1 फिर यहोवा ने सीनै टेकडी का पास मूसा से बोल्यो, 2 इस्राएलिहोन से बोल कि जब तुम उ देश मे प्रवेश करनु जो मी तुमखे देउस हइ, तब जमीन खे यहोवा का लिये आराम मिल्यो कर्ये. 3 छ: साल तो अपनो अपनो खेत बोयो करनु, अरु छे साल अपनी अपनी अंगुर की बाडी मे से छाटि छाटि खे खेत कि उपज जमा कर्या करनु; 4 परन्तु सातवा साल जमीन खे यहोवा का लिये परमअराम काल मिल्यो कर; ओमे न तो अपनो खेत बोनु अरु नि अपनी अंगुर की बाडी छाटनु. 5 जो कुछ काट्यो हुया खेत मे अपना आप से उगे ओखे नी काटनु, अरु अपनी बिन छाँटी हुइ एक बेल की अंगूर खे नी तोडनू. क्युकि उ जमीन का लिये खास विश्राम को साल हुये. 6 जमीन का आराम साल की उपज से तुम खे, अरु तुम्हारा सेवक-सेविका खे, अरु तुमारा साथ र्‍हेनआला मजुरहोन अरु परदेशिहोन खे भी खानो मिल्ये; 7 अरु तुमारा जनवरहोन को अरु खेत मे जेत्ता जीवजन्तु हुये उनको भी खानो जमीन की सब फसल से मिल्ये.

8 सात आराम को साल, अर्थात् सातगुना सात सालहोन गिनी लेनु, सात विश्रामसालहोन को यो टेम उनचास साल हुये. 9 तब सातवा महिना का दसवा दिन खे, अर्थात प्रायश्‍चित्त का दिन, जय जयकार का महाशब्द को नरसिगा अपना पुरा देश मे सब जगा फुकी देनु. 10 अरु उ पचासवा साल खे पवित्र माननु, अरु देश का सब र्हेनआलाहोन का लिये छुटकारा को प्रचार करनु; उ साल तुमारा ह्या पुनरुध्दार को साल बोल्यो जाये; ओमे तुम अपनी अपनी खुद की जमीन अरु अपना अपना घराना मे लोटी नि पाये. 11 तुम्हारा ह्या उ पचासवो साल पुनरुध्दार को साल बोल्यो जाये; वोमे तुम नी बोनु, अरु जो अपना आप ऊग्ये ओखे भी नी काटनु, अरु नी बिन छाँटी एक बेल की अंगुरहोन खे तोडनू. 12 क्युकी उ जो पुनरुध्दार को साल हुये; उ तुम्हारा लिये पवित्र हुये; तुम ओकी उपज खेत मे से लीके खानु. 13 यो पुनरुध्दार का साल मे तुम अपनी अपनी खुद की जमीन वापस हुइ जाये. 14 अरु अगर तुम अपना भइ-बन्ध का हात मे कुछ बेच या अपना भइ-बन्ध से कुछ मोल ले, ते तुम एक दूसरा पर अन्याय नी करनु. 15 पुनरुध्दार का साल का बाद जेत्ता साल बीत्या हुये उनकी गिनती का अनुसार दाम ठऱ्हेके एक दूसरा से मोल लेनु, अरु कुछ साल की उपज का जसो उ तरा हात बेचे. 16 जेत्ता साल अरु र्हिये ओतो ही दाम बडानो, अरु जेत्ता साल कम र्हिये ओतो ही दाम कम करनो, क्युकी साल की उपज की गीनती जत्ती हय ओतनी ही उ तरा हात बेच्ये. 17 तुम अपना अपना भइ-बन्ध पर अन्याय नी करनु; अपना परमेश्‍वर को डर माननु. मी तुम्हारो परमेश्‍वर यहोवा आय.

18 "येकालिये तुम मरी विधिहोन खे माननु, अरु मरा नियमहोन पर समझी बूझीखे चलनु; क्युकी असो करणा से तुम उ देश मे निश्चित बस्या र्हिये." 19 जमिन अपनी उपज खे पैदा कर्यो कर्ये, अरु तुम पेट भर खाया कर्ये, अरु उ देश मे निश्चित बस्या ऱ्हिये. 20 अरु अगर तुम बोल्ये कि सातवा साल मे हम का खाह्या. नी ते हम बोया नी अपना खेत की उपज जमा कर्ये? 21 ते जान्ये कि मी तुम खे छे साल मे असो आशिर्वाद दियु, कि जमीन को उग्यो तीन साल तक खाना का लिये पुर्ये. 22 तुम आठवा साल मे बोह्ये, अरु पुरानो उपज मे से खाते र्हिये, अरु नया साल की उपज जब तक नी मिल्ये तब तक तुम पुरानी उपज मे से खाते र्हिये.

23 "जमीन सदा का लिये बेची नी जाये, क्युकि जमीन मरी हइ; अरु ओमे तुम परदेशी अरु बाहरी हुये." 24 अरु अपनी अधिकार कि सब जमिन मे से तुम जमिन खे छुडय लेनु. 25 अगर तरो कोय भइ-बन्ध कंगाल हुइ खे अपनी निज भुय मे से कुछ बेची डाल्ये, ते ओका कुटुब मे से जो सबसे नजिक हय व्हा अयखे अपना भइ-बन्ध का बेच्यो हुयो भाग खे छुडय ले. 26 अगर कोय इन्सान का लिये कोय छुडानवालो नी हुये, अरु ओका पास येतनो धन हुये कि खुद ही अपना भाग खे छुडय सखे. 27 ते उ ओका बिकन का टेम से सालहोन की गिनती करी खे कुछ सालहोन की उपज को दाम ओखे, जेने ओखे मोल लियो हइ, पलटय दे; तब उ अपनी निज जमीन को अधिकारी हुये जाये. 28 पन अगर ओका पास येत्ती पूंजी नी हुये कि ओखे फिर अपनी करी सक्ये, ते ओकी बेची हुइ जमीन पुनरुध्दार का साल तक मोल लेनआला का हाथ मे र्‍हिये; अरु पुनरुध्दार का साल मे छुटी जाये तब उ इन्सान अपनी निज जमीन को फिर अधिकारी हुय जाये. 29 फेर अगर कोय इन्सान शहरपनाहआला नगर मे बसना को घर बेचे, ते उ बेचन का बाद साल भर का अन्दर ओखे छुडय सखे, अर्थात् पूरा साल भर उ इन्सान खे छुड़ान को अधिकार ऱ्हेस. 30 पन अगर उ साल भर मे नी छुडय, ते उ घर जो शहरपनाहआला नगर मे हुये मोल लेनआला को बन्यो र्‍हिये, अरु पीडी–पीडी मे ओका कुल को बन्यो ऱ्हीहे; अरु पुनरुध्दार का साल मे भी नी छूटे. 31 पन बिना दिवाल का गाव का घर ते देश का खेत का जसो गिन्या जाये; अरु उनखे छुडानु भी हुइ सक्ये, अरु वे पुनरुध्दार का साल मे छुटी जाये. 32 फिर भी लेवीहोन को निज भाग का नगरहोन को जो घर हुये उनखे लेवीय जब चाह्ये तब छुडाये. 33 अरु अगर कोय लेवीय अपनो अधिकार छुडाये, ते उ बेच्यो हुयो घर जो ओका भाग खे नगर मे हुये पुनरुध्दार का साल मे छुटी जाये; क्युकी इस्राएलिहोन का बिच लेवीहोन को भाग उनका नगरहोन मे वे घर ही हइ. 34 पर उनका नगर का चारी तरफ की चरानआला कि जमीन बेची नी जाये; क्युकी उ उनको सदा को भाग हुये.

35 "फेर अगर तरो कोय भइ-बन्ध कंगाल हुइ जाये, अरु ओकी दशा तरा सामने दया योग्य हुये जाये, ते तू ओ खे सम्भालनु; उ परदेशी या भइ का समान तरा संग र्हिये." 36 ओकासे ब्याज या लाभ नी लेनु; परमेश्‍वर को डर माननु. जेका से तरो भइ-बन्ध तरा संग जीवन बिताया कर्ये. 37 ओखे उ ब्याज पर उधार नी देनु, अरु नी ओखे खान कि चिज का लाभ कमाना का लालच से देनु. 38 मी तुम्हारो परमेश्‍वर यहोवा आय. मी तुमखे कनान देश देन का लिये अरु तुम्हारो परमेश्‍वर रखन की मनसा से तुम खे मिस्र देश से निकाली लायो हइ.

39 "फेर अगर तरो कोय भइ-बन्ध तरा सामने कंगाल हुइ खे अपना आप खे तरा हाथ बेची डाल्ये, ते ओका दास का समान सेवा नी करानु." 40 उ तरा संग मजुर या यात्री का जसा र्हिये, अरु पुनरुध्दार का साल तक तरा संग र्‍हि खे सेवा करतो र्‍हियो. 41 तब उ बाल–बच्चा समेत तरा पास से निकली जाये, अरु अपना कुटुम्ब मे अरु अपना बापदादा कि निज भुय मे वापस जाये. 42 क्युकी वे मरा सेवक हइ, जेखे मी मिस्र देश से निकाली लायो हइ; येकालिये वे दास की रीति से नी बेचे जाये. 43 ओका पर कठोरता से अधिकार नी करनु; अपना परमेश्‍वर को डर मानतो र्‍हेनु. 44 तरा जो सेवक-सेविकाहोन हुये वे तुम्हारा चारी तरफ का राष्ट्रहोन मे से, अरु दास अरु दासिहोन उन मे से मोल लेनु. 45 जो यात्री दुन्या तुमारा बिच मे परदेशी हुय खे र्‍हिये, उनमे से अरु उनका घर मे से भी जो तुम्हारा आस पास हुये, अरु जो तुमारा देश मे पैदा हुया हों, उनमे से तुम सेवक अरु दासी मोल ले; अरु वे तुमारो हिस्सो ठहर्ये. 46 तुम अपना बेटाहोन खे भी जो तुम्हारा बाद हुये उनका अधिकारी करी सक्ये, अरु वे उनको भाग ठर्ये; ओमे से तुम हमेशा अपना लिये दास लियो करनु, पन तुम्हारा भइ-बन्ध जो इस्राएली हुये उन पर अपनो अधिकार कठोरता से नी जतानु. 47 "फेर अगर तरा सामने कोय परदेशी या यात्री धनी हुइ जाये, अरु ओका सामने तरो भैइ कंगाल हुइ खे अपना आप खे तरा सामने उ परदेशी या यात्री या ओका कुल का हाथ बेची डाल्ये," 48 ते ओका बिकी जाना का बाद उ फिर छुडायो जय सकस हइ; ओका भैइहोन मे से कोय ओखे छुडय सकस हइ. 49 या ओको काको, या काका भैइ, तथा ओका कुल को कोय भी पास कुटुब ओखे छुडय सकस हइ; अरु अगर उ धनी हुइ जाये, ते उ खुद ही अपना खे छुडय सकस हइ. 50 उ अपना मोल लेनआला का साथ अपना बेचना का साल से पुनरुध्दार का साल तक हिसाब करनु, अरु ओका बेचन को दाम साल की गिनन का जसो हइ, पन उ दाम मजुर को टेम का जसो ओका साथ हुये. 51 अगर पुनरुध्दार का साल का भोत साल र्‍हि जाये, ते जेतना पइसाहोन से उ मोल लियो गयो हइ ओमे से उ अपना छुड़ान को दाम वत्ता सालहोन का जसो वापस करी दे. 52 अगर पुनरुध्दार का साल का थोडा साल र्‍हि गया हुये, तेभी उ अपना मालक का साथ हिसाब करीखे अपना छुड़ान को दाम वत्ता ही साल का अनुसार वापस करी दे. 53 उ अपना मालक का संग उ मजुर का जसा र्हिये, जेकी साल कि मजुरी ठहरायो जास हइ; अरु ओको मालक ओका पर तरा सामने कठोरता से अधिकार नी जताने पाये. 54 अरु अगर वु या रीतिहोन से छुडायो नी जाये, ते उ पुनरुध्दार का साल मे अपना बाल–बच्चा समेत छुटी जाये. 55 क्युकी इस्राएली मरा सेवक हइ; वे मिस्र देश से मरा ही निकाल्या हुया सेवक हइ. मी तुम्हारो परमेश्‍वर यहोवा आय.