1 "አሳ ናአዉ፥ እስራኤለ ዙማታ ሀይሳዳ ያጋዳ ትንብተ ኦዳ፦ ‘ህንተኖ፥ እስራኤለ ዙማቶ፥ ጎዳ ቃላ ስእተ።’ 2 ህንተ ሞርከት፥ ‘ሀሹ! በን ቃ ደረት ኡባይ ኑ ላታ ግድዶሶና’ ያግዶሶና። 3 ሄሳ ግሾ፥ ኡባ ሃርያ ጎዳይ ሀይሳዳ ያጌስ ጋዳ ትንብተ ኦዳ። ኤንቲ ህንተና ኡባ በሳራ መንረድ ባይሳ ኦዳ ግሾነ ህንተ ሀራ ካዎተታን ሃረታና መላ ኦዳ ግሾ ህንተና ጫሻስነ ሚቻስ አግስ። 4 ጎዳ ቃላ ስእተ! ኡባ ሃርያ ጎዳይ ደረታኮ፥ ዙማታኮ፥ ዛንጋራታኮ፥ ኦላታኮ፥ ዩሹዋን ደእያ ሀራ ካዎተን ቦንቀትዳ፥ ቀልቅሰትዳነ ባይሳ አትዳ ካታማታኮ ሀይሳዳ ያጌስ። 5 ታኒ፥ ታ ኤፅያ ቃናትያን ሀራ ካዎተታ ቦላነ ኤዶመ ኡባ ቦላ ቱማ ኦዳስ። ኤንቲ ኡፋይትሸነ ካሸ ታ ቢታ ባንታዉ ኤክዶሶና፤ ሄን ጋደታ ላትዶሶና። 6 ሄሳ ግሾ፥ እስራኤለ ቢታ ቦላ ትንብተ ኦዳ። ካዎተታ ጫሻ ግሾ፥ ታ ቃናተን ኤፃዳ ደረታስ፥ ዙማታስ፥ ዛንጋራትስነ ኦላታስ ኦደይሳ ኦዳ። 7 ህንተ ዩሹዋን ደእያ ካዎተት ኡባይ ካዉያናይሳ ታኒ ኡባ ሃርያ ጎዳይ ህንተዉ ታ ኩሽያ ደንዳ ጫቃዳ ኦዳይስ።

8 "ሽን፥ እስራኤለ ደረታ ቦላ ደእያ ምት ታ አሳ እስራኤለስ ዛሪድ አጫና፤ አይፈ አይፋና፤ ኤንቲ ኤሶን ባንታ ቢታ ስማና። 9 ታ ህንተራ ደአይስ፤ ታ ህንተኮ ስማና፤ ህንተ ቢታይ ጎየታናነ ዘረታና። 10 ታ እስራኤለ አሳ ታይቡዋ ሀ ቢታን ዳርሳና፤ አሳይ ካታማታን ዳና፤ ላለትዳ በሳት ዛሪድ ግምበታና። 11 ታኒ አሳነ መህያ ህንተዉ ዳርሳና፤ ኤንቲ የለታናነ ዳራና። በን ህንተ ደእዳይሳዳ ዳና፤ ካሰይሳፈ አዳ ታ ህንተና ዱረያና። ሄ ዎደ ህንተ፥ ታኒ ጎዳ ግደይሳ ኤራና። 12 ታኒ ታ አሳ እስራኤለ፥ ሀ ቢታን ዛሪድ ዳና መላ ኦና። ዛሪድ ሄ ቢታይ ህንተ ናይታ ይሰና፤ ቢታይ ህንተ ላታ ቢታ ግዳና" ያጌስ።

13 ኡባ ሃርያ ጎዳይ ሀይሳዳ ያጌስ አሳይ ህንተና፥ "ቢታይ አሰ ምያ ቢታ" ካዎተውካ፥ "ናእ ባይና አስ ኦሱ" ያገይስ ቱማ። 14 ህዛፐ ጉየ፥ ቢታይ፥ "አሰ ምያ ቢታ" ግዱኩ፤ ቃስ ካዎተት፥ "ናእ ባይና አስ ግዶኮና" ያጌስ ኡባ ሃርያ ጎዳይ። 15 "ህዛፐ ጉየ፥ ካዎተታ ጫሻ ታ ህንተና ስስከ፤ ህዛፐ ጉየ ዬላተከታ፤ ሄ ቢታይ ህንተዉ በ ግዱኩ" ያጌስ ኡባ ሃርያ ጎዳይ።

16 ዛሪድ፥ ጎዳ ቃላይ ሀይሳዳ ያግሸ ታኮ ይስ። 17 "አሳ ናአዉ፥ እስራኤለ አሳይ ባንታ ቢታን ደእያ ዎደ፥ ባንታ ሀኖታንነ ባንታ ኦሱዋን ቢታ ቱንስዶሶና፤ ኤንታ ሀኖይ ታ ስንን ማጫሳ ኩሸ መቶ መላ። 18 ኤንቲ ቢታን ሱ ጉስዳ ግሾነ ባንታ ኤቃን ቢታ ቱንስዳ ግሾ ታ ሀንቁዋ ኤንታ ቦላ ጉሳስ። 19 ታኒ ኤንታ ካዎተታ ግዶን ላላስ፤ ቢታ ኡባን ዘራስ። ታኒ ኤንታ ሀኖታነ ኤንታ ኦሱዋ መላ ፕርዳስ። 20 ኤንቲ ብዳ በሰ ኡባን አሳይ ኤንታ፥ ‘ሀይሳቲ ጎዳ አሳታ፤ ኤንቲ እያ ቢታፈ ከይዳይሳታ’ " ያግድ ታ ጌሻ ሱን ቱንሳና መላ ኦዶሶና። 21 ሽን እስራኤለ አሳይ ብዳ ካዎተታ ኡባን ቱንስዳ ታ ጌሻ ሱንይ ታና ቆፍሴስ።

22 "ሄሳ ግሾ፥ ታኒ ኡባ ሃርያ ጎዳይ፥ እስራኤለ አሳስ ግያባ ኦዳ። ‘ህንተኖ፥ እስራኤለ አሳዉ፥ ታ ሄሳ ኦይ፥ ህንተ ብዳ ካዎተታ ግዶን ቱንስዳ ታ ጌሻ ሱን ግሾፐ አትሽን፥ ህንተ ግሾ ግደና። 23 ህንተ ቱንስዳ፥ ካዎተታ ግዶን ቱንዳ ታ ግታ ሱን ጌሻተ ታ በሳና። ኤንቲ ፄልሽን፥ ህንተ ባጋራ ታ ጌሻተ በሲያ ዎደ፥ ታኒ ጎዳ ግደይሳ ኤንቲ ኤራና’ " ያጌስ ኡባ ሃርያ ጎዳይ።

24 "ታኒ ህንተና ካዎተታ ግዶፈ ከሳና፤ ቢታ ኡባፈ ሺሻዳ ህንተ ቢታ ዛራዳ ኤሀና። 25 ታ ህንተ ቦላ ፅሎ ሃ ርጫና፤ ህንተካ ጌያና። ህንተና ህንተ ቱናተ ኡባፈነ ኤቃ ጎይኖ ኡባፈ ጌሻና። 26 ታ ህንተዉ ኦራ ዎዛና እማና፤ ኦራ አያና ህንተ ግዶን ዎና፤ ሹቻ ዎዛና ህንተፈ ከሳዳ፥ አሾ ዎዛና ህንተዉ እማና። 27 ታ አያና ህንተ ግዶን ዎና፤ ታ ዎጋነ ታ ህግያ ናጋና መላ ኦና። 28 ታ ህንተ ማይዛታስ እምዳ ቢታን ህንተ ዳና፤ ህንተ ታ አሰ ግዳና፤ ታካ ህንተ ፆሳ ግዳና። 29 ህንተ ቱና ኡባፈ ታ ህንተና አሻና፤ ካይ ህንተዉ ዳራና መላ ኦና፤ ዛራዳ ህንተ ቦላ ኮሻ ኤህከ። 30 ኮሻ ጋሶን ህንተ ካዎተታ ግዶን ካዉዮና መላ ህንተ ም አይፍያነ ህንተ ጎሻ ካን ኩንና። 31 ሄ ዎደ ህንተ፥ ህንተ ኢታ ሀኖታነ ኢታ ኦግያ ሀሳያና። ህንተ ናጋራነ ህንተ ቱና ኦሱዋ ግሾ፥ ህንተ ህንተና ሻተታና። 32 ታ ሄሳ ኡባ ኦይ ህንተ ግሾ ግዶናይሳ ኤርተ። ህንተኖ፥ እስራኤለ አሳዉ፥ ህንተ ሀኖታን ዬላትተነ ካዉይተ" ያጌስ ኡባ ሃርያ ጎዳይ።

33 ኡባ ሃርያ ጎዳይ ሀይሳዳ ያጌስ፦ "ታ ህንተና፥ ህንተ ናጋራ ኡባፈ ጌሽያ ዎደ፥ ህንተ ካታማታን ዛሪድ ዳና መላ ኦና፤ ላለትዳይሳት ዛሪድ ግምበታና። 34 እያ ማታራ አያ አሳ ስንን ባይሳ ግድድ ደእያ ቢታይ ጎሻ ቢታ ግዳና። 35 አሳይ፥ ‘ሀይስ ካሰ ባይሳ ግድዳ ቢታይ ሀእ ዋንድ ኤደነ ጋናተ ግድዴ? ካሰ ላለትዳ፥ አስ ዶናነ ባይሳ ካታማት ሀእ ዋንድ ዩሾይ ግምበትዳነ አስ ደእያ ካታማታ ግድዶና?’ ያጋና። 36 ሄ ዎደ ህንተ ዩሹዋን ደእያ አትዳ ካዎተት፥ ታኒ ላለትዳ ካታማታ ዛራዳ ኬፅዳይሳነ ባይሳ ቢታይ ዛሪድ ካ ዶላና መላ ኦዳይ ታና ጎዳ ግደይሳ ኤንቲ ኤራና። ታኒ ጎዳይ ሄሳ ኦዳስ፤ ታ ኦድዳይሳ ታ ኦና" ያጌስ።

37 ኡባ ሃርያ ጎዳይ ሀይሳዳ ያጌስ፤ "እስራኤለ አሳይ እስ ቶሆ ታና ማዶ ኦይቻና መላ ኦና፤ ኤንታ ታይቡዋ ዉደዳ ዳርሳና። 38 ባኣለ ጋላስ ያርሾስ ይዳ ዉደ መሄን የሩሳላመይ ኩመይሳዳ፥ ላለትዳ ካታማታን አሰ ኩንና። ሄ ዎደ ኤንቲ ታኒ ጎዳ ግደይሳ ኤራና" ያግስ።