1 ሄሳፈ ጉየ፥ "ካታማ ሴራናዉ ዶረትዳ አሳት፥ ኦላ ሚሸ ባንታ ኩሸን ኦይክድ ሃ ዮሶና" ያግድ ዋስሽን ታኒ ስአስ። 2 ሄኮ፥ ዎያ ኦላ ሚሸ ባንታ ኩሸን ኦይክዳ ኡሱፑን አሳት፥ ፑደሀ ባጋን ደእያ ቆሞ ፐንግያፈ ይዶሶና። ኤንታራ እስፈ ሊኖፐ ኦሰትዳ ማኦ ማእድ፥ ባ ምየን ፃፍያባ ኮሮጆን ኦይክዳ እስ አስ ደኤስ። ኤንቲ ግዶ ገልድ፥ ናሰ ብራታፐ ኦሰትዳ ያርሾ በሳ ማታን ኤቅዶሶና።

3 እስራኤለ ፆሳ ቦንቾይ ባ ደእያ ክሩበታፐ ደንድድ፥ ፆሳ ኬ ፐንገ ብስ። ጎዳይ ሊኖ ማእድ፥ ባ ምየን ፃፍያባ ኮሮጆን ኦይክዳ አድያ ፄግድ፥ 4 "የሩሳላመ ካታማ ግዶ ካንዳ ባሸ፥ ያን ኦሰትያ እፀትዳ ኤቃ ጎይኑዋ ግሾ አዛንሸነ ኦልሸ ደእያ አሳ ሶምኦን ማላ ዎ" ያግስ።

5 ታ ስእሽን፥ ፆሳይ ሀራታኮ ሀይሳዳ ያግስ፦ "እያ ጌዶ ካልድ፥ ካታማ ግዶ ካንድ ዎተ። እሱዋካ ማሮፕተ፤ ኦደስካ ቃቶፍተ። 6 ጭማታ፥ ፓንታ፥ ጌላኦታ፥ ማጫሳታነ ናይታ ኡባ ሹክተ፤ ሽን ሶምኦን ማል ደእያ አሰ ኦናካ ቦቾፍተ። ታ ኬን ዎ ዶምተ" ያግስ። ኤንቲ ፆሳ ኬ ስንን ኤቅዳ ጭማታን ዎ ዶምዶሶና። 7 ፆሳይ፥ "ብድ ፆሳ ኬ ቱንስተ፤ ዳባባታ አሀን ኩንተ" ያግስ። ኤንቲ ከይድ፥ ካታማ ግዶ ኡባን ዎ ዶምዶሶና።

8 ኤንቲ ዎሽን፥ ታኒ ታርካ አታዳ፥ ታ ሶምኡዋራ ቢታን ጉፋናዳ፥ ታ ቃላ ቁ ኦዳ፥ "አቤት ኡባ ሃርያ ጎዳዉ፥ ኔኒ የሩሳላመ ቦላ ጉስያ ነ ሀንቁዋን እስራኤለፐ አትዳይሳታ ኩመ ይሳኔ?" ያጋስ።

9 እ ዛሪድ፥ "እስራኤለነ ይሁዳ አሳ ናጋራይ ዳሮ፤ ቢታ ኡባይ ሱን ኩምስ። ካታማ ኡባን ሱረ ፕርዲ ባዋ። አሳይ፥ ‘ጎዳይ ሀ ቢታ አግስ፤ ጎዳይ በኤና’ ያጎሶና። 10 ሄሳ ግሾ፥ ታ ኤንታዉ ቃትከ፤ ኤንታና ማርከ። ታኒ ኤንታ ኦግያ መላ ኤንታዉ ዛራና" ያግስ።

11 ሄሳፈ ጉየ፥ ሊኖ ማእድ፥ ባ ምየን ፃፍያባ ኮሮጆን ኦይክዳ አደይ፥ ጉየ ስሚድ፥ "ነ ታና ኪትዳይሳዳ ኦስ" ያግስ።