Ezequiel 23

येढ्ढ व्यभिचारिणी आकतींगेर

1 बाक यहोवा अन ईद वचन नान हाती पोहचुस्त: 2 "हे मंळसा अन सन्तान, येढ्ढ आर्तेर ईरोर, जो ऊंद अच मोय इन पोरगोळ ईरोर. 3 आंदुर तान बचपन दा का वेश्या अन क्याल्सा मिस्त्र दा माळली कुरतुर; आंदुर तान कुवारापन बचपन दा खोऊस बुट्टुर अदिक आंदुर वेश्या आगेदुर. 4 आ पोरगोळ दा टु धोळ पोर इन हेसुर ओहोला अदिक आकिन आकतींग इन हेसुर ओहोलीबा ईरोद." आक नानोर आगेदुर, अदिक आकिन पोर पारगोळ पैदा आदुर. आंदुर हेसुर इन अनुसार ओहोला रा शोमरोन, अदिक ओहोलीबा यरूशलेम उर.

5 "ओहोला याग नानोर ईरोर, आग अच व्यभिचारिणी आगकु तान संगीगोळ मा मोहीत आगली कुरतुर जो आकिन मान्‍ना हातळोर अश्शूरी योध्दा ईरोर. 6 आंदुर रा सप्पा च्या सप्पा नीळा कपळा हाकावाळेर मनभावना हारोदर अधिपति अदिक प्रधान ईरोर, अदिक घ्वाळा मा सवार ईरोर. 7 ईदुरसाटी आंदुर आंदुर्दा सांगुळ व्यभिचार माळदुर जो सप्पा च्या सप्पा सर्वोत्तम अश्शूरी ईरोर; अदिक जो यारदारा मा आक मोहीत आदुर अदा मुर्तीगोळ से आक अशुध्द आदुर. 8 जो व्यभिचार आक मिस्त्र दा कलतीदुर, अदरी भी आक बिटीदील; यतिकी बचपन दा मंळसागोळ आकिन सांगुळ कुकर्म माळदुर, अदिक आकिन याद्दागोळ वत्तदुर, अदिक तन-मन देल आकिन सांगुळ व्यभिचार माळकु आत. 9 ई कारण ना आकी अश्शूरी संगीगोळ कय दा कोट्टीन यार मा आक मोहीत आगीदुर. 10 आंदुर आकी ऊगळा माळदुर; आकिन पोर पारगोळ कसुकु आकी तलवार देल घात माळदुर; ई प्रकार आंदुर कय देल दण्ड पाऊसकु आक आर्तेर दा प्रशिद्ध आगेदुर."

11 "आकिन आकतींग ओहोलीबा ईद नोळदुर, तरी भी आक मोहीत आगकु व्यभिचार माळदुर दा तान आकतींग से भी येक्कुल वाळुसेदुर. 12 आक अश्शूरी मान्‍ना हातळोर मा मोहीत आग तोगोर, जो सप्पा च्या सप्पा अति सुन्दर कपळा हाकावाळेर अदिक घ्वाळा अन सवार मनभावना, हारोदोर अधिपति अदिक सप्पा प्रकार इन प्रधान ईरोर. 13 आग ना नोळदीन कि आक भी अशुध्द आगेदुर; आ येढ्ढु आकतिंगेर्द ऊंद अच चाल ईरोद."

14 लेकीन ओहोलीबा येक्कुल व्यभिचार माळतेला होदुर; अत: याग आक दिवाल मा सेंदुर देल जेळ्द हिंग कसदी मंळसागोळ चित्र नोळदुर 15 जो कटी दा फ्याटा कटकु ईरोर, ताल्ला मा छोर लटकुसतेला रंगीला पगडीगोळ हाक्कु, अदिक सप्पा चा सप्पा तान कसदी जनमभुमी मतलब बेबीलोन इन लॉकुर रिती मा प्रधानगोळ रूप हुडुकु ईरोर, 16 आग आंदरी नोळतेला अच आक आंदुर मा मोहीत आदुर अदिक आंदुर हाती कसदीगोळ द्याश दा दूत कळुदुर. 17 "ईदुरसाटी बेबीलोन उन लॉक आकिन हाती पंलग मा बंदुर, अदिक आकिन सांगुळ व्यभिचार माळकु अशुध्द माळदुर; अदिक याग आक आंदुर से अशुध्द आगेदुर, आग आकिन मन आंदुर से तिर्गेत. 18 तरी भी आक तन तेरूकु अदिक व्यभिचार माळतेला होदुर, आग नान मन ह्यांग आकिन आकतींग से तिर्गीत, हांग अच आकिन से भी तिर्गेत. 19 ईदुर मा भी आक मिस्त्र द्याश इन तान बचपन इन दिन याद माळकु याग वेश्या अन क्याल्सा माळतोगोर, अदिक येक्कुल व्यभिचार माळतेला होदुर; 20 अदिक ईत्ता संगीगोळ मा मोहीत आदुर, यार्द मय गदहागोळ घाई, अदिक विर्य घ्वाळा घाई ईरोद. 21 नी ई प्रकार देल तान बचपन इन आ समय इन महापाप इन याद माळसुसत्या याग मिस्त्री लॉक नीन याद्दा वत्त तोगोर."

श्याण आकतींग इक परमेश्वर उन दण्ड

22 ई कारण हे ओहोलीबा, परमेश्वर यहोवा नीन से ईद अनतान: "नोळ, ना नी संगीगोळी उभार्सकु यार से नीन मन तिरग्याद नाकु दी टु नीन विरूद्ध तराईन. 23 मतलब बेबीलोन वासीगोळ अदिक सप्पा कसदीगोळ इक, अदिक पकोद, शो अदिक कोआ अन लॉकुरी; अदिक आंदुर सांगुळ सप्पा अश्शूरीगोळी तराईन जो सप्पा चा सप्पा घ्वाळा अन सवार मनभावना हारोदोर अधिपति, अदिक हापाळ प्रकार इन प्रतिनिधी, प्रधान अदिक नामी मंळसा आर. 24 आ लॉकुर हथियार, रथ, छकडा अदिक द्याश द्याश इन लॉकुर दल हुडुकु नीन मा चळाई माळ्यार; अदिक ढाल अदिक फरी अदिक टोप धारण माळकु नीन विरूद्ध नाकु दी पाती कट्यार; अदिक ना आंदुर अच कय न्याय इन क्याल्सा सोपसाईन, अदिक आंदुर तान तान नियम इन अनुसार नीन न्याय माळ्यार." 25 ना नीन मा होताईन, यदुर देल आंदुर नीन सांगुळ जलजलाहट देल बर्ताव माळ्यार. आंदुर नी मुग्ग अदिक कीव कडु कोंडार, अदिक नीन जोभी मिक्कु ईत्तीत आव तलवार देल कोंदकु आदान. आंदुर नीन पोर पारगोळी कसुकु वोतार, अदिक नीन जो भी मिक्कु ईत्तीत, अद बेक्की देल भस्म आगेदीत. 26 आंदुर नीन कपळा भी तेगुकु नीन सुन्दर सुन्दर ईसरा कसु कोंडार. 27 "ई रीती देल ना नीन महापाप अदिक जो वेश्या अन क्याल्सा नी मिस्त्र द्याश दा माळ्या, अदरी भी नीन से बिळसाईन, ईल ताका कि नी तान कण्ण आंदुर दी हच्या अदिक न मिस्त्र द्याश इक बाक याद माळ्या."

28 यतिकी प्रभु यहोवा नीन से ईद अनतान: नोळ, ना नीनी आंदुर कय सोपसाईन यारी नी दुश्मन सम्सत्या अदिक यार से नीन मन तिर्गेग्याद; 29 अदिक आंदुर नीन से दुश्‍मनी इन सांगुळ बर्ताव माळ्यार, अदिक नीन सप्पा कमाई इक नेगु कोंडार, अदिक नीनी उगळा माळकु बीट्ट बुट्टार, अदिक नीन तन तेरकु होगोर से नीन व्यभिचार अदिक महापाप प्रगट आगेदीत. 30 "ईव क्याल्सा नीन से ई कारण माळकु आदव यतिकी नी अन्य राज्यगोळ हिंद व्यभिचारीनी घाई आगेद, अदिक आंदुर मुर्तिगोळ पुजा माळकु अशुध्द आगेद. 31 नी तान आकतींग इन हादी मा नळद्या; ई कारण ना नीन कय दा आकिन घाई कटोरा कोळाईन. 32 प्रभु यहोवा ईद अनतान: तान आकतींग इन कटोरा देल नीनी कुडोद बिद्दीत जो गयरा अदिक चौळा आद; नी नेग्द अदिक मज्‍याक दा हार्सकु आद, यतिकी आ कटोरा दा हापाळ येनारा समुसतद. 33 नी मतवाला पन अदिक दुख देल दुखी आगेद्या. नी तान आकतींग शोमरोन इन कटोरा अक, मतलब विस्मय अदिक उजाळ इक कुडुकु दुखी आगेद्या. 34 अदुर दा टु नी गार्स गार्सकु कुळद्या, अदिक अदुर तुकळगोळी भी मेद्य अदिक तान याद्दागोळी घायल माळ्या; यतिकी ना अच हींग अंदीन, प्रभु यहोवा अन ईदा वाणी आद. 35 नी जो नानी मारतोग्या अदिक तान बाय नान से तिर्गुस कोंड्या, ईदुरसाटी नी खुद अच तान महापाप अदिक व्यभिचार इन भार नेगु, परमेश्वर यहोवा अन ईदा वाणी हुन."

येढ्ढ आकतींगेरी परमेश्वर उन दण्ड

36 यहोवा नान से अंदुन: "हे मंळसा अन सन्तान, येन नी ओहोला अदिक ओहोलीबा अन न्याय माळ्या? रा बाक आऊन बेकार क्याल्सा आंदरी हेळ कोम. 37 यतिकी आंदुर व्यभिचार माळदुर, अदिक आंदुर कयगोळ दा रक्ता हतकु आद; आंदुर तान मुर्तीगोळ सांगुळ व्यभिचार माळदुर, अदिक तान बाल बच्चा अक जो नान से पैदा आगीदुर, आ मुर्तीगोळ मुंद भस्म आगोर साटी येर्सकु आग्याव. 38 बाक आंदुर नान से हींग बर्ताव भी माळदुर कि आकिन सांगुळ नान पवित्र जागा अक भी अशुध्द माळदुर अदिक नान आराम दिनगोळी अपवित्र माळ्यार. 39 आंदुर तान चिकोरी तान मुर्तिगोळ मुंद बली येर्सकु अदा दिशी नान पवित्र जागा अपवित्र माळोर साटी अदुर दा होकदुर. नोळ, आंदुर ई प्रकार इन क्याल्सा नान भवन इन बुळ्क माळ्यार. 40 आंदुर दुर टु मंळसागोळी कारसुसदुर, अदिक आदुर होट्ट भी बंदुर. आंदुर साटी नी मय तोळु, कण्णगोळ दा काजर हच्च, ईसरा हाक्कु; 41 सुन्दर व्हर्स मा कुर्तकु ईत्त; अदिक नीन मुंद ऊंद मेज हासकु ईरोद, यदुर मा नी नान लुबान अदिक नान याण्णा ईट्द. 42 आग आऊन सांगुळ निश्चिन्त लॉकुर्द भीळ इन कोलाहल केळ बत्त, अदिक आ साधारण लॉकुर हाती आळी टु कारदुर कुडावाळेर लॉकुर भी ईरोर; आंदुर आ येढ्ढु आकतींगेर कयगोळ दा बाळागोळ हाकसुसदुर, अदिक आंदुर ताल्ला मा शोभायमान मुकुट ईटदुर.

43 "आग जो व्यभिचार माळ्त माळ्त हाळामुंड आगेगीदुर, आकिन बारा दा माताळली कुरतीन, ईग रा आंदुर आकिन अच सांगुळ व्यभिचार माळ्यार. 44 यतिकी आंदुर आकिन हाती हींग होदुर ह्यांग कि लॉक वेश्या अन हाती होगतार. हांग अच आंदुर ओहोला अदिक ओहोलीबा हेसुर इन महापापी आर्तेर हाती होदुर. 45 अत: धर्मी लॉक व्यभिचारिणीगोळ अदिक हत्यारागोळ लायक आकिन न्याय माळुल; यतिकी आंदुर व्यभिचारिणी आर, अदिक आंदुर कयगोळ दा रक्ता हतकु आद." 46 ई कारण परमेश्वर यहोवा ईद अनतान: "ना ऊंद भीळ से आंदुर मा चळाई माळसुसकु आंदरी हींग माळाईन कि आंदुर ईत्त आत्त वयाळ्यार अदिक लुट्सकु आदार. 47 आ भीळ इन लॉकुर आंदुर मा पथराव माळकु आंदरी तान तलवारगोळ देल कळ्द बुट्टार; आग आंदुर पोर-पारगोळ इक घात माळकु आंदुर मान्या भी बेक्की हचकु ऊरु कोंडार. 48 ई प्रकार ना महापाप इक द्याश दा टु दुर माळाईन, अदिक सप्पा आर्तेर शिक्षा ताकोमकु नीम घाई महापाप माळदुर देल ऊळ्दकु ईत्तार. 49 नीम्द महापाप नीम्द अच ताल्ला मा बीद्दीत; अदिक नीव सहीदा तान मुर्तीगोळ्द पुजा अन पापगोळ्द भार नेगदीर; अदिक आग नीव जान्स कोंडीर कि ना परमेश्वर यहोवा हुईन."