅያ ፆምፐ ዳኔስ፤ ሄ ታማይ ጶሌስ፤ እያ ግዶፈ ዎልአን ከዬስ። 14 ሀ ደኦን ደእያ መተት ዎልአንዳ ስንነ ጉየ ኤሶን ስመረቶሶና።

15 ሄኮ፥ ሀ ኦይዱ መተታ ታ በእያ ዎደ፥ ኤንታ ምየን፥ ሳአን ደእያ ገርቶታ በአስ፤ እስ እስ መተ ምየን እስ እስ ገርቶይ ደኤስ። 16 ሀ ገርቶት አልኦ ሹቻዳ ጶሎሶና፤ ኤንቲ ኦይዳይ መንነ ማላን እሶይ እሱዋ ዳኖሶና። እስ ገርቶይ ሀንኮ ገርቱዋ ግዶራ ካንድ አዳባ ዳኔስ። 17 ኤንቲ ብያ ዎደ ኦይዱ ባጋፈ አዉ ስሚድ ባነኮ ያ ሃ ስሞና ቦሶና። 18 ግታነ ያሽያ ኦይዱ ገርቶት ደኦሶና፤ ሄ ገርቶታስ ጋፅ ደኤስ፤ ሄ ጋፃ ዩሾይ አይፈን ኩምድ ኡትስ።

19 ሀ መተት ብያ ዎደ፥ ኤንታ ምየን ደእያ ገርቶት ገንደረቶሶና። ሄ መተት ቢታፈ ፑደ ደንድያ ዎደ ገርቶትካ ደንዶሶና። 20 አያናይ ብያ አዉካ ኤንቲ ደንድድ ቦሶና። ሄስ ሀነይ፥ ደኦ አያናይ ገርቶታ ግዶን ደእያ ግሾሳ። 21 ደኦ አያናይ ገርቶታ ግዶን ደእያ ግሾ፥ መተት ብያ ዎደ ገርቶት ቦሶና፤ መተት ኤቅያ ዎደ ገርቶት ኤቆሶና፤ መተት ቢታፈ ፑደ ደንድያ ዎደ ገርቶት ኤንታራ ደንዶሶና።

22 ደኦን ደእያ መተታ ሁጰ ሶፐ ቦላ ባጋራ ማስቶተዳ ጶልድ አይፈ ጫድያ ሳሎ ጉፋን ዳንያባይ ምጨትድ ደኤስ። 23 ሄ ሳሎ ጉፋንዋፈ ጋርሳ ባጋራ ኤንታ ቀፈይ ስት ግድ፥ እሶይ እሱዋኮ ምጨትድ ኡትስ። ኤንታ ኡባስ ባንታ አሳተ ካምያ ናምኡ ናምኡ ቀፈይ ደኤስ። 24 መተት ፓልያ ዎደ ኤንታ ቀፍያ ግርሳይ ሃ ክፃ ጉንዳ፥ ኡባ ዳንዳእያ ፆሳ ቃላዳነ ዳሮ ኦላንቾታ ኮሽንቻዳ ሀነይሳ ስአስ። ኤንቲ ፓሎ አግያ ዎደ ባንታ ቀፍያ ሺሽድ ኤኮሶና።

25 ኤንቲ ባንታ ቀፍያ ሺሽ ኤክድ፥ ሄ በሳን ኤቅዳሽን፥ ኤንታ ሁጰ ሶፐ ቦላ ባጋራ ደእያ ሳሎ ጉፋንዋፈ ቦላ ቃፈ ግርስ ስኤትስ። 26 ሳሎ ጉፋንዋፈ ቦላ ባጋራ ሳንፓረ ጌተትያ አልኦ ሹቻፈ መትዳ አራታ ዳነይስ ደኤስ፤ አራታ ዳነይሳ ቦላ አሰ ዳነይስ ኡትስ። 27 ታኒ እያ በእያ ዎደ እያዉ ፄሰ ዳነይሳፈ ቦላ ባጋይ ታማን ደእያ ናሰ ብራታዳ ጶሌስ። እያፐ ጋርሳ ባጋይ ታማ ዳኔስ፤ እያ ዩሾን ጶልያ ፖኦይ ደኤስ። 28 እያ ዩሹዋን ደእያ ጶልያ ፖኦይ እራ ዎደ ሻራን ኤቅያ ዙላ ዳኔስ።

ሀይስ ጎዳ ቦንቾ ቆንጨ ዳኔስ። ታኒ ሄሳ በእዳ ዎደ ቢታን ዱገ ጉፋናዳ እስ ቃላ ግርስ ስአስ።