1 यहोवा अन ईद वचन नान हाती पोहचुस्त, 2 "हे मंळसा अन पारा, इस्त्राएल इन जो भविष्यवक्ता तांद अच मन इन भविष्यवाणी माळतार, आंदुर विरूद्‍ध भविष्यवाणी माळकु नी अन, ‘यहोवा अन वचन केळी.’"

3 प्रभु यहोवा ईद अनतान: हाय, आ मूर्ख भविष्यवक्तागोळ मा जो तान अच आत्मा अन हींद भटकुसेगतार, अदिक येनु दर्शन नोळीदील! 4 "हे इस्त्राएल, नीन भविष्यवक्ता खण्डर दाकळव लांडग्यागोळ घाई बन्सकु आव. 5 नीव दरारगोळ दा येरकु इस्त्राएल इन घराना अन साटी दीवार सुधरूसीदील, यदुर देल आंदुर यहोवा अन दिन युध्द दा स्थिर ईर सकायदुर. 6 आ लॉकुर जो अनतार, यहोवा अन ईद वाणी हुन, आंदुर भावी इन बेकार अदिक ख्वाटा दावा माळदुर; अदिक आग भी ईद आशा कोट्टुर कि यहोवा ईद वचन पुरा माळ्यान; तरी भी यहोवा आंदरी कळीदील. 7 येन नीम्द दर्शन ख्वाटा हैलेच, अदिक नीव झुठमुठ भावी अनालीर? नीव अनतीर, यहोवा अन ईद वाणी आद; लेकीन ना येनु अंदिदील."

8 ई कारण प्रभु यहोवा नीम से ईद अनतान: "नीव जो बेकार मात अंदीर अदिक ख्वाटा दर्शन नोळीर, ईदुरसाटी ना नीम खिलाप आईन, प्रभु यहोवा अन ईदा वाणी आद. 9 जो भविष्यवक्ता ख्वाटा दर्शन नोळतार अदिक खॉटाखुटा भावी अनतार, नान कय आंदुर खिलाप आदीत, अदिक आंदुर नान प्रजा अन मंडली दा भागी आगतीदील, न आंदुर हेसुर इस्त्राएल इन नामावली दा लिख्सकु आदव, अदिक न आंदुर इस्त्राएल इन द्याश दा प्रवेश माळ सक्यार; ईदुर देल नीव जान्स कोंडीर कि ना प्रभु यहोवा हुईन."

10 "यतिकी, हव, यतिकी आंदुर शांती आद, हिंग अंदकु नान प्रजा अक बयकुस्यार जब कि शांती हैलेच; ईदुरसाटी कि याग यातोदारा दिवार माळतान आग आंदुर अदुर कच्चा पोताई माळतार. 11 आ कच्चा पोताई माळावाळेर से अन कि अद बिदोदीत. यतिकी हापाळ जोर से माळ बंदीत, अदिक धोड्डेव धोड्डेव गारपीट भी बीद्दव, अदिक धोळ्द आँधी अदरी केळदीत. 12 ईदुरसाटी याग दिवार बिदोदीत, आग येन लॉकुर नीम से ईद अनतीदील, ‘जो पोताई नीव माळीर अद येल होत?’"

13 ई कारण प्रभु यहोवा नीम से ईद अनतान: ना होतकु अदरी धोळ्द आंधी इन द्वारा केडाईन; अदिक नान देल हापाळ माळ आदीत, अदिक नान जलजहाट देल धोड्डेव धोड्डेव गारपीट बीद्दव कि दिवाल इक नष्ट माळुल. 14 ई रीती या दिवार मा नीव कच्चा पोताई माळीर, अदरी ना माळ कोमाईन, बल्की मुण्ण दा मिलुसाईन, अदिक अदुर नीव खुलसेदीत; अदिक याग अद बीद्दीत, आग नीव भी अदुर ल्यालमा दब्सकु नष्ट आगेदीर; अदिक नीव जान्स कोंडीर कि ना यहोवा हुईन.

15 ई प्रकार ना दीवार अदिक अदुर्द कच्चा पोताई माळावाळेर येढ्ढु मा तान जलजलहाट पुरा रीती देल भळकुसाईन; बाक नीम से अनाईन, न रा दिवार ईत्त, अदिक अदरी पोताई माळावाळेर ईत्तुर, 16 मतलब इस्त्राएल उन आ भविष्यवक्ता जो यरूशलेम इन बारा दा भविष्यवाणी माळोर अदिक शांती इन दर्शन हेळोर, लेकीन प्रभु यहोवा अन ईद वाणी आद, कि शांती हैलेच.

17 बाक हे मंळसा अन पारा, नी तान लॉकुर आर्तेर से विमुख आगकु, जो तांद अच मन देल भविष्यवाणी माळतार; आंदुर खिलाप भविष्यवाणी माळकु अन,

18 प्रभु यहोवा ईद अनतान: जो आर्तेर कय देल सप्पा ज्वाळागोळ साटी ऊसी होलुतार अदिक जनावरगोळ्द अहेर माळली सप्पा प्रकार इन मंळसागोळ कण्ण ढाकसोर साटी कपळागोळ माळतार, आंदुर मा हाय! येन नीव नान प्रजा अन प्राणगोळ्द अहेर माळकु तान खुद इन प्राण ऊळ्स सक्कीर? 19 नीव रा मुठ्ठी मुठ्ठी तीम जौ अदिक रोट्टी इन तुकळा अन बदला नानी नान प्रजा अन नजर दा अपवित्र ठहरूसकु, अदिक तान आ ख्वाटा मातगोळ द्वारा, जो नान प्रजा अन लॉकुर नीम से केळतार, जो नाश इन लायक ईला ईरोर, आंदरी कोंद बुट्टीर, अदिक जो ऊळा लायक ईला ईरोर आ जीवगोळी ऊळ्सकु ईटीर.

20 "ई कारण प्रभु यहोवा नीम से ईद अनतान: नोळी, ना नीम आ ऊसागोळ खिलाप आईन, यऊर द्वारा नीव प्राणगोळ्द अहेर माळतीर, ईदुरसाटी यारी नीव अहेर माळ माळकु हार्सतीर आंदरी ना नीम खांदा मा टु कसुकु आंदरी बीळ्स बुळाईन. 21 ना नीम ताल्ला अन बुर्खागोळी हरकु तान प्रजा अन लॉकुरी इक नीम कय टु बीळसाईन, अदिक मुंद आंदुर नीम वश दा ईरतीदील कि नीव आंदुर्द अहेर माळ सक्कीर; आग नीव जान्स कोंडीर कि ना यहोवा हुईन."

22 नीव जो ख्वाटा माताळकु धर्मी इन मन इक उदास माळीर, अगर ना अदरी उदास माळोद चाहसालीन, अदिक नीव दुष्ट जन उक हियाव कटसुसीर, ताकी आव तान बुरा हादी टु तिर्गबाळुल अदिक जीत्ता ईरूल. 23 ई कारण नीव बाक न रा ख्वाटा दर्शन नोळीर, अदिक न भावी अंदीर; यतिकी ना तान प्रजा अक नीम कय देल बीळसाईन. आग नीव जान्स कोंडीर कि ना यहोवा हुईन,