1 እዮብ ሀይሳዳ ያግድ ዛርስ፤

2 ሀችካ ታ ጫመታዳ ዙዙማይስ፤

ታ ኦለይ ምኖ ግድኮካ

እያ ኩሸይ ታ ቦላ ዴፀይሳ አግቤና።

3 እያ ደማና በሳ ታ ኤርዳ ግዳርክና፤

እ ደእያ በሳ ታ ጋካርክና!

4 ታኒ ታ መቱዋ እያ ስንን ዎናሽን!

ታ ዶና ሞቶን ኩንናሽን!

5 እ ታዉ ዛራናይ አይበኮ ኤራናሽን፥

እ አይ ግያኮ በአናሽን!

6 እ ባ ግታ ዎልቃን ታራ ኤቀታነሻ?

አካይ፥ እ ታና ስአና።

7 ያን ሱረ አስ እያራ ሞተታናዉ ዳንዳኤስ፤

ታ ዳይናይ ታና መርናዉ ሻትንና።

8 ሽን ታኒ ዶሎሀ ቢኮ እ ያን ዴና፤

ታኒ ዉሎሀ ቢኮ እያ ያን ደምከ።

9 እ ፑደሀን ኦያ ዎደ ታኒ እያ በእከ፤

ዱገሀ ባጋ ስምያ ዎደ ታኒ እያ ደምከ።

10 ሽን እ ታ ታንጉዋ ኡባ ኤሬስ፤

እ ታና ፓጭያ ዎደ ታኒ ዎርቃዳ ጌያዳ ከያና።

11 ታ ቶሆይ እያ ታንጉዋ ካልድ ቤስ፤

እያ ኦግያፐ ሀድርስ ኡሻች ስማብከ።

12 እያ ዶናፐ ከይያ ኪታፐ ታኒ ሻከታብከ፤

እያ ቃላ ታ ዎዛናን ዎስ።

13 ፆሳይ ላመተና፤

እያራ ኤቀታናይ ባዋ፥

እ ኮይዳባ ኦስ።

14 እ ታ ቦላ ቆፕዳይሳ ፖልስ፤

ሄሳ መላ ሀራ ዳሮ ሀልቾት እያዉ ደኦሶና።

15 ሄሳ ግሾ፥ እያ ስንን ኤቃናዉ ዳሮ ያሼስ፤

ሄሳ ኡባ ቆፕያ ዎደ ኮኮራይስ።

16 ፆሳይ ታ ዎዛናይ ዶጫና መላ ኦስ፤

ኡባ ዳንዳእያ ፆሳይ ታና ዳጋንስ።

17 ሳካና ማይ ታ ሶምኡዋ ጎዝኮካ፥

ታና ሄ ማይ ሃሳያ ድግቤና።