2 Coríntios 10

Paʉlo ʉkʉilongoola mʉlɨmo wakwe

1 Itɨ gwa, ʉnene Paʉlo ɨza nɨmʉpolo nɨkine nʉnyenye, ingɨ nɨmʉtaki nɨnkolɨ kahelo nʉnyenye, kʉmʉlompa kʉkɨaisa nʉ ʉkende wang’wa Kilisito. 2 Nʉmʉlompile leki kʉntashi itungo nɨmpembilye kʉng’wanyu, kʉnsoko kʉhuma ntule nɨmʉtaki kʉ antʉ nɨakʉsɨgɨe kɨna kishiɨ anga antʉ nɨatyatile intendo niya mihɨɨ. 3 Palʉng’wɨ nɨ kɨna kishiɨ mihɨɨ, ingɨ shanga kʉikʉa mbita akɨʉntʉ. 4 Ndogoelyo yɨgɨ nɨkʉikʉɨla shanga niya kɨʉntʉ, ingɨ ngulu yang’wa Itunda nɨyihumile kʉgazanja ngulu yɨhi. Kʉʉgazanja masɨgo ɨhi naʉteele, 5 nʉkʉbalansania inkwaatya yɨhi niya anya lʉgoha nahutanile nʉ ʉmanyisi wang’wi Itunda, kʉ ʉkaɨla masɨgo nʉkʉamanyisa atule nʉ lwijo kʉng’wa Kilisito. 6 Anga mʉkondanɨle kʉtula nʉ lwijo kʉng’wa Kilisito mʉ maintʉ ɨhi, ʉsese kihambile kʉpɨsɨɨlya antʉ ɨhi nɨagila lwijo.

7 Ʉnyenye magozi makani nɨ mʉmaine kʉ miho anyu. Itɨɨ, ʉkolɨ mʉntʉ wɨhi nʉsɨgɨe kɨna nʉwanso mʉntʉ wang’wa Kilisito? Itɨ gwa, nʉwasɨgɨle kɨna nʉsese ga kɨantʉ ang’wa Kilisito anga ʉng’wenso nɨ mʉntʉ wang’wa Kilisito. 8 Shanga kʉhung’wa mɨnyala kikʉlya kʉ ʉkʉlʉ nɨmpewe ni Isekʉlʉ, kʉnsoko ʉhumi nʉwanso shanga ʉkʉmʉlimɨlya ingɨ ʉkʉmʉzenga mʉ ʉhʉɨɨli wanyu. 9 Shanga ndoilwe mʉsɨge kɨna kʉbalʉa yane kʉmʉsasha mogope. 10 Antʉ ang’wɨ ɨlʉnga, "Balʉa yang’wa Paʉlo ingɨ ntaki hangɨ nkaku, nɨkɨpalʉng’wɨ nʉsese ingɨ mʉntʉ nʉmʉgila anga ngulu, napaga nʉkʉligitya inkani yakwe yituile anga sha kɨntʉ." 11 Mʉntʉ nʉtambʉe itɨ bahu wakɨmbʉke kɨna ayo naɨkʉandɨkile mʉbalʉa naɨkʉmolɨ kʉlɨ shanga yihutanile nɨ makani nɨkʉitʉma itungo nɨkine nʉnyenye.

12 Shanga kʉutula ang’wɨ kɨmpyana nɨantʉ nɨikʉlya ɨenso. Antʉ nɨanso apʉngʉ kʉnsoko itendisa kɨna enso ngele akʉgemeelya, antʉ nɨigemeelya enso kʉ enso igeeleka kɨna apʉngʉ 13 Ingɨ ʉsese shanga kʉʉkɨlɨnkɨla kikʉlya, kikʉlya kʉng’witʉ yikʉsiga kʉ ngele amʉlɨmo naɨkʉpewe ni Itunda, mʉlɨmo nʉwanso, wʉwo kʉitʉma kʉng’wanyu. 14 Itungo naɨkʉzile kʉng’wanyu ʉsese shanga aɨkʉkɨlɨnkɨe kikʉlya. Ʉsese aɨkʉtongee kɨza kʉng’wanyu kɨkamʉletela Nkani Nza nɨyang’wa Kilisito. 15 Itɨ gwa, ʉsese shanga kʉʉkɨlɨnkɨɨla kikʉlya kʉ mʉlɨmo nɨitʉmile antʉ nɨangɨza kʉkɨla ngele naɨkʉpewe. Ingɨ kʉsʉmbɨɨye kɨna ʉhʉɨɨli wanyu kʉng’wi Itunda ʉlongeelekile, nʉ mʉlɨmo witʉ kʉng’wanyu ʉkʉtula ʉkʉlʉ anga nʉloewe Itunda. 16 Pang’wanso kʉhumile kʉtanantya Nkani Nza mʉ mahɨɨ mangɨɨza nakʉlɨ nʉnyenye, nɨshanga kʉhumile kikʉlya kʉmʉlɨmo nɨitʉmile antʉ angɨɨza. 17 Ingɨ anga Wandɨkwa wang’wi Itunda nʉwandɨkilwe, "Mʉntʉ wɨhi nʉloilwe kikʉlya, wikʉlye kʉ makani nʉwitʉmile Isekʉlʉ." 18 Nʉgombekile shanga mʉntʉ nʉwikʉlya ng’wenso, ingɨ mʉntʉ nʉwɨkʉligwa ni Isekʉlʉ.